“Qarabağ uğrunda apardığımız haqlı vətən müharibəsi dövründə gecələr yatmağı özümə qadağan etmişdim. Çörək yeyəndə, su içəndə hətta isti yerimə girəndə belə utanırdım. Cənab prezident xalqa müharibənin bitdiyini və 3 tərəfli müqavilənin imzalanacağını dediyi günü bir az da olsa rahat oldum. Yəni yerimdə artıq yata bildim. Dedim ki, şükür Allaha, torpaqlarımız qayıtdı. Görün biz nə boyda torpaqlarımızı, rayonlarımızı, kəndlərimizi işğaldan azad etdik. 30 il idi ki, bizim yaralarımız hələ də qaysaqlamamışdı, sağalmırdı, yaralarımıza bir az da olsa məlhəm çəkildi. Ordumuz bizə özümüzə inamı qaytardı. Bizə birləşmək ruhumuzun var olduğunu, ölmədiyini qaytardılar. Bizə qələbə sevincini qaytardılar, artıq gülümsəməyə də başladıq. Biz bu gün də hələ rahat olmamalıyıq. Nəyə görə? Çünki artıq bizim çiynimizdə borc yükü var, şəhidlərin haqqı var. Biz onların ruhuna layiq olmalıyıq. Layiq olmaq üçün də çalışmalıyıq ki, həyatımızı elə düzgün yaşayaq ki, onların ruhu bizdən inciməsin. İşğaldan azad etdiyimiz bütün torpaqlarımızda gözəl bir həyat qurmalıyıq. Biz şəhidlərimizin, qəhrəman övladlarımızın qələbəsini əbədiləşdirmək üçün hər şəhərdə, hər rayonda, hər kənddə şəhidlər xiyabanı düzəltməliyik. Bu ona görə lazımdır ki, hər şəhidin xatirəsi ürəyimizdə xiyabana çevrilsin. Biz onları heç bir zaman unutmamalıyıq, unutmağa haqqımız da yoxdur. Şəhid analarının qarşısında baş əyib, əllərindən öpürəm, şəhidlərimizin ruhu qarşısında baş əyirəm.
Mən bu günki gənclərimizin, onların igidliyinin qarşısında da baş əyirəm. Fəxr edirəm ki, bizim belə cəngavər, qəhrəman gənclərimiz var, fəxr edirəm ki, gənclərin ürəyi vətən sevgisi ilə çırpınır. Vətən sevgisi xalqımızın ürəyində var olduqca bu vətən basılmaz. Bizim hələ gələcəyə çox işimiz var. Mən inanıram ki, bu hələ tam qələbə deyil. Bizim hələ babalarımızın dəfn olunduğu qədim Azərbaycan torpaqlarımız var ki, inşallah bu qələbə, zəfər yolu bizi ora aparacaq. Oralarda da biz qələbə çalacağıq”.
Bunu Moderator.az-a Xalq artisti, məşhur “Nəsimi” filmindəki Fatimə obrazının ifaçısı Xalidə Quliyeva deyib. Sevilən sənətkar doğulub boya-başa çatdığı Şuşa ilə bağlı xatirələrini də bizimlə bölüşüb.
“Allah cəmi ölənlərə rəhmət etsin, mənim atam Şuşada, anam isə Bakıda anadan olub. Uşağlığım, gəncliyim Şuşada keçib. Atam hər yay bizi babamın Şuşadakı 2 mərtəbəli mülkünə aparardı. Babam Məşədi Rəhimi orada hamı tanıyıb, hörmət edirdi. Məşədə ziyarətə getmişdi, o vaxt böyük əmimi də özü ilə aparmışdı. İnanclı adam idi, dininə sadiq biri idi. Hər gün məscidə gedib şeyxin yanında oturardı. Hətta şeyx Kərbəla ziyarətinə gedib gələndən sonra babam birinci övladını gətirib onun ayağının altına qoydu ki, mən bunu sənə qurban edirəm, sən gedib oranı ziyarət edib gəlmisən. Belə bir qatı inancı var idi. Təbii ki, şeyx icazə verməyib, deyib ki, qurbanın qoyun olsun. Həm də tacir idi, atı, arabası var idi, ticarətlə məşğul olurdu. Dolanışığımız yaxşı idi, pis deyildi. Gövhər Ağa məscidinin yanında idi evimiz. Evimizin yaxınlığında meydan bulağı, tikiş fabriki, bazar var idi. Babamgil Bakıya köçəndə onların evində Laçınla Şuşa arasında Zarıslı kəndi var idi, o zarıslılar babamın evinə köçüb, orda yaşamağa başlamışdılar. Babamın böyük bağları, torpaq sahəsi var idi. Yadımdadır, o bağda armud ağacından armudu dərmək mümkün deyildi, dərən kimi armudun şirəsi dirsəyimə qədər tökülürdü. Mənim indi ən böyük arzum budur ki, orada gedib ulu babamın, nənəmin, yaxınlarımın məzarlarını ziyarət edib, onlara dua oxuyum. 1970 - ci ildə atam dünyasını dəyişəndə onu Bakıda dəfn etdik, amma məzarının üstünə Şuşadan gətirdiyimiz torpağı tökmüşdük. Mən 3-cü sinifdə oxuyanda atam məni Şuşada Cıdır düzündəki "lager"ə yazdırmışdı.
Yadımdadır, Şuşada, həm də Xankəndində erməni məhlələri var idi, o məhlələrin qabağından keçəndə erməni uşaqları hasara dırmaşıb başımıza ya tüpürərdilər, ya daş atardılar, “türklər gəlir, türklər gəlir” deyərdilər. O vaxtı onların sən demə, bizə böyük nifrəti var imiş. Amma bizdə onlara qarşı nifrət hissi olmayıb. Mənim yadıma gəlmir ki, evimizdə ermənilərə qarşı siyasi təbliğat aparılsın, bizə nifrət xörəyi yedizdirsinlər. Biz nifrət xörəyi yeməmişik. Biz həqiqətən də sadə, çox təmiz millət olmuşuq. Amma bu gün reallıq onu göstərir ki, belə olmaq olmaz. Bu gün güc çox böyük rol oynayır. Biz güclənməliyik, necə ki, bu müharibə ərəfəsində baş verdi. Biz Ali Baş Komandanımız, cənab İlham Əliyevin ətrafında birləşməliyik. Onun çıxışları müharibə günlərində olduğu kimi bu gün də bizi ruhlandırır, bizə ümid verir, arxa-dayaq olur. Hətta prezidentin çıxışı olmayanda darıxırıq ki, qoy çıxıb danışsın, çünki Ali Baş Komandana qəribə bir məhəbbət, sevgi yarandı. Allah xalqımızı, xalqımızın prezidentini bizə çox görməsin. Bəli, sülhməramlılar gəldilər, orda qayda-qanun yaratdılar, bunların hamısı bizim xeyrimiz üçündür. Oturub araşdıranda da görürəm ki, bu bizim bu günümüz üçün də xeyirlidir, hələ 10 ildən sonra nə olacaqsa onun üçün də. Hər bir şey dövlət tərəfindən düşünülüb. Mən bu yolda xalqımıza, prezidentimizə can sağlığı arzulayıram. Allahın amanında olaq, onun kölgəsi üstümüzdən əskik olmasın. Deyirlər ki, “Haqq nazilər, üzülməz”. Bəli, bizim haqqımız var, bizim haqqımız üzülmədi. Biz bu gün haqq yolunda çabalayırıq, tanrı da ona görə bizə yar olur. Xalqımızın vətəninə olan eşqi bizə kim verdi? Əlbəttə ki, Allah verdi. Bu eşq var olunca torpaqlarımız da, qələbə də bizim olacaq. Yetər ki, bir-birimizi sevək, Ali Baş Komandanımızı sevək, hər gün sevmək üçün çalışaq. Sevmək üçün nəsə addım ataq. Bəli, bizi sevgi xilas edəcək, o sevgini də bizə tanrı bəxş edib. Tanrıya min şükürlər olsun ki, bizi bu bəladan, bu zülmdən, bu acizlikdən, bu başıaşağılıqdan qurtardı” - deyə Xalq artisti Xalidə Quliyeva bildirib.
