Səbail Rayonu H.Mahmudbəyov adına 2 Nömrəli Texniki Humanitar Elmlər Liseyinin sabiq direktoru Bakir Mustafayev “Gündəlik-Bakı” qəzetinin qonağı olaraq Azərbaycan təhsil sistemində baş verən qanunsuzluqlar və özünün qarşılaşdığı problemlər barədə geniş məlumat verib.
Məlumat üçün qeyd edək ki, Bakir Mustafayev 35 il təhsil sistemində çalışb, bu müddətin 20 ilini məktəb direktoru kimi fəaliyyət göstərib.
Bakir Mustafayev müxbirimizə bildirib ki, Bakı Şəhəri üzrə Təhsil İdarəsinin müdiri olan Rəşad Tağıyev ( o hazırda Şəmkir Rayon İcra Hakimiyyətinin başçısıdır ) 2018-ci ildə Nuranə Şıxəliyevanı məktəbimizə tədris işləri üzrə direktor müavini göndərib: “Nuranə Şıxəliyeva ilə söhbət zamanı gördüm ki, onun ümumiyyətlə, təhsil sahəsindən anlayışı yoxdur. Mənim rəhbərlik etdiyim məktəbdə 4 nəfər “Əməkdar müəllim” fəxri adını daşıyan, 2 nəfər “Tərəqqi” medalı ilə təltif edilən, eyni zamanda yüksək təcrübəsi olan müəllimlər var. Sadəcə, Rəşad Tağıyev nəyinsə qarşılığında Nuranə Şıxəliyevanı bizim məktəbə direktor müavini, özü də tədris işləri üzrə müavin göndərdi”.
Bakir Mustafayev Bakı ŞTİ-də baş verən rüşvət hallarına da toxunub:
Bakı ŞTİ-də hamının yaxşı tanıdığı və özünü Rəşad Tağıyevin xalası qızı kimi qələmə verən Səbinə Səfərova var. O, İnsan Resursları şöbəsində işləyir və həmişə Rəşad Tağıyevin pul yığanı, “qara kassası” olub.
Səbinə Səfərova Bakıda olan 300-dən artıq məktəb direktorlarından şagird kontingentinə görə, hər ay 1000 ya da 500 manat pul yığıb Rəşad Tağıyevə verirdi.
Onu da qeyd edim ki, Rəşad Tağıyev işçiləri müqavilə əsasında işə götürürdü və hər il müqaviləni təzələmək üçün 1000 manat alırdı. Bu həm də təqaüd yaşı çatan müəllimlərə də aid idi.
Bakir Mustafayev bildirir ki, bircə dəfə məsələnin sonuna çatmaq üçün aparıb Səbinə Səfərovaya öz maaşımdan 500 manat verdim. Və heç kimdən rüşvət almadığım üçün 2-ci ay getmədim. 2019-cu ildə Səbinə Səfərova özü mənə zəng edərək dedi ki, bütün direktorlar aylıq pulu çatdırıb, siz niyə gətirmirsiniz..?
Mən deyəndə ki, verməyə pulum yoxdur, Səbinə dedi ki, direktor müavini Nuranə Şıxəliyevanın və 65 yaşlı fizika müəllimi Səkinə Bədəlovanın müddəti bitir, onların hər birindən 1000 manat al gətir.
Nuranə Şıxəliyeva razı olduğu üçün 1000 manatı aparıb Səbinəyə verdi və əmək müqaviləsi 1 il uzadıldı. Fizika müəlliməsi Səkinə Bədəlova isə pul vermədiyi üçün işdən uzaqlaşdırıldı.
Sabiq direktorun dediklərindən bəlli olur ki, o Rəşad Tağıyevə hər ay rüşvət vermədiyi üçün onun “torbasını tikmək” barədə qərar verilir. Və bu məsələ Bakı ŞTİ-nin “Daxili nəzarət “ şöbəsinin müdiri Sərxan Rzayevə həvalə edilir. Sərxan Rzayev isə “torba tikmək” məsələsini əvvəl Polis Akademiyasından qovulan, sonra hansı yollasa BŞTİ-də işə düzələn əməkdaşı Bakir Məmmədova tapşırır. Köhnə polis işçisi olan Bakir Məmmədov isə 70 saylı liseyin direktoru Ülviyyə xanımdan məktəbdə oxuyan bir şagirdin şəxsi işini tələb edir. Hansı ki, şəxsi işi kiməsə vermək qanunsuzluqdur. Və Bakir Məmmədov həmin uşağın şəxsi işini və konvertdə 800 manatı “torba” tikmək üçün Samir adlı oğlanın vasitəsilə 2 saylı məktəbə göndərir. Amma Samir səhv edərək pulu direktor Bakir Mustafayevə deyil, direktor müavini Nuranə Şıxəliyevaya verir və deyir ki, guya uşağın dayısıdır.
Sonradan əməliyyatın alınmadığını, yəni pulu direktora deyil, müavinə verildiyini görən, Rəşad Tağıyev və dostları başqa yollara əl atırlar. Samir adlı şəxs Nuranənin yanına gələrək deyir ki, rəhmətə gedənimiz var, uşaq bu məktəbə gələ bilməyəcək, ona görə də 800 manatı qaytar. Və vəziyyət gərginləşir. Bunu hiss edən məktəb direktoru Bakir Mustafayev digər müavini vasitəsilə dəqiq öyrənir ki, həqiqətən də Nuranə 800 manat rüşvət alıb. Və dərhal bu barədə Bakı ŞTİ-nin rəhbərliyinə, “Daxili nəzarət” şöbəsinə məlumat verir.
Və şöbənin əməkdaşı Nazim Bağırov onlardan izahat alır.
Məsələnin qəlizləşdiyini görən, Bakı ŞTİ-nin rəhbərliyi sentyabrın 25-də direktor Bakir Mustafayevin fəaliyyətini təftiş etmək üçün “Daxili nəzarət”in müdiri Sərxan Rzayevin başçılığı ilə məktəbə yoxlama göndərir.
Direktor deyir ki, heç bir etik normanı gözləməyən Sərxan Rzayev bir başa deyib ki, ərizəni yaz işdən çıx.
Sonra direktor Bakir Mustafayev 3 dəfə Rəşad Tağıyevin qəbuluna düşmək istəsə də düşə bilməyib və sonda “Sənə 500 manat toplayıb verə bilmədiyim üçün məni işdən azad elə” məzmunda ərizə yazaraq idarəyə təqdim edib.
Sonda yoxlamanın nəticəsi olaraq yalandan direktorun barəsinə israfçılıq səbəbi ilə material toplayaraq Baş Prokuror yanında Korrupsiyaya qarşı mübarizə Baş İdarəsinə göndəriblər.
Sabiq direktor Bakı ŞTİ-də baş verən qanunsuzluqlar, rüşvətxorluq halları barədə də müxbirimizə məlumat verib.
Sabiq direktorun dediyindən bəlli olur ki, Rəşad Tağıyevin xalası qızı Səbinə Səfərova neçə müddətdir ki, qurumda işə qəbul, əmək müqaviləsinin uzadılması, məktəb direktorlarından aylıq pul yığılması, işdən uzaqlaşdırma məsələlərinə baxıb.
Təsəvvür edirsiniz, ixtisası mühasib olan Elməddin Qazıyev Bakı ŞTİ-də “Ümumi təhsil” sektorunda baş məsləhətçi işləyib və 5-ci sinifə qəbul olan 38 şagirdin 14-dən rüşvət alıb. Hazırda Elməddin Qazıyev Sədərək bazarında təkər satır.
Bir sözlə, 35 il təhsil sahəsində çalışan sabiq direktorun dediklərindən bəlli olur ki, təhsil sistemimiz fəlakətli vəziyyətdədir.
Bakir Mustafayev, Bakı ŞTİ-nin “Daxili nəzarət” şöbəsinin adının dəyişdirilməsini və “Direktorlardan aylıq yığan” şöbə adlandırılmasını təklif edir.
Sabiq direktor təhsil naziri Emin Əmrullayevə müraciət edərək deyir ki, 35 illik zəhmətimin qarşılığında məni 4-5 dəqiqə qəbul elə, təhsildəki problemləri sənə deyim. Ya da cənab nazir, təcili istefa ver ki, bəlkə təhsilimizi fəlakətdən qurtara bilək.
Səbail rayonu H.Mahmudbəyov adına 2 Nömrəli Texniki Humanitar Elmlər Liseyinin sabiq direktoru Bakir Mustafayev
Yazıda adları çəkilən hər bir şəxsin mövqeyini dərc etməyə hazırıq. //gundelik-baku.com//
