Bakıda dostları gənc oğlanı parkda yuxuya verib qaçdı

Bir neçə gündür sosial şəbəkələrdə Bakıda park ərazisində yerdə döşək üstündə yatan gəncin görüntüsü paylaşılır.

Ölkə.Az xəbər verir ki, yerdə yuxlayan gənci görənlər onun fotosunu çəkiblər.

Kimliyi naməlum şəxsin hansı səbəbdən parkda yatması maraq doğurub.

Daha sonra sosial şəbəkələrdə yayılan video ilə məlum olub ki, Əziz adlı gənci parka aparan onun dostları olub. Görüntülərin zarafat məqsədilə çəkildiyi deyilir.
Belə ki, yayılan videoda avtomobilin ön hissəsində olan gəncin əvvəlcə su içdiyi görünür. Suya yuxu dərmanının qatıldığı iddia edililir. Yuxuya getdikdən sonra isə onunla eyni avtomobildə olan digər şəxslər Əzizi Nərimanov rayonu ərazisində parkda döşək salaraq yatırdıblar. Sonda isə gənclərin avtomobilə minərək ərazidən uzaqlaşdığı görünür.

Görüntülər sosial şəbəkələrdə birmənalı qarşılanmayıb. Bir sıra istifadəçilər yatan şəxsin başına neqativ hadisə gəlmə ehtimalı, onun razılığı olmadan yuxu dərmanı verilməsi, icazəsiz görüntülərinin çəkilməsi və s. məqamlardan dolayı videonu çəkənləri tənqid ediblər.

Mövzunü Ölkə.Az-a şərh edən hüquqşünas Şamil Paşayev bu cür hərəkətlərin cinayət tərkibli olduğunu və qanun qarşısında məsuliyyət yaratdığını söyləyib:

“Burada Cinayət Məcəlləsinin (CM) tələbləri pozulmuş ola bilər. Bunun üçün baxmaq lazımdır ki, həmin şəxslər konkret olaraq nə ediblər. Araşdırmaq lazımdır ki, o gəncə hansısa dərman vasitəsi verilibmi. Şəxsə hər hansı bir dərman preparatı və yaxud da narkotik tərkibli vasitə verilibsə, bu, onun narkomanlıqla və ya toksiki xəstəliklə xəstələnməsinə səbəb olubsa, Cinayət Məcəlləsinin 126-cı maddəsi ilə məsuliyyətə səbəb ola bilər.

Eyni zamanda burada başqa müddəlar ola bilər. Məsələn, ehtiyatsızlıqdan sağlamlığa zərər vurma kimi qiymətləndirilə bilər. Bunu şəxsin hərəkətlərindən və ya aldığı xəsarətlədən müəyyən etmək olar.
Belə bir hal var ki, qanunsuz olaraq tətbiqi müəyyən edilmiş qaydada qadağan olunmuş diaqnostika və ya müalicə üsulları, dərman vasitələri tətbiq etməklə ehtiyatsızlıqdan şəxsin sağlamlığına ağır və ya az zərər vurmaq da Cinayət Məcəlləsinin 138-ci maddəsi tənzimlənir və məsuliyyət nəzərdə tutulur. Bu dərman vasitəsilə şəxs zöhrəvi xəstəliklərə tutula bilər. Bu da CM-nin 139-cu maddəsi ilə məsuliyyət yaradır. Şəxsi köməksiz və anlaqsız vəziyyətdə qoymağa, həyat və sağlamlığı təhlükəli vəziyyətdə olan şəxsi bilərək köməksiz qoymağa görə də 143-cü maddə ilə həmin şəxslər məsuliyyətə cəlb edilə bilər. Belə zarafatlar çox təhlükəlidir və ciddi qanun pozuntusuna, eləcə də fəsadlara səbəb ola bilər”.

Ş.Paşayev belə hallarda insanların reaksiya verməməsini də tənqid edib:

“Ən pisi odur ki, insanlar təpkisizdir. Küçədə bir gənc oğlanla gənc qız qucaqlaşsaydı, bir-birini sığallasydı, ətrafda olan hər kəs onlara reaksiya verər, sosial şəbəkələrdə yazardı. Həmin adamlara hansısa ağsaqqallar yaxınlaşıb namus, qeyrət dərsi keçməyə çalışardı. Amma burada adamı az qala ölümə tərk ediblər, təhlükədə qoyublar, orada olanların hansısa reaksiya verməsini görmürük. Çox təəssüfləndirici haldır”.