Çap versiya > Jan-Noel Barronun İrəvan səfəri: Erməni revanşizmi üçün yeni ümid, region üçün yeni təhlükə...

Məlum olduğu kimi, Fransa xarici işlər naziri Jan-Noel Barro mayın 26-da Ermənistana səfər edəcək. Səfərin məqsədi haqqında heç bir məlumat verilməsə də, əslində məqsəd aydındır: Ermənistanı Fransanın orbitində möhkəmləndirmək, onu silahlandırmaq, hakimiyyət və hakimiyyətdən kənardakı revanşist qüvvələri Azərbaycana qarşı səfərbər etmək və sülh üçün mümkün imkanları ortadan qaldırmaqdır.

44 günlük Vətən müharibəsindən sonra açıq anti-Azərbaycan mövqeyi tutan və Ermənistanı ölkəmizlə yeni qarşıdurmaya təhrik etmək üçün hərbi-diplomatik hər cür vasitədən istifadə edən rəsmi Paris, bu gün də eyni israrla İrəvanı Azərbaycanla mübarizəyə kökləməkdədir. Məqsəd Cənubi Qafqazda yenidən aradanı qarışdırmaqla Fransanın regiondakı mövqelərini möhkəmləndirmək, Ermənistanı özündən mümkün qədər daha çox asılı vəziyyətə salmaqdır. Hansı ki, bu, Fransaya Ermənistanı daha uzunmüddətli və miqyaslı şəkildə istismaq etməyə imkan verəcək.

Maraqlıdır ki, Fransanın anti-Azərbaycan siyasəti Ermənistan hakimiyyətindən daha çox erməni müxalifəti tərəfindən dəstəklənməkdədir. Çünki hazırda Azərbaycanla müharibə şüarları daha çox erməni müxalifəti tərəfindən səsləndirilməkdədir ki, bu da Fransanın regionla bağlı siyasətinə tam uyğun gəlir. Buna görə də Fransanın xarici işlər naziri Jan-Noel Barronun İrəvan səfəri erməni revanşizmi üçünm yeni ümid, region üçün isə yeni təhlükə hesab edilə bilər. Lakin bundan daha vacib bir məsələ var ki, bu da rəsmi İrəvanın Fransanın təzyiq və təsir siyasətinə necə reaksiya verəcəyi, onun səpdiyi nifrət və inamsızlıq toxumlarını bəsləyib-bəsləməyəcəyidir. Məhz bu – İrəvanın Fransa və digər qlobal güclərin qızışdırıcı, təşviqedici siyasətinə münsibəti, bu siyasət qarşısında sərgiləyəcəyi mövqe regionun gələcək təhlükəsizliyinin taleyinə ciddi təsir göstərəcək. İrəvan ya bu siyasətə boyun əyərək regionda vəziyəti mürəkkəbləşdirəcək, ya da Azərbaycanın sülh səylərini dəstəkləməklə regionla yanaşı, həm də özünün təhlükəsizliyini təmin edəcək.