Rafil Hüseynovun Bərdədə RİH başçısının müavini, sonra Masallıda RİH-nin başçısı işləyərkən törətdiyi əməllər barədə ölkə mediasında kifayət qədər materiallar dərc olunub.
Təkcə bir faktı qeyd edək ki, Rafil Hüseynovun Masallıda köhnə qəbristanlığı traktora verib yerində özünə obyekt tikdirməsi yerli camaat arasında ciddi narazılıq yaratmışdı. Camaat düşünürdü ki, işğal olunmuş ərazilərdə qəbirləri dağıdan erməni vandallarla belələrinin nə fərqi var ?
Bütün bunlara görə, Rafil Hüseynov Masallının icra başçısı vəzifəsindən azad olunanda Masallı camaatı 3 gün, 3 gecə toy-bayram eləmişdi.
Rafil Hüseynovun Ağcabədidə fermerlərin, iş adamlarının, idarə müdirlərinin başına açdığı zülmlər barədə, şəhid ailəsini döyməsi, polislə hədələməsi barədə də mətbuatda kifayət qədər yazılıb.
Ancaq Rafil Hüseynovun heç kimin ağlına gəlməyən yeni biznesi, imtahan biznesi barədə ilk dəfə ölkə mediasında Gundəlik-Bakı həyəcan təbili çaldı və dövlət qurumlarını xəbərdar elədi.
Təsəvvür edirsiniz, bu adam hər cürə oyundan, maxinasiyalardan çıxandan sonra girişib Dövlət İmtahan Mərkəzinin sədri Məleykə Abbaszadənin səlahiyyətlərini mənimsəməyə.
Yəni icra başçısı bütün əndazələri aşaraq, rayonda fəaliyyət göstərən uşaq bağçalarının müdirlərini, əməkdaşlarını “TEST imtahanı”ndan keçirir, suallar tərtib edir, sorğu-sual edir və ... sonda onlara deyir ki, ərizənizi yazın işdən çıxın, yoxsa sizi əmrlə işdən qovacam.
Görəsən, bu adam özünü harada hesab edir ?
Sən kimsən ki, əmr verib bağça müdirlərini işdən qovasan ?
Bu mövzuda Gündəlik-Bakıda dərc olunan silsilə yazılardan, şikayət ərizələrindən, AUDİO-müsahibələrdən sonra icra başçısı Rafil Hüseynovun canına üçütmə düşdü. Və bu məsələ dövlət qurumlarının diqqətini cəlb etdi.
Allah qoymasa, Rafil Hüseynovun məqsədi var imiş ki, HƏTTA məktəb direktorlarını, müəllimləri də öz “TEST”indən keçirsin.
İcra başçısı, az qala müəllimlərə TƏLİM-TƏRBİYƏ dərsi keçmək istəyirmiş.
Bu adama başa salan yoxdur ki, sən tərbiyə verməyi bacarsaydın öz oğluna tərbiyə verərdin. Sən kimsən ki, 20-30 il iş stajı olan təlim-tərbiyə işçilərinə mənəviyyat dərsi keçmək istəyirsən ?
Sənin özünün hər bir şeyin olsaydı, qəbristanlığı niyə dağıdırdın ?
Niyə böyük bir rayonun sakinlərini dövlətdən narazı salırdın ?
Bəlkə də çoxları inanmaz, amma Rafil Hüseynov rayon ərazisindəki onlarla məktəbin və uşaq bağçalarının kollektivini imtahan etmək, testdən keçirmək üçün 55 saylı rəsmi sərəncam imzalayıb, məktəb və məktəbə qədər təhsil ocaqlarının yüzlərlə işçisini testdən keçirmək üçün 360 sualdan ibarət imtahan-test sistemi tətbiq edib. Və tələb edir ki, bu suallara cavab verməyənlər könüllü olaraq işdən çıxmaqla bağlı ərizə yazsınlar. Əks təqdirdə onları məcburi qaydada işdən azad edəcəyəm.
Əslində Rafil Hüseynovun 55 saylı sərəncamı ciddi istintaq və məhkəmə predmetidir. Görəsən Rafil Hüseynov Azərbaycan Respublikasının Prezidenti, Ali Baş Komandan İlham Əliyevin sərəncamlarını o qədərmi saymır, özündən sərəncam imzalayır. Görəsən o göstəriş və tapşırıqları kimdən alır.
Şikayətçi Ağcabədi sakini Günel Yusif qızı Mehdiyeva səsli müraciətində bildirirdi ki, o, rayonun Hacıbədəlli kəndində yaşayır, 15 ildir Səməd Vurğun adına uşaq bağçasında işləyir, ailə başçısı olmayan qadındır, 208 manat maaş alır və s.
İcra başçısı Rafil Hüseynov Günel Mehdiyevani qanunsuz işdən çıxardaraq, onsuz da BAŞSIZ olan ailəni bir daha BAŞSIZ qoyur.
Bu adamın qanunları tapdalamağını başa düşdük. Bu adamda zərrəcə insaf, mürvət də yoxdurmu..?
Şikayətçilər deyir ki, Rafil Hüseynov 2019-cu ildə Ağcabədiyə icra başçısı təyin olunandan sonra bizim qara günlərimiz başladı.
Digər şikayətçi haqlı olaraq soruşur ki, axı biz niyə işdən çıxmalıyıq, hansı səbəbə görə, işimizi itirməliyik, işdən çıxsam, mən nə ilə dolanmalı, hansı pulla yaşamalıyam ?
Belə şikayətçilərdən biri də rayonun Hüsülü kəndindəki körpələr evi-uşaq bağçasının sabiq müdirəsi Əliyeva Gövhər Dərgah qızıdır.
Öz AUDİO müraciətində Gövhər Əliyeva qeyd edir ki, icra başçısı mənə deyir ki, ali təhsilin olmadığı üçün ərizəni yaz könüllü işdən çıx, yoxsa səni prokuraturaya verəcəm…
Sabiq başğa müdirəsi deyir ki, mənim 31 illik iş təcrübəm mənim ali təhsilimdir, mən 2 azyaşlı övladıma baxıram, bəs o uşaqlar necə yaşamalıdır, acından ölməlidirlər ?
Məlumat üçün qeyd edək ki, Gövhər Əliyeva bir müddət əvvəl Gündəlik-Bakıya müsahibə verərək, icra başçısının qanunsuz əməllərindən bəhs etmişdir. Gövhər Əliyeva eyni məzmunlu şikayət teleqramını 2 fevral 2021-ci il tarixdə ölkə başçısına ünvanlamışdır.
Amma 10 aydır ki, onun səsinə səs verən yox idi.
Ancaq Gündəlik-Bakıda dərc olunan silsilə yazılardan sonra Rafil Hüseynov hərəkətə keçib.
Gövhər Əliyeva ailəsi və öz adından Gündəlik-Bakıya minnətdarlığını bildirərək, qeyd edir ki, Rafil Hüseynov deyir ki, vətəndaşları qəbul etmək və onlara cavab vermək bizim vəzifə borcumuzdur.
Görəsən, 10 aydır bu vəzifə borcunu Rafil Hüseynov niyə başa düşmürdü ?
10 ay vətəndaşı bu qədər incitməyə, ona əsəb və stress yaşatmağa dəyərdimi ?
Gövhər Əliyeva icra başçısından soruşur ki, Vüqar Ağayev adına Şənlik uşaq bağçasının müdiri orta məktəb bitirib, niyə onu işdən çıxarmadınız, şirinliyiniz çatdı ona görəmi ? Belə hallar onlarladır.
Gövgər Əliyevanın dediklərindən bəlli olur ki, hətta ali təhsillilər də Rafil Hüseynovun testindən keçməyib, amma işlərində qalıblar.
Gövhər Əliyeva, sonda Rafil Hüseyova deyir ki, sənin Allahın yoxdur, sən 2 körpənin ac qalmasına necə yol verdin ? //gundelik-baku.com//
