"O, QARDAŞINI FALÇILARDA AXTARIRDI"
Fəaliyyəti dayandırılmış keçmiş Azərbaycan Beynəlxalq Universitetinin sabiq rektoru Elşad Abdullayevin yeni videosu yayılıb. Videoda "Təzadlar" qəzetinin baş redaktoru Asif Mərzili də hədəf seçilib (teleqraf.com, 18.12.2012).
İttihamlarla bağlı qəzetimizə danışan A. Mərzili deyib ki, Elşad Abdullayevlə aralarında elə vaxt olub ki, su da keçməyib: "2008-ci ildə "Təzadlar" qəzeti gündəlik nəşr olunmağa başlamışdı. Kənar müəlliflərdən biri maraqlı mövzu ilə gəldi. Müəllif qeyd etdi ki, 2003-cü ildə itkin düşmüş Mahir Abdullayev haqqında mətbuatda bircə cümlə də yazılmayıb. E. Abdullayev Ali Attestasiya Komissiyasında həm də sektor müdiri idi. Düşündük ki, danışa, hüquq-mühafizə orqanları qarşısında qardaşının itməsi barədə tələblər irəli sürə bilmir və biz qəzet olaraq ona dəstək ola bilərik. Qısası, "Mahir Abdullayev nə üçün axtarılmır?" sərlövhəli yazı getdi. Yazı 2008-ci ilin avqustun 28-də yazı çap olundu. E. Abdullayev o yazıdan sonra bizimlə münaqişəyə girdi. Vəziyyət elə həddə çatdı ki, E. Abdullayev bizi məhkəmə verdi, Mətbuat Şurasına şikayət etdi. Yəni biz arının pətəyinə çöp uzatmışdıq. Guya qardaşının adını pis mənada hallandırmışdıq. Sonra orada bizi barışdırdılar. On gün keçməmişdi ki, xüsusi ittiham qaydasında bizi Yasamal rayon məhkəməsinə verdi. Mənim haqqımda və qəzetə müsahibə vermiş Zümrüd Məmmədova adlı xanıma qarşı iddia qaldırdı. Məhkəmə mənim barəmdə 2009-cu ilin aprelin 7-də azadlıqdan məhrumetmə hökmü çıxardı. Zümrüd Məmmədovaya isə 1 il icbari iş kəsdi".
A. Mərzili bildirib ki, yazının müəllifi Zümrüd Məmmədova olmayıb. Adıçəkilən qadın yazı dərc olunandan sonra "Təzadlar" qəzetinin redaksiyasına gəlib və Mahir Abdullayev haqqında yazıda müəammalı məqamlar olduğundan bu mövzunun davam etdirilməməsini xahiş edib: "Biz dedik ki, bu yazı onun xeyrinədir. Dedi bilirəm, amma Elşad Abdullayev hər yerdə deyir ki, orada müəmmalı şeylər var, bu mövzunu gündəmə gətirib ictimailəşdirməsinlər. Mən də onun xahişini nəzərə aldım və dedim ki, bu mövzu qapandı. Bir neçə gün sonra "Müasir Müsavat" qəzetində mənim haqqımda yazı getdi. Məlum oldu ki, E. Abdullayev Şamaxıda Pirquluda mənim qonşumdur. Mənim evim bir mərtəbəli, adi kənd evidir. Bununku isə dörd mərtəbəli villadır. Mənim evimin şəklini çəkib qəzetə verib, adını da "villa" qoyub. Yazıb ki, bu "villa"nı Rəsul Quliyev Asif Mərziliyə tapşırıb, onun qoyunlarını orada otarır. Elşad Abdullayevin indiki mənasız çıxışlarına bənzəyən yazı idi. Mən təzədən Z. Məmmədovaya zəng etdim ki, yazını dayandır dediniz, dayandırdım, bu nə məsələdir? Dedi ki, Elşadın yanında oldum, başı çönüb bu adamın, qabaqkı Elşad deyil. Sonra Z. Məmmədovanı ittiham edib. O gəlib mənə dedi ki, Elşadın fikrincə, guya Mahir Abdullayevlə bağlı mövzunu Sizə mən vermişəm. Dedi ki, açıqlama vermək istəyirəm. Müsahibə verdi və həmin müsahibə əsasında da E. Abdullayev Zümrüd Məmmədova barəsində şikayət verdi. E. Abdullayevdə belə xarakter vardı ki, istədiyi olmalı idi. Məni həbs etdirdi, cənab prezident, media, hətta müxalifət bu məsələyə qarışdı. 20 ildir çıxırıq, kiminləsə siyasi və iqtisadi işbirliyimiz yoxdur. Başımızı aşağı salıb Qarabağ problemlərindən yazan qəzetik. Prezident ATƏT nümayəndələri ilə görüşündə etirazını bildirdi və məsələyə müdaxilə etdi. Bir gün sonra Bakı Appelyasiya Məhkəməsi qərarı dəyişdi və məhkəmə zalından məni buraxdılar. Amma o, məhkəməyə müraciət göndərmişdi ki, A. Mərzilinin cəzası daha da ağırlaşdırılsın. Bu adamdan başqa nə gözləmək olar? Bilə-bilə ki, bu işə prezident qarışıb, deyirdi ki, mən deyən olmalıdır. Həbsxanadan çıxandan sonra da üstümüzə düşdü, bir çox qəzetdə haqqımızda yazdırdı, axırda Mətbuat Şurasına müraciət etdi və adımızı "qara siyahı"ya saldırdı. 10 min diplomu satan oldu təmiz adam, amma bir məqalə yazmış qəzet "reket" sayıldı. Bizim aramızı Mətbuat Şurası ilə vurdu, MŞ-nı məhkəməyə verdik. Məhkəmə də sübut etdi ki, Şura ictimai təşkilat olduğuna görə qəbul etdiyi qərarın heç bir hüquqi əsası yoxdur. Özünə "hüquqşünas" deyən adam birincisi özünə hörmət qoymalıdır. Qohumlarına da müraciət etmişəm ki, bir yaxşı xəstəxana tapıb onu müalicə etdirin".
Asif Mərzili sözlərini belə bitirib: "Onun qardaşı ayrı-ayrı "razborka"larda iştirakçı olub. Deyir Mahirə məxsus filan restoranda görüşdük. Mahir Abdullayev dövlət adamı idi, MTN-də işləyirdi, məmurun ticarət obyekti saxlamağa qanun icazə verir məgər? Bu adam falçılarla işləyir. Falçıya inanıb deyir ki, qara qarğanın ayağındakı üzük tapılsa, Mahir üzə çıxacaq. O, qardaşını qara qarğaların arasında, falçılarda axtarırdı. Özünə elmlər doktoru deyən adamın səviyyəsi budur!"
