Ədliyyə Nazirliyinin Tibb Baş İdarəsinin sabiq rəisi general-mayor Rəfail Mehdiyevin fəaliyyətinin yoxlanılması zamanı ciddi korrupsiya faktları üzə çıxıb.
Gununsesi.info-nun adıçəkilən nazirlikdəki mənbəyə istinadən verdiyi xəbərə görə, yeni ədliyyə naziri Fərid Əhmədovun bir müddət əvvəl işdən çıxardığı Rəfail Mehdiyevlə bağlı daxili yoxlamalar aparılıb.
Bildirilir ki, Rəfail Mehdiyevin idarə rəisi olduğu bir neçə il ərzində təcridxana və cəzaçəkmə müəssisələrindəki məhbusların tibbi təminatı ilə bağlı milyonlarla vəsait yoxa çıxıb.
Xüsusilə, məhkumların müalicəsi üçün dərman pereparatlarının böyük bir faizi Bakıda ayrı-ayrı apteklərdə satılıb.
Bundan başqa cəzaçəkmə müəssisələrindəki tibb məntəqələrinə aid avadanlıqların yenilənməsinə dair pullar ayrılsa da bunlar yanlız sənəd üzərində olub.
Həmçinin, məlum olub ki, cəzaçəkmə müəssisələrinə sağlam şəkildə düşən şəxslər sonrakı illərdə Hepatit və vərəm xəstəliklərinə yoluxub.
Ancaq nazirin Rəafel Mehdiyev barəsində üzə çıxan bu faktları Baş Prokurorluq Yanında Korrupsiyaya Qarşı Mübarizə Baş İdarəsinə təqdim edib-etməyəcəyi bəlli deyil.
Mənbəmiz bu araşdırmaların hələ də davam etdiyini deyir.
Məsələ ilə bağlı Ədliyyə Nazirliyinin mövqeyini öyrənmək cəhdlərimiz baş tutmadı.
Mövzuya qayıdacağıq.
