Gədəbəyin kəndləri boşalır!: Naşir həyəcan təbili çaldı

Gədəbəydə olan “Qanun” Nəşriyyatının rəhbəri Şahbaz Xuduoğlu buradakı yaşayış məntəqələrinin boşaldığını narahatlıqla dilə şətirib.

Modern.az-ın məlumatına görə, naşir sosial şəbəkədəki paylaşımında aidiyyəti qurumları problemi diqqətə almağa çağırıb:

“Gədəbəydə kəndlər bağlanır. Gələni yox, gedəni çox. Qasımağalı, Mutudərə, İsalı, Fərzalı, Arabaçı, Zamanlı, Çayrəsullu kəndləri təbiətinə görə dəlicəsinə gözəldir. Adam heyran olur. Yolları da rahatdır. Bir zamanlar bura arabalarla, daş yollarla gəlib yurd salıblar. İndi isə asfalt yolla boşalır. Sahibsiz evlərin sayı qat-qat artıb. Tibb məntəqələri, kitabxanalar, mədəniyyət mərkəzləri yoxa çıxıb, məktəblər bağlanır. Kəndlərin sanki son zəngi çalınır”.

Əslən hömin bölgədən olanlar bildiriblər ki, yazı gözəl olsa da, qışı çox sərt və çətin keçən bu kəndlərdə yaşam şərtləri ağırdır. Orada böyüyən gənclər üçün iş yerlərinin olmaması onları böyük şəhərlərə üz tutmağa məcbur edir.

“İnsanlar daha yaxşı təhsil, səhiyyə, iş və yaşayış şəraiti üçün şəhərlərə köçürlər. Dağlıq və sərhəd kəndlərində iqtisadi imkanlar çox məhduddur - iş, infrastruktur, xidmət yoxluğu bu kəndlərin boşalmasına səbəb olur. Gədəbəydə turizm sahəsinə investisiya demək olar ki, qoyulmayıb, gənclərin əylənə biləcəyi məkanlar, normal tibbi xidmət, dərman ala biləcəkləri aptek yoxdur. Kəndlərdə mavi qazın olmaması, işığın fasilələrlə verilməsi yaşayışı çətinləşdirir”, - deyə gədəbəylilər bildiriblər.