Binəqədidəki tikinti narazılığa səbəb oldu

Bakı şəhəri, Binəqədi rayonu, Binəqədi qəsəbəsində boş ərazi qanunsuz olaraq zəbt edilərək tikinti işləri aparılır.

Bu barədə Tribuna.az-a qəsəbə sakinləri məlumat veriblər. Sakinlər bildirib ki, bir müddətdir başlayan tikinti ciddi narahatlıq yaradır. Bununla bağlı sakinlər aidiyyəti qurumlara müraciət etsələr də, heç bir tədbir görülmür.
Sakinlər iddiasına görə Binəqədi rayon İcra Hakimiyyəti və Şəhərsalma və Arxitektura Komitəsi sözügedən tikiliyə göz yumur, işin davam etməsinə bilərəkdən şərait yaradırlar:
“Bu qəsəbədə son illərdir kim harada nə istəyir inşa edir. Heç nəyə nəzarət edən yoxdu. İndi də bu tikinti ilə bütün qayda-qanunları pozublar. Heç bir tikinti qaydalarına riayət olunmur. Gecə-gündüz ərazidə texnika işləyir, səs-küydən evdə oturmaq, yatmaq mümkün deyil.
Binəqədi rayon İcra Hakimiyyətinin əlindən həyətimizdə daşı daş üstünə qiya bilmirik. O dəqiqə gəlib başımızın üstünü kəsdirirlər. Bəs necə olur ki, Şəhərsalma və Arxitektura Komitəsi, Binəqədi İcra Hakimiyyətinin gecə-gündüz aparılan bu tikilidən xəbəri yoxdur.
İcazə olmasa bu adamlar işlərini belə rahatlıqla görə bilməzlər”.

Qeyd edək ki, Şəhərsalma və Arxitektura Komitəsinin sədri Anar Quliyev, Binəqədi rayon İcra Hakimiyyətinin başçısı isə Elxan Allahverdiyevdir.

Məsələ ilə bağlı yazıda adı hallanan hər iki dövlət qurumu ilə əlaqə saxlamağa çalışsaq da, zənglərimizə cavab verən olmadı.