“Azərbaycan və Ermənistan arasında sülh sazişinin mətni razılaşdırılsa da, hələlik onun imzalanması mümkün görünmür. Ehtimal edirəm ki, 2025-ci ilin sonuna qədər sülh müqaviləsi imzalanmayacaq, çünki bunun üçün real şərtlər yaranmayıb”.

Bunu “Reytinq” qəzetinə açıqlamasında siyasi şərhçi Oqtay Qasımov Azərbaycan və Ermənistan arasında mümkün sülh sazişinin imzalanması imkanlarını şərh edərkən deyib.

O. Qasımov qeyd edib ki, indiyə qədər Ermənistan Azərbaycanın iki tələbini yerinə yetirməyib. Məhz bu səbəbdən də sülh müqaviləsinin imzalanması hələlik real görünmür:

“Ermənistan konstitusiyasının dəyişdirilməsi və ATƏT-in Minsk qrupunun buraxılmasına dair bəyanatın verilməsi şərti yerinə yetirilməyib. Sülh sazişi o zaman imzalanacaq ki, Ermənistanda referendum keçirib, ölkə konstitusiyasında Azərbaycan və Türkiyəyə qarşı ərazi iddialarına son qoyulsun. Yəni bu zaman sülh sazişinin imzalanmasına şərait yaranacaq”.

Qasımov yuxarıda söylədiyi arqumentləri əsas gətirərək bildirib ki, tərəflərin sülh sazişi imzalaması üçün azı bir il vaxt lazımdır. Onun fikrincə, bu ilin sonuna qədər razılaşdırılan sülh sazişi paraflana bilər.

Müsahibimiz əlavə edib ki, sülh sazişinin imzalanmasına əsas maneə Ermənistan konstitusiyasında Azərbaycana qarşı ərazi iddialarının olmasıdır. Yəni Ermənistan bununla münasibətlərin qaydaya düşməsinə mane olur.

Qasımov sonda əlavə edib ki, indi hər şey Ermənistanda keçiriləcək parlament seçkiləri və onun nəticələrindən asılı olacaq.