Ermənilərin guya blokadada olmalarına dair saxta iddiaları, yalanları da bir işə yaramadı. Məsələ ondadır ki, separatçı rejimin rəhbərləri kimlərinsə diqtəsilə belə rəy yaratmağa çalışırdılar. Azərbaycanın Laçın yoluna tam nəzarət etməsi, keçid məntəqəsi yaratmasından sonra terrorçular Qarabağ ərazisində əli-qolu bağlanmış duruma düşüblər.
Ermənilərin guya blokadada qalması haqda uydurmalarını Azərbaycan tamamilə ifşa etdi. Üstəlik, belə təklif verdi ki, Qarabağda yaşayan ermənilərin ərzaq və humanitar yardım tədarükü üçün Ağdam yolundan istifadə edilməsi tam məntiqlidir.
Azərbaycanın Qarabağda yaşayan ermənilərin ərzaq və humanitar yardım tədarükü üçün Ağdam yolundan istifadə etməsi ilə bağlı təklifi Brüssel görüşündə Avropa İttifaqı Şurasının Prezidenti Şarl Mişel tərəfindən də dəstəkləndi.
Ancaq ermənilər bir daha sübut edirlər ki, onların məqsədi süni blokada görüntüsünü yaratmaqdır, bu işdə alət kimi istifadə olunurlar.
Ermənilərin bu yoldan istifadə etməkdən imtina etməsi siyasi spekulasiyadır və rasist yanaşmanın göstəricisidir. Azərbaycandan gətiriləcək qida məhsullarının keyfiyyəti Ermənistan ərazisindən gələn məhsulların keyfiyyətindən qat-qat yaxşı olacaq. Ermənilərin heç bir normal arqumenti yoxdur. Qarabağda yaşayan ermənilərə ərzaq tədarükünün Ağdam yolu ilə həyata keçirilməsi logistik baxımdan daha sərfəlidir. Belə ki, Ağdam yolu daha qısadır və daşınma daha ucuz başa gəlir. Ermənistanda ƏDV-si ödənilmiş mallar nə üçün humanitar yardım adı altında Azərbaycan ərazisinə gətirilməlidir və Ermənistan bundan niyə qazanmalıdır?
Bu arada Paşinyan da Ağdam yolu ilə bağlı danışıb. “Mən Ağdamdan keçməklə Qarabağ ermənilərinə humanitar dəhlizin verilməsi məsələsini müzakirə etməmişəm, çünki belə bir məsələni müzakirə etməyə nə ehtiyacım, nə də mandatım”.
Musavat.com erməni mediasına istinadən xəbər verir ki, bu barədə Ermənistanın Baş naziri Nikol Paşinyan iyulun 25-də keçirdiyi mətbuat konfransında danışıb. Paşinyanın sözlərinə görə, Avropa İttifaqı Şurasının rəhbəri Şarl Mişelin Ağdamdan keçməklə dəhliz verilməsi ilə bağlı bəyanatı onun üçün sürpriz olmayıb. Lakin Paşinyan bildirib ki, beynəlxalq birliyin dəhliz məsələsində verdiyi reaksiya Ermənistan üçün qaneedici sayılmır.
Bu arada Beynəlxalq Qızıl Xaç Komitəsinin bölgədə humanitar vəziyyətlə bağlı iyulun 25-də səsləndirdiyi bəyanata XİN-dən reaksiya verilib. “Beynəlxalq Qızıl Xaç Komitəsinin (BQXK) humanitar mandatına riayət olunması və ondan siyasi məqsədlər üçün sui-istifadə edilməməsi vacibdir”.
Bu fikirlər Beynəlxalq Qızıl Xaç Komitəsinin bölgədə humanitar vəziyyətlə bağlı iyulun 25-də səsləndirdiyi bəyanata dair Azərbaycan XİN-in şərhində əksini tapıb.
“Beynəlxalq Qızıl Xaç Komitəsinin (BQXK) bölgədə humanitar vəziyyət və BQXK-nın fəaliyyəti ilə bağlı 25 iyul tarixində verdiyi bəyanat tərəfimizdən qeydə alınıb.
Məlum olduğu kimi, cari ilin 15 iyun tarixində Laçın sərhəd-buraxılış məntəqəsinin atəşə tutulması, iyul ayında erməni əsilli sürücülərin Beynəlxalq Qızıl Xaç Komitəsinə məxsus nəqliyyat vasitələrində qaçaqmalçılıq məhsullarını Azərbaycana gətirmək səyləri Ermənistan tərəfinin Azərbaycanın ərazi bütövlüyü və suverenliyinə qarşı növbəti qeyri-qanuni fəaliyyət, eləcə də sərhəd-keçid məntəqəsinin fəaliyyətinə maneçilik kimi qiymətləndirilərək, bu kimi pozucu tədbirlərə son qoyulması tərəfimizdən tələb olunub.
Ermənistan tərəfindən aparılan qeyri-qanuni fəaliyyət cəhdlərinin qarşısını almaqla yanaşı, Azərbaycan tərəfi BQXK ilə vacib əməkdaşlığı davam etdirib. Azərbaycan tərəfinin BQXK ilə apardığı müzakirələrdən sonra, zəruri qaydalara riayət etməklə, BQXK vasitəsilə erməni sakinlərin tibbi məqsədlər üçün sərhəd məntəqəsindən keçidinin davam etməsinə şərait yaradılıb və gün ərzində onlarla erməni sakin hər iki istiqamətdə sərhəd məntəqəsindən keçib.
Daha böyük miqdarda dərman preparatları və yüklərin daşınması və tədarükü üçün Azərbaycan tərəfindən Ağdam-Xankəndi yolundan istifadə etməklə yardım təklif edilib. Lakin buna baxmayaraq, təəssüflər olsun ki, erməni tərəfi təkidlə bu yoldan imtina edilir.
Bununla yanaşı, erməni sakinlərin tibbi məqsədlər üçün Laçın sərhəd buraxılış məntəqəsindən BQXK vasitəsilə keçidinin daha da asanlaşdırılması məqsədilə BQXK-nın həkiminin əraziyə getməsi ilə bağlı razılıq əldə olunmasına baxmayaraq, yerində bundan imtina olunması da təəssüf doğurur.
Erməni tərəfinin Azərbaycan tərəfindən atılan addımlara və dəstək niyyətinə, o cümlədən BQXK tərəfindən sözügedən bəyanatda da qeyd edildiyi kimi, Ağdam-Xankəndi və digər alternativ yollardan istifadə edilməsi təkliflərinə qarşı çıxması bölgədə “gərgin humanitar vəziyyət” iddialarının siyasi manipulyasiya və təzyiq vasitəsi olduğunu bir daha sübut edir" - bəyanatda qeyd olunur. Ermənilər əgər normal ərzaq təminatı, gediş-gəliş üçün yol istəyirlərsə, Ağdam-Əsgəran yolu ən uyğun variantdır. Bundan imtina edirlərsə, deməli, onları buna vadar edən var. Bu iş necə çözülməlidir? Reinteqrasiya üçün bundan yaxşı variant da ola bilməz. Bəs bunu konkret hansı xarici güc istəmir?
DİA.AZ-ın məlumatına görə, deputat, Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev “Yeni Müsavat”a deyib ki, Beynəlxalq Qırmızı Xaç Komitəsinin daşıdığı yüklər arasında son vaxtlar müxtəlif qaçaqmalçılıq faktları aşkarlanıb. Ona görə də yoxlamalar daha da gücləndirilib: “Orada humanitar yardım adı ilə müxtəlif qanunazidd hərəkətlərin olduğu bir daha təsdiqlənib. Buna görə də belə halların qarşısını almaq məqsədilə yoxlamalar daha da güclənib. Lakin alternativ olaraq Azərbaycan tərəfi bütün humanist addımları ataraq humanitar yük üçün Bərdədən Beynəlxalq Qırmızı Xaç Komitəsinin rolu ilə daşınmaların təşkil edilməsini, eyni zamanda Ağdam-Xankəndi yolu ilə məhz yüklərin daşınmasını təklif edib. Təbii ki, sülhməramlı qüvvələrin məhz təyyarələr vasitəsilə guya humanitar yüklərin daşınması ilə bağlı müxtəlif məlumatlar yayılır. Burada əsas məram, məqsəd odur ki, bütün dünyaya car çəksinlər ki, Azərbaycan məhz humanitar yüklərin qarşısını alır. Lakin bu, absurd bir məsələdir. İstər xəstələrlə bağlı, istər humanitar daşımalarla bağlı, istərsə də yüklərlə bağlı birmənalı şəkildə məhz Azərbaycan tərəfi daim onlara dəstək olub. Sadəcə olaraq, məhz orada olan erməni separatçıları cidd-cəhdlə çalışırlar ki, orada yaşayan erməni icmasına bu və ya digər vasitə ilə təsir etsinlər. Onlar öz siyasi məqsədlərini güdürlər. Çox təəssüf ki, burada onların havadarları çox ciddi rol oynayır. Yəni məlumdur ki, Ağdam-Xankəndi yolu ilə istənilən yükün daşınması mümkündür. Lakin necə ola bilər ki, özləri-özlərini blokadada saxlamağa çalışırlar? Deməli, bunların əsas məramı, məqsədi siyasi məqsəddir və dünyaya car çəkmək istəyirlər ki, Azərbaycan tərəfi onları guya blokadada saxlayır. Başqa məqsədləri yoxdur”.
Arzu Nağıyev xatırladıb ki, Ermənistan Azərbaycanın ərazi bütövlüyünü tanıyır və Brüsseldə bu, bir daha rəsmi şəkildə bəyan olunub: “İrəvan həmçinin ölkəmizin daxili işlərinə qarışmadığını bəyan edir. Azərbaycanın ərazisində hansısa kommunikasiyaların istiqamətinin müəyyən edilməsi, səmtinin dəyişdirilməsi rəsmi Bakının müstəsna qərarlarıdır və heç kim buna müdaxilə edə bilməz. O cümlədən də, Ermənistanın Azərbaycanın nəqliyyat-kommunikasiya xətlərində yerdəyişmələr aparmasına, öz vətəndaşlarının kommunikasiya xətlərinə çıxış imkanlarının müəyyənləşməsinə qarışması qeyri-mümkündür. Bu baxımdan, Laçın-Xankəndi yoluna alternativ olan Ağdam yolunun açılması təşəbbüsü Azərbaycanın öz daxili işidir və kimin razılaşıb-razılaşmamasından asılı olmayaraq, qərarları Azərbaycan dövləti verir”.
Deputat xüsusi olaraq diqqətə çatdırıb ki, Qarabağda yaşayan ermənilərin ərzaq və humanitar yardım tədarükü üçün Ağdam yolunun təklif olunmasının əsas məqsədi bölgədə daha güclü təhlükəsizlik və etimad mühiti yaratmağa, ermənilərin daha asan və rahat təminatlarla təchiz edilməsinə xidmət edir: “Ermənistanın Azərbaycanın bu təklifi ilə razılaşmaqdan başqa çıxış yolu yoxdur. Hazırda sülh gündəliyi ilə bağlı həssas bir dönəmdə Ermənistan hakimiyyətinin münasibətləri normal saxlamasında marağı var. İstənilən gərginlik bu ölkə üçün daha ağır nəticələrə səbəb ola bilər ki, bu da hərbi vəziyyətlə yanaşı, iqtisadi-sosial durumu da ağırlaşdırmış olardı. Eyni zamanda Xankəndidə olan erməni separatçılar da bu cür cılız hərəkətlərlə özlərinin sonunu daha da yaxınlaşdırır, antiterror əməliyyatlarını labüd edirlər”.
