Məlum olduğu kimi, Azərbaycan Respublikası Prezidentinin 18 mart 2015-ci il tarixli Fərmanı ilə "Yerli icra hakimiyyətləri haqqında Əsasnamə"nin təsdiq edilməsi barədə" Azərbaycan Respublikası Prezidentinin 2012-ci il 6 iyun tarixli 648 nömrəli Fərmanında dəyişikliklər edilib.
Həmin dəyişikliklərə əsasən, "Rayon icra hakimiyyəti başçısı aparatının nümunəvi strukturu və ştat vahidlərinin sayı" cədvəli üzrə "Rəhbərlik" bölməsinin beşinci sətrindən "Başçının müavini - Aqrar məsələlər şöbəsinin müdiri" sözləri çıxarılıb. Bu, o deməkdir ki, rayon icra strukturlarında başçının aqrar sahə üzrə müavini vəzifəsi ləğv edilib. Ölkə rəhbərinin bu addımı əlbəttə ki, bir neçə amillə əlaqədardır. İlk növbədə söhbət aqrar sektorun inkişafına dövlət qayğısının artırılmasından, nəzarətin təkmilləşdirilməsindən gedir. Yadınızdadırsa, hələ 2014-cü ilin 16 aprelində prezident "Aqrar sahədə idarəetmənin təkmilləşdirilməsi və institusional islahatların sürətləndirilməsi ilə bağlı tədbirlər haqqında" Fərman verib. Fərmanda həmçinin, rayonlar üzrə aqrar siyasətin həyata keçirilməsinin təmin edilməsi, kənd təsərrüfatına dövlət dəstəyi tədbirlərinin təşkili, aqrar sahə ilə bağlı problemlərin həllində müvafiq mərkəzi icra hakimiyyəti orqanlarının yerli struktur bölmələri ilə səmərəli əməkdaşlığın qurulması məqsədi ilə Azərbaycan Respublikası Kənd Təsərrüfatı Nazirliyinin rayon və şəhər idarələrinin yaradılması nəzərdə tutulur. Göründüyü kimi, dövlət başçısı aqrar inkişafın təmin edilməsi üçün bu sahədə idarəetmənin daha da təkmilləşdirilməsini zərur hesab edərək mühüm qərarlar verib. İlk növbədə rayonlarda demək olar ki, formal fəaliyyət göstərən icra hakimiyyəti başçısının aqrar məsələlər üzrə müavinləri bu qərardan məyus olub. Lakin, heç kəsə sirr deyil ki, aqrar sahə üzrə müavinin rayonda dövlət tərəfindən kənd təsərrüfatı məhsulları istehsalçılarına ayrılmış müxtəlif təyinatlı subsidiyaların bölüşdürülməsindən savayı fəaliyyəti demək olar ki, görünmürdü. Eynən də, ölkə üzrə həmin vəzifələrə yerləşdirlimiş şəxslərin bir sıra hallarda qeyri-ixtisas sahibləri olduğu üzə çıxmışdı. Bu isə aqrar sahənin inkişafına əngəl törədən amillərdən biri kimi qiymətləndirilirdi. Bəzi rayonların icra başçıları aqrar məsələlər üzrə müavin vəzifəsini az qala alver predmetinə çevirmişdilər. Söhbətimizi də bu əsnada davam etdirmək fikrindəyik.
Ölkə başçısının Fərmanından sonra vəzifəsini itirmiş şəxslər arasında Xızı rayon icra hakimiyyəti başçısının aqrar məsələlər üzrə sabiq müavini Arzu Əzizov da var. Hazırda işsiz qaldığı bildirilən Arzu Əzizov xeyli müddət Xızı peşə məktəbinin direktoru vəzifəsində çalışıb. Kənd təsərrüfatı üzrə mütəxəssis deyil. Amma nədənsə, bu cür mütəxəssislərdən hali olmayan Xızıda icra başçısı Xəzər Aslanovun gözü təxminən 1 il öncə məhz Arzu müəllimi tutub. Halbuki, başçı bu vəzifənin tezliklə ləğv edilməsi barədə məlumatlı idi. Müşahidəçilərin fikrincə, Xəzər Aslanovun bu addımı kifayət qədər düşünülmüş olub və digər müavin Azər Əlizadənin cızdığı planın tərkib hissəsi hesab edilə bilər. Belə ki, Arzu Əzizovun Xəzər Aslanovla sıcaq münasibətlərindən xoflanan həmişə Azər Əlzadənin olduğu deyilir. Məlumat üçün bildirək ki, Azər Əlizadə başçının digər müavini Ruslan Şahbalayevin də sıradan çıxarılmasının təşkilatçısı hesab olunur. Azərin icra başçısı ilə əlbir olub öz doğma bibisi oğluna külli miqdarda pul "atması" barədə Xızı rayonunda dürlü-dürlü əhvalatlar yayılıb. Həmin əhvalatlar lap "Koroğlu" dastanına bənzəyir. Olaylar hətta Türkiyəyəcən gedib çıxır. Lakin nədənsə Azəri daha çox dostu Həmzə obrazında görürlər. Bu səbəbdən Azər Əlizadənin çox çətin vəziyyətə düşdüyü deyilir. Axı kələfin ucu icra başçısına aparır...Təsadüfi deyil ki, icra başçısı Xəzər Aslanov bu və ya digər səbəbdən onun diqtəsi ilə hərəkət etməyi lazım bilir. Həmin səbəblərin daha nələrdən ibarət olduğunu demək çətindir. Bunun üçün Azər Əlizadənin Xızıda qazandığı "imicin" təhlili aparılsın. Yadınızdadırsa, ötən yazılardan birində Azər Əlizadənin qeyri-ənənəvi və radikal dini cərəyanlardan biri ilə sıx əlaqələri barədə qeydlər getmişdi. Həmçinin bu məsələdən yerli inzibati strukturların məlumatlı olmasına da diqqət yetirilmişdi.
"Bundan mənə nə"?..
Yolumuzu bu yaxınlarda, Xızının Sayadlar kəndindən salmışdıq. Böyük şairimiz Mikayıl Müşfiqin sözün həqiqi mənasında yerlə yeksan edilmiş doğma kəndindən soraq istədik. Fəqət, gözlərimizə inanmadıq. Giləzidən sonra körpünü elə ki keçdin, birinci kənd Mikayıl Müşfiqin doğma yurd yeridi. Körpünü keçərkən dəhşətli mənzərə ilə üzləşdik. Gördük ki, Müşfiq ocağının ətrafını lil basıb. M.Müşfiqin xatirə muzeyinin bir neçə addımlığında adamlar toplaşmışdı. Yaxınlaşıb ədəb-ərkanla salam verdik, hal-əhval tutduq. Müşfiq ocağının baxımsız vəziyyətə düşməsinin səbəbini soruşduq ki, bunu kim edib. Əvvəlcə bizi şübhəli nəzərlərlə başdan ayağa süzüb bir ağızdan söylədilər: "Bizdən niyə soruşursunuz? Gedin icra başçısı Xəzər Aslanovla rayon suvarma sistemləri idarəsinin rəisi, Fərrux Haqverdiyevdən xəbər alın, görün, bu trubaları satıb pulunu necə mənimsəyiblər". Bizim susqun reaksiyamızdan sonra aralarından orta yaşlı bir nəfər sanki güllə kimi açıldı:" Ayə, mənim nəyimə lazım kim mənimsədi, niyə mənimsədi. Mən "işverən" adam olsaydım, deyərdim ki, niyə Hesablama Palatasının rayonda apardığı üç günlük yoxlamalar Xızıda kütləvi pulyığmalarla müşayiət olundu? Bu 3 gündə büdcə təşkilatlarından adambaşına ortalama 50-100 manat yığılıb. Maaşı 200 manat olan mən bədbəxt bu pulu nə təhər verim? A başuva dönüm sənin, başçı öz borclarını bağlamaq üçün başqa ad altında "yığır". Müavini Azər Hesablama Palatasının yoxlamalarından narahat olan idarə müdirlərinə deyirmiş ki, qorxub-eləməyin, mən özüm çağırtdırmışam, 3 günə büdcəni bağlatdırıram. Bundan mənə nə"?..
Müşfiqin kəndinə süpürgə çəkiblər...
Sayadlar kəndindən əsər-əlamət yoxdu. Sovet dövründən bəri burada bir ailə yaşayıb. Çox-çox sonralar Azər Əlizadə yaxın adamı Firudini bu yerlərdə məskunlaşdırıb. Öz keçi fermasını isə ona tapşırıb. Sən demə, əvvəlki icra başçılarının dövründə Azər Əlizadə Sayadlar kəndində hətta məscid tikdirmək fikrində olub. Bu məqsədlə müvafiq məkan da gözaltı edibmiş. Lakin naməlum səbəblərdən onun təşəbbüsünə "dobro" verən olmayıb. Bəlkə də imkan düşən kimi bunun acığını son 50 ildə kəndin işığını yandıran yeganə yerli sakindən çıxıb. Məlumat üçün bildirək ki, yüksək dövlət orqanlarında çalışan yaxşı insanların tapşırığı ilə Müşfiqin kəndində sanki onun ruhunu işıqlandıran nurlu qocanın evi təmir olunmuşdu. Sən demə, ömrünü-gününu doğma yurdun qarış-qarış torpağında-daşında keçirmiş bu dağlar oğlu kimlərinsə naqis əməllərinə mane olurmuş. Günlərin birində Azər Əlizadənin səyləri ilə ev insafsızcasına söküldü. Müşfiqin son yadigarı olan bir ocaq da bərəkətli təndiri ilə bərabər belə dağıdıldı. Xızının icra başçısı Xəzər Aslanov isə, məsələdən xəbərsiz kimi, özünü görməzliyə qoydu. İndi o evdən nişanə belə yoxdur. Azər Əlizadə "komoxozun" işçilərinə evin bünövrəsini də süpürtdürüb. Uçurma əməliyyatına şəxsən rəhbərlik edib. Şübhələnib ki, bu ağsaqqal birdən nəsə edər, hansısa məsələlərə şahidlik edər, kiməsə xəbər verə bilər...
Keçi pendiri "əməliyyatı"
Müşfiq ocağının yüz addımlığında baş verən bu söküntüdə Azər Əlizadənin xüsusi canfəşanlığı adamı heyrətə gətirir. Dağıntı təxminən 20-30 metr aralıda yerləşən keçi fermasından yan keçib. Xızılılar ferma sahibini daha çox keçi saxlayan Firudin kimi tanıyır. Bildirilir ki, icra başçısının müavini Azər Əlizadənin etibarlı adamıdır. Həftəbaşı Azər Əlizadənin 29 AA 003 nömrəli "Toyota Camry" markalı xidməti maşınını burada görmək olar. Əlbəttə, Firudin kişi icra başçısı müavininin buralara tez-tez gəlişinin səbəblərini onun keçi pendiri həvəskarı olmasıyla əlaqələndirə bilər. Lakin, yerli camaatın dediyinə görə. bu fermaya uzun illərdir ki, Bakı və Sumqayıtdan gələn "saqqallılar" Azər Əlizadənin təşkilatçılığı ilə yığışır. Bu barədə əlaqədar orqanlarda məlumat olmamış olmaz.Odur ki, Azər müəllimi pendir "xəstəsi" bilməyin. Onun bura daim gəlib-getməyinə səbəb radikal dini təbliğatların sual doğurduğu məqamların axtarışına çıxmağa rəvac verir. Hər halda, bu məsələ müəyyən həqiqətləri ortaya qoya bilər. Belə çıxır ki, Sayadlar kəndindəki yeganə evin sökülməsi radikal dinçilərin keçirdiyi həftəlik "cümə məsləhətləşmələr" ilə əlaqədar olub. Necə olmasa, gözdən uzaq, könüldən iraq yerdi, özü də keçi fermasında qələbəlik kimsəni şübhəyə salmaz. Bir qonşuda yaşayan qoca qalır. Onun da evini "qəmlo" demiş, o söz... Məlumata görə, keçi pendiri almaq bəhanəsi ilə Firudin adlı şəxsin fermasına hər həftə ətraf bölgələrdən eyni gündə, eyni saatlarda xeyli adam toplaşır. Bəzən elə olur ki, fermanın həndəvərində maşın əlindən tərpənmək olmur. Bakı küçələrindən də betər tıxac yaranır. Kim gəlir, nə üçün və kimlərlə gəlir-bu barədə məlumat yoxdur. Yəqin ki, həmin şəxslərin kimliyini "cümə məsləhətləşmələr"inə ev sahibliyi edən şəxs bilər. Hər halda neçə illərdir ki, bu adamlar "qrafik" üzrə ərazidə yığışıb havayı yerə elə-belə müzakirələr aparmır. Nə müzakirələrdi belə? Bu sualın cavabını yaxşı olar ki, əlaqədar orqanlar versin. Azər Əlizadənin, isə radikal dini cərəyanlarla əlaqəsinin olub-olmaması araşdırılsın. Əlbəttə, biz də inanmaq istərdik ki, Xızı rayon icra başçısının müavini Azər Əlizadə həftəbaşı öz qonaqlarına keçi pendirinin ünlü faydaları barədə mühazirələr oxumur. Lakin unutmaq lazım deyil ki, keçi pendiri çox yeyildikdə qarın ağrısına səbəb olar...
