Azərbaycanda qaz təchizatı sektorunda qiymətlərin tənzimlənməsi qaydası müəyyənləşir.

Bu, Milli Məclisin Təbii ehtiyatlar, energetika və ekologiya komitəsinin bu gün keçirilən iclasında müzakirəyə çıxarılan “Qaz təchizatı haqqında” yeni qanun layihəsində öz əksini tapıb. Layihəyə əsasən, qaz təchizatı sektorunda tənzimlənən qiymətlər (tariflər) tənzimləyici tərəfindən müəyyən ediləcək və onun rəsmi internet saytında dərc olunacaq.

Eyni zamanda, elektrik enerjisi ilə də əlaqədar sabit aylıq tarif tətbiq ediləcək. Bu, Milli Məclisin Təbii ehtiyatlar, energetika və ekologiya komitəsinin bu gün keçirilən iclasında müzakirəyə çıxarılan “Elektroenergetika haqqında” Qanuna təklif edilən dəyişiklikdə əksini tapıb.

Layihəyə əsasən, sabit tarif elektrik enerjisinin istehlak səviyyəsindən asılı olmayan sabit xarakterli xərclərin tənzimləyici tərəfindən müəyyənləşdirilən hissəsinin qarşılanması məqsədilə hər bir istehlakçı üzrə tətbiq olunan aylıq tarif elementidir.

Qeyd edilib ki, qanun layihəsi elektroenergetika sektorunda tarif tənzimləmələri istiqamətində sabit tarifin tətbiqi məqsədilə hazırlanıb.

Məsələ ilə bağlı iqtisadçı-ekspert Natiq Cəfərli “Cebheinfo.az”-a bildirib ki, limitlərin ləğvi çoxdan müzakirə olunur:

“Əgər limitlər tamamilə ləğv olunsa, bu pozitivdir. Ancaq belə görünür ki, limitlərin ləğvi paralel olaraq qiymətlərin artımı ilə də müşayiət olunacaq. Çünki təchizatçılar, təbii inhisarçılar dəfələlərlə publik çıxışlarında, onların nümayəndələri maya dəyərinin yüksək olması ilə bağlı açıqlamlar vermişdilər.

Büdcədən subsidiyalar da azalıb. Yəqin tariflərin tənzimlənməsi belə olacaq ki, limitləri ləğv edib qiymətləri artıra bilərlər və bu da vətəndaşların, biznes sektorunun üzərinə böyük yük düşəcək”.