Ceyhun Mollazadə öz “Sazz”ının nazıyla bizi nə qədər oynadacaq?

“Sazz” bu ölkədə ən yiyəsiz internet provayderdi.

Mia.az xəbər verir ki, adıçəkilən provayderdən şikayətlərin ardı-arası kəsilmir.

Nə əlaqə vasitələri var, nə də ofisləri kim idarə edir, bilinmir. Yalnız internet satıb pul qazanırlar. Açıq virtual resurslarda idarəçilərdən bir nəfərin də adına rast gəlmirsən. Arada yeni stansiyalar açıb xəbər yayırlar aləmə, bunları da kimin açıqladığı bəlli deyil. Şirkət bir sirr dağarcığıdır.

Heç abunəçilərinin sayı da bəlli deyil. Heç bir yerdə açıqlanmır. Bəzi mənbələrdə bu informasiya üçün pul ödəməlisən. Müəmma bir şirkət. Öz işçilərinin sayı 4000 nəfərə yaxındı. Amma abunə sayı? Onların bazar payı? Bu barədə konkret rəqəmlər heç bir açıq mənbədə yoxdu. Dataxis və digər analitik platformalardan da belə məlumatları yalnız ödəniş əsasında ala bilərsən. Məsələn, mən gərək Dataxis, BuddeComm və ya digər telekom-bölüm analitiklərinin ödənişli hesabatlarına abunə olum ki, Sazzın abunəçilərinin sayı barədə məlumat alım. Əvəzində onların texnoloji məlumatları hər yerdə adamın gözünə girir. Xidməti satarkən hər dona girirlər.

Hara qaçıb gizlənib Sazz bütün ictimai resurslardan? Özünün bərbad işini ört-basdır etməkçünmü? İnternet sorğularda guya “SAZZ-ın müştəri xidməti departamenti” adlanan bir yer çıxdı qabağımıza, amma nə fayda? Heç bir aktiv əlaqə nömrəsi yoxdu.

Nə gözəldi bu məmləkət? Ceyhun Mollazadə deyilən biri oturub Amerikada, pul dəzgahı da burada partapart işləyir.

Əvvəlcə abunəçiləri minbir yolla tovlayırlar: elə sosial şəbəkələrdən, intetnet üzərindən şirin kampaniyalar aparır, müştəri toplayıb aradan çıxırlar. 191-in əlində əsəbin, konturun və pulun gedir. Abunəçilərin xeyir-şərinə dönüb 191 qaynar xətti: camaat bundan başqa qapı tanımır.

Bu nə tələdisə, onu Ceyhun Mollazadə yaxşı qurub. Necə olmasa, keçmiş diplomatdı, təmkinlə pul qazanmağı yaxşı bilir. Qardaşı Asim Mollazadə də pis yaşamır, illərdi, deputatdı.

Məncə, C.Mollazadənin bu dəzgahının içinin araşdırılmasının vaxtıdı. Bu qədər harınlıq yetər. Ən azından İstehlakçıların Hüquqlarının Müdafiəsi üzrə dövlət qurumları hərəkətə keçsin. Biz də araşdırmalarımızı davam etdirək.

Zülfiyyə Mustafayeva
MİA.AZ