Bakıdakı ermənilərlə bağlı razılıq əldə olundu

Ermənistanın “Hraparak” qəzeti iddia edir ki, avqustun 30-da Azərbaycan Respublikası Prezidentinin köməkçisi — Prezident Administrasiyasının xarici siyasət məsələləri şöbəsinin müdiri Hikmət Hacıyev ilə Ermənistan Təhlükəsizlik Şurasının katibi Armen Qriqoryan arasında telefon danışığı olub. Nəşrin məlumatına görə, söhbətin əsas mövzusu Azərbaycana qarşı hərbi cinayətlər törətməkdə ittiham olunan və Bakıda məhkəməsi davam edən ermənilər olub.

Belə ki, Vaşinqton görüşü zamanı Ermənistan nümayəndə heyəti ABŞ Prezidenti Donald Trampla müzakirədə bu məsələni qaldırıb. Tramp bu məsələyə mümkün çərçivədə baxılmasını Azərbaycan tərəfindən xahiş edəcəyini söyləyib.

Nəşr bildirir ki, Hikmət Hacıyev Qriqoryanla telefon danışığında bu məsələnin gündəmə gətirilməsinin sülh razılaşması və münasibətlərin normallaşmasına xələl gətirə biləcəyini vurğulayıb. Həmçinin ölkəmizə qarşı cinayətlərdə əli olan ermənilərin azad edilməsi məsələsinin nəzərdən keçirilmədiyini, bunun mümkün olmadığını qeyd edib. Məlumata görə, Hacıyevlə danışıqdan sonra Qriqoryan heç bir problem olmadığını deyib və razılaşaraq geri addım atıb.

Hələlik rəsmi Bakı bu barədə açıqlama verməyib. Lakin belə təmasın olması təəccüblü deyil, çünki artıq ikitərəfli danışıqların, fikir mübadilələrinin aparıldığı məlumdur.

Əslində burada əsas məsələ real diplomatik təmasın olub-olmaması deyil, Ermənistan hakimiyyətinin bu mövzunu daxili ictimai dəstək qazanmaq üçün istifadə etməyə çalışmasıdır – xüsusən 2026-cı il seçkilərində.

Aydın məsələdir ki, rəsmi Bakı heç bir halda bu məsələdə güzəştə getməyəcək. Çünki həm Ermənsitanın bunu qabartmasının pərdəarxasındakı məqsədi yaxşı bilir, həm də məsələyə baxışı fərqlidir.

İddialardan aydın olur ki, Ermənistan mediası vasitəsilə ictimaiyyətə ötürülən bu məlumat siyasi manipulyasiya məqsədi daşıyır. Məqsəd isə 2026-cı ildə keçiriləcək seçkilər öncəsi daxili siyasi mənfəət qazanmaqdır. Xüsusilə “xristian erməni məhbuslar” ifadəsinin seçilməsi bunu təsdiqləyir. Bu təsadüfi deyil, çünki belə detallar beynəlxalq arenada, xüsusilə də Qərb dairələrində dini həssaslıqlara toxunaraq emosional təsir yaratmaq üçün atılmış addımdır.

Əslində, söhbət Azərbaycanın suveren ərazisində, beynəlxalq humanitar hüququ pozaraq mülki şəxslərə və hərbçilərə qarşı qəddar cinayətlər törətmiş şəxslərdən gedir. Onların istənilən dövlətə deyil, məhz Azərbaycan dövlətinə və xalqına qarşı cinayət törətdiyi danılmaz faktdır və bu məsələyə yalnız hüquqi prizmadan yanaşmaq lazımdır.

Azərbaycan tərəfinin mövqeyi tamamilə haqlıdır və prinsipialdır. Bakı beynəlxalq hüququn və öz suveren qanunvericiliyinin səlahiyyətləri çərçivəsində bu məsələləri araşdırır. Cinayət törədən hər bir şəxs hüquqi məsuliyyət daşımalıdır və onun etnik kimliyi, dini mənsubiyyəti və siyasi fonu bu həqiqəti dəyişmir.

Hikmət Hacıyevin Ermənistan tərəfinə bu məsələnin gündəmə gətirilməsinin sülh prosesinə zərər verə biləcəyini deməsi həm diplomatik etika, həm də real təhlükəsizlik maraqları baxımından əsaslı və prinsipial yanaşmadır. Ermənistanın bu cür məsələləri sülh gündəminə alət etməyə çalışması prosesə zərbə vurur.

Azərbaycan tərəfi bu məsələdə tam şəffaf, hüquqa əsaslanan və sülhü təhlükəyə atmayan mövqe nümayiş etdirir. Bakı beynəlxalq hüququ rəhbər tutaraq ədalətin bərqərar olunması üçün çalışır. Buna görə də mövqeyi nəinki prinsipialdır, həm də diplomatik baxımdan əsaslandırılmış və qarşı tərəfin arqumentlərini çürüdəcək gücdədir.

Turan Rzayev
Globalinfo.az