“TikTok”da ictimaiyyətə çox mənfi çalarlı ünsiyyət təqdim olunur,

“Qəbul etmək lazımdır ki, sosial şəbəkələr insanların həyat tərzinin bir hissəsinə çevrilib. İnsanlar informasiya alır, yazışır, mübadilə edir, bir-biriləri ilə hal-əhval tutur, müzakirə edirlər. Lakin sosial şəbəkələrdə mənəviyyat, həyati, elmi, intellektual, dini və s. mövzularla yanaşı çox aqressiv halların olduğunu da görürük. Ən geniş yayılan isə “TikTok”dur. Dəfələrlə qeyd etmişik ki, “TikTok”da ictimaiyyətə çox mənfi çalarlı ünsiyyət təqdim olunur. Əxlaqsızlıq, zorakılıq, bədbinlik... Təsadüfi deyil ki, zaman-zaman bütün dünya ölkələrində “TikTok”a baxandan sonra yaşı az olanlardan tutmuş qocalara kimi özünə qəsd halları yaşanıb. Bütün bunlar çox mənfi nümunədir”.

Bu sözləri Pravda.az-a açıqlamasında sabiq deputat Tahir Kərimli deyib.

O bildirib ki, xüsusilə, yeniyetmələr bu mövzularda çox həssasdırlar, beyinləri ağ kağız kimidir, nə görürlərsə, onu həyatın qanunu, həyat tərzi kimi qəbul edirlər: “Nəticədə, müxtəlif sosial şəbəkələrdə, internet oyunlarında zorakılıqlar, əxlaqsızlıqlar təbliğ olunur. Kimlərsə sağlamlığa ziyan gətirən dərmanları, ərzaqları və digər vasitələri təbliğ edirlər... Bütün bu mənfi çalarlar göz önündədir. Deyə bilmərəm ki, “TikTok” ölkəmizsə tamamilə qadağan olunsun. Dəfələrlə bu məsələni qanunvericilik orqanında da qaldırmışam. Hətta demişəm ki, mütləq “TikTok” və digər sosial şəbəkələrin üzərində nəzarət mexanizmi olmalıdır. Son dövrlər qanunvericiliyə dəyişiklik edilib, müəyyən məsuliyyət məsələləri gündəmə gəlib, amma çox ciddi şəkildə mənəvi senzura lazımdır. İdeoloji senzura demirəm, heç olmasa, mənəviyyata və sağlamlığa ziyan gətirən məsələlərlə bağlı senzura qoyulsun. Dövlət bunu əsirgəməməlidir ki, senzura orqanına nə qədər vəsait xərclənəcək. Çünki bu, gələcəyimiz, cəmiyyətimizlə, xüsusilə, gənclərimizlə bağlıdır ki, yoldan çıxmasınlar, həyatımız ağrılı keçməsin, adət-ənənələrimiz yaşasın, həyat tərzimiz sağlam olsun. Eyni zamanda bütün dünyada olduğu kimi bizdə də artıq süni intellektin imkanlarından istifadə etmək lazımdır. Çünki süni intellekt az bir müddətdə nəinki ölkə daxilində olan informasiyaların, hətta xaricdən gələn informasiyaların da mənfi çalarlarının qarşısını az müddətdə ala bilər”.