“Daşnaksütyun”un rəhbərlərindən biri olan deputat Moskvaya qaçdı?..

Terrorçu “Daşnaksütyun” partiyasının ali orqanının nümayəndəsi, Ermənistan Milli Assambleyasının deputatı İşxan Sağatelyan bazar ertəsi gecə Moskvaya işgüzar səfərə yola düşüb.

Moderator.az xəbər verir ki, tert.am-ın yaydığı məlumata görə, bu haqda “Johovurd” qəzeti yazıb.

Qəzetin məlumatına görə, Sağatelyan sərhədi maneəsiz keçərək Rusiyanın paytaxtına çatıb. Deputat özü də bu xəbəri təsdiqləyib: “Moskvada işgüzar səfərdəyəm, amma tezliklə qayıdacağam, narahat olmayın,” – deyə daşnak deputat bildirib.

“Sağatelyanın bu səfəri xüsusilə gərgin siyasi vəziyyətin yaşandığı bir dövrə təsadüf edir. Ermənistandakı hökumət dairələri onun həbsinə dair niyyətlərini açıq şəkildə bəyan edib. İddialara görə, hüquq-mühafizə orqanları Sağatelyanı “Müqəddəs Hərəkat”a dəstək verməkdə ittiham etmək niyyətindədir. Əldə olunan məlumata əsasən, baş nazir Nikol Paşinyan artıq iyulun 15-nə qədər Sağatelyanın həbsinə göstəriş verib.

Bundan əlavə, “Joqovurd” qəzetinin gündəlik məlumatına görə, “Daşnaksütyun”un ofislərində axtarışlar aparılıb və digər üzvlərin həbs olunması ehtimalı da istisna edilmir”, -erməni nəşri davamında belə yazıb.