FARS-MOLLA REJİMİ HƏDDİNİ AŞMAQ ÜZƏRƏDİR
DİA.AZ: - Fars-molla rejimi həddini aşmaq üzərədir. Hər halda İranın Şiçal-qərb universitetlərinin adından Azərbaycan prezidenti İlham Əliyevə ünvanlanan məktubun mətnindəki fikirlər belə deməyə əsas verir.
DİA.AZ bildirir ki, “fars” agentliyinin açıqladığı bu məktubun mətnində Azərbaycan bir dövlət olaraq təhqir olunmaqla yanaşı, Azərbaycanın tarixi keçmişi təhrif olunur, həmçinin İran adından Azərbaycana qarşı ərazi iddiası irəli sürülür ki, bu da enində-sonunda farslarla Azərbaycan türklərinin savaşacağını qaçılmaz etməkdədir.
Prezident İlham Əliyevə ünvanlanan həmin məktubu təqdim edirik:
“Azərbaycan Respublikasının möhtərəm Prezidenti Zati-aliləri cənab İlham Əliyev
Salam!
İslamın əziz peyğəmbəri Məhəmmədin (səlləllahu ələyhi və alihi və səlləm) qızı həzrət Fatimə Zəhranın (salamullahu əleyha) ürəkyandırıcı şəhadəti münasibətilə Sizə və Azərbaycan Respublikasının şərəfli xalqına və əhli-beyt (ə) dostlarına başsağlığı verməklə yanaşı İranın azərilər yaşayan məntəqələrinin fəal tələbələri kimi məktub yazaraq, bu məntəqənin bütün tələbələrinin dünyanın ikinci şiə ölkəsində anti-İslam siyasətlərinin davamından narahat olduqlarını və həmçinin, anti-İran siyasətlərinin davamına o cümlədən Azərbaycan Respublikasının dövlət aparatlarının icazəsi ilə separatçı qruplardan birinin təşkilatçılığı ilə Badkubədə keçirilən “Çağdaş Güney Azərbaycanının sabahı” kimi qərəzli konfranslara etirazımızı bildirməyi, haqqı müdafiə məqsədilə bəzi mövzuları xatırlatmağı, öz sual və istəklərimizi Bakı dövlətinə çatdırmağı münasib bildik.
Azərbaycan Respublikasının sionist dəstəyi alan bəzi dairələrinin, hətta ölkənizin Milli Məclisin bəzi deputatlarının kommunistlər sayağı tarixi təhriflər əsasında İran İslam Respublikasının ərazi bütövlüyü əleyhinə əsassız iddiaları və Azərbaycan Respublikasında islamofobiya siyasətlərinin davamı bir müddətdir ki, İranın şimal-şərq əhalisini, əsasən də bu məntəqənin universitetlərinin tələbələrini cənab-alinizin hökumətindən bərk narazı salmışdır.
Tarixi sənəd və həqiqətlərə, əsasən də İranda müqtədir və şiə Səfəvi hökumətinin iftixarlı dövrünə ötəri nəzər, Gülüstan və Türkmənçay müqavilələrini, həmçinin “Gülüstani-irəm” və Arazın şimalında yaşamış yazıçıların onlarla digər kitablarının mütaliəsi hamılıqla Sizin ölkənizin anti-İran şəxs və dairələrinin iddialarının batil olmasını sübuta yetirir. Əlbəttə, bu arada hökumətinizə qarşı narazılığı daha da artıran budur ki, bu tarixi təhriflər Azərbaycan Respublikasının müstəqillik əldə etməsindən sonra da dövlət siyasətinin əsası kimi qalmış, hətta universitet və məktəblərin rəsmi kitablarında da yer tapmışdır.
İran İslam Respublikası Azərbaycan Respublikasının müstəqilliyinin ilk günlərindən Arazın hər iki tərəfində yaşayan xalqların Gülüstan və Türkmənçay müqavilələrindən qabaqkı vəziyyətə qayıtmağa və Arazın şimal əhalisinin İran İslam Respublikası ağuşuna qayıtmağa aşkar meyilli olmalarına baxmayaraq, Qafqaz ölkələrinin, o cümlədən Azərbaycan Respublikasının ərazi bütövlüyünə dost və qardaşcasına yanaşmış və rəsmi surətdə tanımışdır. Lakin, beynəlxalq diplomasiya və qayda-qanuların əksinə olaraq, etnik, müdaxilə və İran İslam Respublikasına qarşı ərazi iddiaları həmişə Azərbaycan Respublikası dövlətinin birbaşa və ya vasitəylə dəstəklədiyi siyasətlərindən olmuşdur. Şimal-Qərb Universitetləri Tələbələri Cəmiyyəti Zati-alinizin və bəzi dövlət rəsmilərinin diplomatik açıqlamaları ilə aşkar zidd olan bu dəstəkləmələr barədə şərh vermənizi gözləyir.
Zati-aliləri cənab İlham Əliyev
Badkubə dövlətinin İran İslam Respublikasına qarşı yaxşı niyyətdə olmamasından hekayət edən digər bir məsələ, Qarabağ müharibəsi həqiqətlərinin əksinə cilvələndirilməsidir. Özünüz bizdən də yaxşı bilirsniz ki, İran dövləti Badkubə dövlətinin kömək çağırışının cavabında və Azərbaycan Respublikasının məzlum xalqını müdafiə etməkdə heç bir yardımını əsirgəmədi. Müharibə nəticəsində öz yurd-yuvasından qaçqın düşənləri yaşayış vasitələri və imkanları ilə təmin etmək, ölkəyə tibbi yardımlar, az təminatlı ailələri himayət, Badkubə dövlətinə maddi yardımlar, hərbi avadanlıq və hərbi təlimlər, Azərbaycan hərbisini nizama salmaq bu köməklərin bir hissəsidir. Baxmayaraq ki, dövlətin qərbyönümlü və anti-İslam siyasət seçməsi, dövlət rəsmilərinin süstlüyü nəticəsində İslam ölkəsinin torpaqlarının beşdə bir hissəsi işğal olundu. Amma bunun şahidi olmuşuq və hazırda da şahidiyik Badkubə siyasətçiləri və mediası İran İslam Respublikasının bu yardımları aşkar etmək məhdudiyyətlərindən sui-istifadə edərək öz süstlük və nöqsanlarını yalan bəhanələrlə İİR-nın Azərbaycan xalqını himayə etməməsi, hətta Ermənistan dövlətini dəstəkləməsi kimi qələmə verirlər.
Bizim zati-alinizdən sualımız budur ki, 20 ilə yaxındır ki, müzakirə yolunu bəhanə gətirərək düşmənlə müharibə və cihaddan əl çəkmisiniz. Halbuki, bu müzakirələr sizin üçün məhz təbliğat xarakteri daşıyır və bu mövzuda heç bir ciddilik olmadığından islami ölkə üçün zillətdən başqa bir şey qazanmayıb. Diqqəti çəkən məsələ budur ki, həqiqəti gizlədərək müzakirələrin nəticəsiz qalmasının səbəbini bəzən İran, bəzən də Rusiyanının olduğunu deyirsiniz. Həqiqəti tərsinə cilvələndirməkdə və İran İslam Respublikasına rəva olmayan töhmət və böhtanlar atmaqda məqsədiniz nədir? Böhtan və pərdələmənin yerinə möhkəm və münasib üsul iradə edərək əməli surətdə Qarabağın azad edilməsinə çalışmağınızın vaxtı çatmayıbmı?
Biz inanırıq ki, Qarabağ müharibəsinin həlli yolu Badkubə rəsmilərinin islami dəyərlərə qayıtmasında və işğal olunmuş əraziləri azad etmək üçün dindar və xalq qüvvələrinə yol verməkdədir. Bu həmin yoldur ki, ABŞ, SSRİ və digər super-güclərin dəstəyi ilə İraq hökuməti İran əleyhinə müharibəyə başlayanda İran bu yoldan istifadə etməklə islami və şiə ölkəsinin izzətini qoruyub saxladı və biz iranlılar fəxr edirik ki, bu müharibədə ölkəmizin bir qarış torpağını da əlimizdən vermədik.
Azərbaycan Respublikasının Prezidenti
Bəzi dövlət rəsmiləri deyir ki, bu konfranslar qeyri-dövlət təşkilat və müəssisələri tərəfindən təşkil edilir və dövlətin mövqeyini əks etdirmir. Onda belə bir sual ortaya çıxır ki, necə olur ki, zati-alinizin rəhbərlik etdiyi bir ölkədə dini mərasimlərin icrası üçün müxtəlif bəhanələrlə məhdudiyyətlər qoyulur, xalq tarixdə kökü olan və onunla tanınan dini yığıncaqlar keçirilməsi üçün gərək müxtəlif mərhələlərdən keçərək lisenziya almalıdır, amma belə konfransların təşkilinə asanlıqla və heç bir məhdudiyyətlə qarşılaşmadan icazə almaq mümkündür? Nə üçün müsəlman fəalar İran İslam Respublikasına casusluqda ittiham edilir və əsassız ittihamlarla həbs edilir, amma dəqiq sənədlər əsasında müxtəlif xarici ölkələrə o cümlədən ABŞ və qondarma İsrail rejiminin kəşfiyyatına işləmələri məlum olan separatçı millətçilər asanlıqla ölkədə fəaliyyət göstərir və onların işinə heç bir maneçilik olmur?
Sözü gedən toplantının mövzularından biri iranlı etnik xalqların hüquqlarının müdafiəsi olmuşdur. Yaxşı olar ki, Azərbaycan Respublikası dövləti belə toplantıların təşkilini dəstəkləmək əvəzinə öz ölkəsində yaşayan müxtəlif millətlərin və etnik tayfaların hüquqlarının bərpası fikrində olsun.
Bilin və bilin ki, İran İslam Respublikasında hər il türk, ərəb, kürd və s. kimi müxtəlif dil və dialektlərdə yüzlərlə kitab çap olunur və xalqların adət-ənənəsinin, mədəniyyətinin qorunması məqsədilə bu geniş ölkənin bütün əyalətlərində yerli əhalinin dilində gecə-gündüz televiziya və radio kanalları yayımlanır, hatta Azərbaycan Respublikasının əhalisi də bu kanalların proqramlarından istifadə edirlər.
Amma Sizin ölkənizdə etnik azlıqların ən ibtidai hüquqları olan öz dilində mətbuat və televiziya kanalı yoxdur. Azərbaycan dilindən başqa bir dilli kanalın fəaliyyət göstərmək haqqı yoxdur. Ölkədə yaşayan talış, ləzgi, kürd və digər etnik azlıqlar öz ana dillərində kitab çap etməsi üçün bərk məhdudiyyətlərlə qarşılaşırlar.
Heç yaraşırmı ki, zati-alinizin rəhbərlik etdiyi bir ölkədə etnik azlıqların mədəniyyət sahəsinin fəalları təqib edilsin, hətta öldürülsün və siz onların hüquqlarını müdafiə etmək əvəzinə İran xalqlarının hüquqları barədə yalan xəbər yayanları dəstəkləyirsiniz?
Bizim tövsiyəmiz budur ki, dövlətin etnik müdaxilə siyasətinin icrasının və bu barədəki ixtisasi toplantıların qarşısını almaqla müxtəlif sinifdən olan öz xalqınızın hüquqlarının bərpası üçün çarə yolu axtarasınız.
Yuxarıdakı qeydlərə və zati-alilərinizdən qardaş və dost Azərbaycan Respublikasının Prezidenti kimi gözlədiklərimizə diqqət etməklə aşağıda qeyd edəcəklərimizi sizdən istəyirik:
1. Bilin ki, İran-rus müharibələri nəticəsində Qafqaz əyalətlərinin, xüsusilə də Badkubənin İrandan ayrılması İran xalqının, əsasən də Azərbaycan xalqının can və ürəyinə ağırlıq edir. İran İslam Respublikasının dövləti, o cümlədən Azərbaycan Respublikası xalqının İrana asan gediş-gəlişinə şərait yaramaq kimi münasib siyasətlər yürüdərək, həqiqətdə şiə olan hər iki ölkə xalqının daha çox əlaqə və münasibətlər qura bilməsi üçün zəmin yaratmışdır. Badkubə dövlətindən də istəyirik ki, sənədli və inkaredilməz tarixi həqiqətlərə diqqət etməklə özünün də əsrlər boyu üzvü olduğu İran xalqının əleyhinə tarixi saxtalaşdırmaq əvəzinə iki ölkə xalqının vəhdət və yaxınlaşması üçün şərait yaratsın.
İran İslam Respublikası xalqı və dövlətinin hüsnü-niyyətini və xeyirxahlığını nəzərə alaraq Azərbaycan Respublikası dövləti yuxarıda oxşar konfrans və proqramların qarşısını alsın və bu ölkəni ABŞ və sionist rejimə bağlı separatçı qrupların yığıncaq yerinə çevirməsin. Sözsüz, bu səhv millətçi siyasətdən dönüşü və tarixi həqiqətlərin qəbulunu göstərəcək. Qeyd edək ki, İranın universitet və elm dairələri Azərbaycan Respublikasının tarixçiləri ilə tarix xüsusunda debat və müzakirələrə çox maraqlıdır.
2. Mövcud ittihamların aradan qaldırılması istiqamətində Azərbaycan Respublikası dövləti İranın Qarabağ müharibəsində Azərbaycanın dövlət və xalqına yardımlarını aydın surətdə açıqlamalıdır.
3. İran mediasının Azərbaycan Respublikasına müsbət yanaşmasına diqqət etməklə ölkənizin mediasının İran əleyhinə təbliğatına son qoyulsun.
4. Əhalisi İslam məktəbinə və məsum imamlara (ə) məhəbbətli olan şiə camiəsində anti-İslam siyasətləri seçmək təhlükəlidir. Bu onun amillərinin məğlubiyyətini, xalqın oyanmasını və müqavimətini öz ardınca gətirəcək. Belə nəzərə gəlir ki, Badkubə dövlətinin hazırkı siyasət üsulu qərbin vadar etdiyi həmin siyasətdir. Qarabağın azad olunması üçün xalq cihad qruplarının formalaşmasının qarşısının alınması, məscidlərin dağıdılması, dini mərasim və münasibətlərə qarşı məhdudiyyətlərin icrası, məktəblərdə hicabın qadağan edilməsi, dini fəalların həbs edilməsi, dövlətin Eurovision mahnı müsabiqəsi keçirməsi, homoseksualların paradını, onlarla digər utandırıcı və qeyri-insani proqramları təşkil etmək istəməsinin hamısı Badkubə dövlətinin mövqeyini əks etdirir.
Bizim xeyirxahcasına tövsiyəmiz budur ki, belə siyasətlər seçməklə Azərbaycan xalqını və dünya müsəlmanlarını özünüzdən narazı salmayın və özlərinin problemlərini həll etməkdən aciz olan qərb, Amerika və sionistlərin ətəyindən yapışmaqdansa, İslam və şiəliyin insan hazırlayan və azadlıq bağışlayan məktəbinin göstərişlərinə əməl edin ki, özünüzün və xalqınızın dünya və axirət səadəti üçün zəmin yaransın.
İran İslam Respublikasının mədəni, elmi, siyasi, iqtisadi, hərbi və sənaye kimi bir çox sahələrdə nəzərə çarpan inkişafı bu örnəyin müvəffəqiyyətini göstərir.
Sözsüz, həbsdə olan islamçıların azadlığa buraxılması Sizin bu barədə hüsnü-niyyətinizi göstərər və İran və Azərbaycanın dindar xalqını sevindirər.
Sonda bəşəriyyət aləminin tənha nicat verəni həzrət imam Məhdinin (əc) zühurunu dua etməklə İslam və əhli-beyt (ə) məktəbi sayəsində Azərbaycan Respublikasının şərəfli xalqının qürur və iftixarını, İran və Azərbaycan xalqlarının hər gün artan yaxınlaşma və vəhdətini, əziz və məzlum Qarabağın azadlığını arzu edirik.
Vəlaqibətu lilmuttəqin
Vəssəlamu ələykum və rəhmətullahi və bərəkatuh”
