Naxçıvan Muxtar Respublikası (MR), Şərur şəhər sakini Ələsgərov Azər Fətulla oğlu tərəfindən “Hürriyyət”in redaksiyasına şikayət məktubu daxil olub. Şikayətçi A.Ələsgərov Naxçıvan gömrüyündəki özbaşınalıqlardan şikayətçidir:
“Mən, Ələsgərov Azər Fətulla oğlu, yazaraq bildirirəm ki, 3-cü qrup ömürlük əliləm. Ailəliyəm, 3 övladım var.
2 il bundan əvvələdək Naxçıvan-Bakı-İran reysi ilə Bakıya gəlib-gedir, hər dəfə nələrsə gətirib satır, ailəmi dolandırırdım. Günlərin bir günü gömrükdən keçərkən kamera arxasında oturan Müslüm Məmmədov adlı əməkdaş mənimlə söhbət etmək istədiyini bildirdi. Həmin şəxs aparatdan keçən malların hamısına nəzarət edən biri idi və Biləsuvar gömrüyündə işləyirdi.
Xırdalan şəhərində ona məxsus obyektdə görüşdük və mənə iş təklif etdi. Dedi ki, “hər dəfə fikir verirəm, pul qazanmaq istəyən oğlansan, gəl bir yerdə işləyək. Mənim də sənin kimi adamım olsa, yaxşı qazanarıq”. Onu da əlavə etdi ki, yalnız mən işdə olan vaxt malları gətirməlisən.
Baxdım ki, pis təklif deyil, qəbul etdim. Çünki 2 blok siqaret gətirə bilmirsən, adi halda onun bir blokuna icazə verir, qalanını alıb anbara atırdılar. Bir sözlə, təklif mənə sərf edirdi.
Bu razılaşmadan sonra hər gedişdə 15-20 blok siqaret gətirə bilirdim. Siqaretləri satırdım, həm o qazanırdı, həm də mən. Bir blok siqaretdə 15-20 manat pul qalırdı. “Reddbull”, yağ və sair məhsulları da gətirib satırdım. Həftədə ən azı 2 dəfə gedib-gəlirdim.
Bir gün düşündüm ki, satdığım məhsullardan gələn gəlirin 80 faizini ona vermək mənə xeyr etmir. Özü ilə danışıb, fikrimi bildirdim. Artıq 7-8 ay idi ki, bir yerdə işləyirdik. Hər reysdə ümumilikdə 800-1000 manat qazanc olurdu. Sözümü dedim, amma razılaşdığını bilmədim.
Yenə günlərin birində atamla birgə gömrüyü keçirdik ki, bizi yaxaladılar. Cəmi 10 min manatlıq mal gətirirdim. Şəkillərimizi çəkdilər. Bu vaxt Müslümün özü kompüterin arxasında idi. Üzünə baxdım, başını yellədi. Telefonum əlimdə idi, yazdım ki, bəs nə olacaq?..
Bu arada, siqareti Gömrük depoya göndərmədi. Digər malları isə geri qayıdanda götürə biləcəyimi dedilər. Siqaret üçün isə cinayət işi açılacağını bildirdilər.
Mən Müslüm Məmmədovla işlədiyimə görə arxayın idim ki, o, problemi həll edəcək. Lakin, gördüm ki, bu məsələyə qarışmaq istəmir. Bu səbəbdən, rəislə görüşmək istədiyimi bildirdim. Bu vaxt Müslüm mənə mesaj yazdı ki, “balalarına qurban olum, məni satma, sənə kömək edəcəm. 5 qat onun əvəzini qazanmağına kömək edəcəm”. Mən də inanıb, susdum.
Lakin o, mənə kömək etmədi. İş məhkəməyə getdi. 1 İl ərzində dəfələrlə bu adamla əlaqə saxladım. Nə cavab verdi, nə də borcun verilməsinə kömək etdi. Əlimdə sübutlar çoxdur...
Sonra bir nəfərin əli ilə “Qaçaqmal”ın rəisi Mahir Cəlilovla tanış oldum. İşi Gömrük Komistəsindən Rüstəm bəy adlı şəxsə göndərdilər. Rüstəm bəy “Qaçaqmal”ın nəzarət rəisi idi. Onunla danışdım, çıxanda bildirdi ki, korrupsiyadan sənə zəng gələcək, əlində olan bütün materialları yığ, həmin şəxsə təqdim et.
Korrupsiyaya qarşı Baş Mübarizə İdarəsindən Emin bəy adlı adamla görüşdüm, bütün sübutları ona verdim. Mənə dedi ki, sənə zəng vuracam, gəlib imza atarsan, istintaq başlayar.
Zəng gəldi, getdim. Amma bilmədim ki, bütün sübutları hansısa marağa görə heçə sayarlar. Müslümün öz kartına ödənişlər etmişəm, amma digər sübutlar olduğu halda işə baxmadılar, xitam verildi. Yəni adını çəkdiyim qurumlar öz aralarında “məhkəmə edib”, xitam verilib.
Müslüm Məmmədov hazırda pensiyadadır və ona heç bir zərər dəyməyib. 10 min manatdan artıq borc isə mənim çiyinlərimdə qalıb. Bir-birinin ayağını basmadılar. Onu qoruyub, pensiyaya çıxardılar.
Bu gün bir daha sizin qəzet vasitəsilə rəsmi qurumlardan kömək istəyirəm. Xahiş edirəm ki, bu işə yenidən baxılsın, ciddi tədbir görülsün. 2 ildir borc-xərc paylasam da, hələ bitirə bilmirəm.
Son olaraq onu da deyim ki, bütün gömrük bölmələri eyni gündədir”.
