Aİ-nin artan aktivliyi Mərkəzi Asiyaya çıxış hədəfi ilə bağlıdır

Avropa Şurası Azərbaycan və Ermənistan rəsmiləri ilə müntəzəm əlaqələr saxlayır. Avropa Şurasından bildirilib ki, təşkilatın baş katibi Alen Berse İrəvana səfər edəcək. Təşkilatdan qeyd ediblər ki, hər iki ölkə ilə müntəzəm əlaqələri var: "2024-cü ilin noyabrında Avropa Şurasının baş katibi Alen Berse Azərbaycanda olub. Gələn ay o, Ermənistana səfər edəcək". Xatırladaq ki, mayın 16-da Tiranada “Avropa Siyasi Birliyi”nin sammitindən əvvəl A.Berse Avropa Şurasında Cənubi Qafqazdakı vəziyyətin inkişafını izlədiklərini bildirib.

Millət vəkili Elçin Mirzəbəyli deyib ki, Avropa İttifaqı və Avropa Şurası fərqli platformalardır. Amma deputat qeyd edib ki, Avropa Şurasının özündə də Avropa İttifaqına üzv olan dövlətlər, o cümlədən aparıcı dövlətlər əsas mövqeyə sahibdirlər:

"Azərbaycan və Avropa Şurası arasında münasibətlər bəllidir. Bu münasibətləri biz Avropa İttifaqı institutlarına aid edə bilmərik. Çünki ölkəmizlə Avropa İttifaqı arasında əməkdaşlıq güclənir və bu, normal, ikitərəfli, qarşılıqlı faydalılıq prinsipi üzərində qurulan bir münasibətdir. Təbii ki, aktivlik var və bunun da səbəbləri var. İndiki şəraitdə, xüsusən ABŞ Prezidenti Donald Trampın tətbiq etdiyi rüsum siyasətindən sonra Avropaya yeni bazarlar lazımdır. Mərkəzi Asiyanın təbii resurslarına çıxmaq Avropa İttifaqının, o cümlədən Avropa Şurasının üzvü olan əsas dövlətlərin də marağındadır".

Parlamentari düşünür ki, Azərbaycana, bütövlükdə Cənubi Qafqaza yönəlik manevrlər, əslində, Mərkəzi Asiya bazarına çıxış imkanını təmin edəcək önəmli bir coğrafiyaya daxil olmaq və normal münasibətlər qurmaq məqsədi daşıyır:

"Burada Orta Dəhliz faktoru da xüsusi əhəmiyyətə malikdir. Avropa Şurası rəsmilərinin səfərini də eyni yanaşma ilə qiymətləndirmək olar. Amma bu, son nəticədə Azərbaycan-Ermənistan, yaxud Azərbaycan-AŞ münasibətlərinə hansısa formada təsir göstərməyəcək. Avropa Şurası Parlament Assambleyasının atdığı addımlar, bütövlükdə AŞ-nin davranışları Azərbaycanla münasibətlərin bundan sonrakı perspektivini ciddi şəkildə şübhə altına alır".