Uzun müddətdir ki, media sahəsində çalışır. Hazırda ARB televiziyasında həftə sonları tamaşaçıları səhər proqramından salamlayır. Deyir ki, tamaşaçılarla qələbə xəbərlərini paylaşmağın xüsusi bir özəlliyi var. Mətbuata gəldiyi gündən isə ən böyük istəyi məhz işğal altında olan torpaqlarımızın azad olunma sevincini tamaşaçılarla bölüşməkdən ibarət olduğunu qeyd edir. "Moderator.az" saytının qonağı aparıcı Vüsalə Kərimovadır.
- 30 ildir ki, torpaqlarımızın azad olunacağı günü gözləyirik. Qalib ölkənin vətəndaşı olaraq hansı hissləri keçirirsiniz?
- Qürür hissi keçirirəm. Rəşadətli ordumuzla, ölkəmizlə, ali baş komadanımız İlham Əliyevlə fəxr edirəm. Bu gün başımız ucadır. 27 il gözləməyimizə baxmayarq, qısa müddətdə torpaqlarımızın çox hissəsi işğaldan azad olunub.
- Torpaqlarımızın işğaldan azad olunmasını necə təsəvvür edirdiniz?
- Hər zaman Qarabağı işğaldan azad etmək üçün bir ümidimiz olsa da, ancaq belə qısa bir müddətdə o ərazilərə qovuşacağımızı təsəvvür etmirdim. Hər yeni gün işğal altında olan bir kəndimizin azadlıq xəbərini gözləyirik. Torpaqlarımızın tam işğaldan azad olunma xəbərini birlikdə yaşayacağımızı ümid edirəm.
-Belə bir dönəmdə media nümayəndəsi olaraq tamaşaçıları necə istiqamətləndirirsiniz və doğru məlumatı necə əldə edirsiniz?
- İstər ARB televiziyasında aparıcısı olduğum səhər verilişində, istərsə də sosial şəbəkələrdəki səhifələrimdə hər zaman olduğu kimi vətənpərvərlik hissimi ortaya qoyuram və ölkəmin həqiqətlərini dünya ictimaiyyətinə çatırılması üçün əlimdən gələn nə varsa onu etməyə çalışıram. Bu istiqamətdə gənclərimizin rolu böyükdür. Bir neçə dil bilən gənclərimiz səslərini daha böyük auditoriyadan çatdıra bilirlər. Gənclərimizin çağırışına bacardığım qədər qoşulmağa çalışıram. Hazırda cəbhədə ordumuz döyüşür, analar oğullarının yolunu gözləyir. O analara ürək dirək vermək əlimizdən gələni etmək, həm vətəndaşlıq, həm də peşə borcumuzdur. Çalışıram ki, bunun öhdəsindən gəlim.
23 ildir ki, media sahəsində çalışıram. Bu illər ərzində aldığım informasiyanın doğruluğunu dəqiqləşdirmək üçün dövlət qurumlarına istinad etmişəm. Xəbərin doğruluğuna əmin deyiləmsə bu barədə heç nə paylaşmamışam və məlumat verməmişəm. Ən doğru xəbərin ünvanı onun bir başa mənsub olduğu yerdir. Ona görə də hər hansı bir məlumat əldə edərkən mütləq şəkildə onu dəqiqləşdirmək lazımdır. Əgər dəqiqləşdirmədən ictimaiyyətə xəbər çatdırırqsa onun məsuliyyətini də dərk etməliyik. Bizi izləyən ailələr, əsgər anları var ki, onların övladları ön cəbhədə döyüşürülər, o insanlara yanlış informasiya verib gümansız etmək olmaz. Belə dönəmdə daha çox Müdafiə Nazirliyinin məlumatlarına üstünlük verirəm. Müdafiə Nazirliyi çox operativ şəkildə çalışır, istər cəbhədən dron vasitəsi ilə çəkilən video görüntülərin yayılması, döyüş meydanında baş verən xəbərlərin yayılmasında operativ çalışmaları örnəkdir. Nəinki xəbər paylaşır, bununla yanaşı çəkilişlər edir, işğaldan azad olmuş ərazilərdən görüntülər paylaşırlar. Biz də onların vasitəsi ilə bu görüntüləri cəmiyyətə çatdırmağa çalışırıq.
- Döyüş nəinki cəbhədə eyni zamanda dinc sakinlərimiz də düşmən hücumuna məruz qalır. Belə ki, Gəncədə, Tərtərdə, Bərdədə dinc sakinləri hədəfə alınır. Cəbhə bölgəsində yerləşən ərazilərimizdə terror hadisələri yaşandığı halda dünya buna laqeyid yanaşır. Bu terroru dünyaya böyük auditoriyaya çatdırmaq üçün sizcə daha nələr etməliyik?
- Nəinki işğalda olan torpaqlarımız, eyni zamanda Gəncədə, Bərdədə, Tərtərdə ermənilər tərəfindən törədilən terror hadisələrini dünya ictimaiyyətinin diqqətinə çatdırmaq üçün çox işlər görürük. İstər Azərbaycanın daxilində, istərsə də ölkə hüdudlarından kənarda yaşayan soydaşlarımız da bu istiqmətdə çalışırlar. Demək olmaz ki, biz heç nə etmirik. Sadəcə bizim gördüyümüz bu işləri dünya ölkələri biganə qalır. Hansı ki, onlar ermənilərin havadarıdırlar və hadisələri görməzdən gəlirlər. Haqsızlığı görməmək üçün kor olmaq lazımdır. Bunu dünya ictimaiyyəti görür, sadəcə susur. Ali baş komadanımızın da qeyd etdiyi kimi dünya susursa belə biz susmayacağıq. Onlar nə qədər sussalar belə biz öz səsimizi dünyaya çatdıracağıq. Gəncə hadisələri zamanı sosial şəbəkələrdə "Pray of Ganja" həştəqi yaradıldı və iki saat ərzində bu həştəq trendə düşdü. Bunun özü sübütdur ki, biz ayağa qalxanda sözümüzü deyə bilirik.
- Tanınmış simaların sözünə tamaşaçı daha çox inanır. Bu xüsusda məhz sizlərin verdiyi informasiya daha böyük kütləyə çatır. Bir aparıcı olaraq bunun məsuliyyətini dərk edirsinizmi?
- Uzun müddətdir ki, bu sahədə çalışıram və hər zaman da dediyim sözün məsuliyyətini hiss etmişəm. Mahiyyətini bilmədiyim, dərk etmədiyim ifadəni işlətmirəm. Əlbəttə ki, efirdə olmağın məsuliyyətini dərk edirəm. İşlətdiyi sözün məsuliyyətini dərk etməyən həmkarlarımı qınayıram. Hesab edirəm ki, insan xüsusən də bu dönəmdə hər hansı məlumatı çatdırırsa, informasiya verirsə o haqda məlumatlı olmalıdır. Əgər məlumatlı deyilsinizsə o haqda danışmasanız yaxşıdır. Bir məsələ haqqında danışmaq istəyirsinizsə ilk olaraq onu araşdırın. Sizi dinləyən milyonlarla insan var.
- Vüsalə xanım, ikinci düşmən hesab edilən koronavirusun yayılması hansı işlərinizə əngəl törətdi və hansı layihələrinizi yarımçıq qoydu?
- 2020-ci il başlayanda "Covid 19" virusu nəinki bizim, dünya ölkələrinin bütün iş prinsipini dəyişdi. Amma bir məsəl var, deyir elnən gələn bəla toy bayramdır. Bilirsiniz ki, efirdəki verilişlərimizlə yanaşı bizim əlavə qazancımız olan tədbilər, el şənlikləri, məclislərin idarə edilməsində iştirak edirdik. Bu işlər dayanıb. İşlərin dayanması bizim əlavə gəlirlərimizin dayanması deməkdir. Əsas olan can sağlığıdır. Əgər canımız sağlam olarsa hər işin öhdəsindən gələrik. İndi həssas məqamdır. Biz bir-birimizi qorumalıyıq. Hazırda Azərbaycan tək erməni ilə deyil, həm də pandemiya ilə savaşır. Özümüzü xəstəlikdən qorumasaq həkimlərimiz iki hissəyə ayrılmalı olacaq. Tibb işçilərimizin bir hissəsi koronavirusa yoluxmuş insanların müalicəsi, digər hissəsi cəbhədəki əsgərlərimizi müayinə etmək üçün səfərbər olacaq. Bu gün vətən savaşı aparırıqsa ordumuzun arxasında sağlam lazımıq. Arxa cəbhədə dayanan xalq sağlam olmalıdır. Virusdan özümüzü qoruyarıqsa eyni zamanda vətənimizi qorumuş olarıq. Sağlam bədəndə sağlam ruh olar. Təsəvür edin ki, özmüzü qorumasaq ön cəbhədə olan əsgərin fikri ailəsinin yanında olacaq. Əsgərlərimizin sağlam ruhla döyüşməsi üçün özümüzü qorumalıyıq ki, onların da gözləri arxada qalmasın.
- 2020-ci ilin ilk rübündə bu ilin heç də uğur gətirmədiyini və pis hadisələrlə yadda qaldığını söyləyirdik. Artıq ilin sonuna yaxınlaşırıq. Bu ili necə dəyərləndirirsiniz?
- 2020-ci ilə başlayandan ancaq neqativ hadisələr bizi təqib edirdi. 2020-ci ilin niyə həyatımıza girdiyi üçün giley edirdik. Hətta yarızarafata salıb gəldiyi kimi çıxıb getməsini arzu edirdiksə indi vəziyyət bir qədər fərqlidir. İlin əvvəli düşərsiz olsa da sonu yaddaqalan oldu. 2020-ci ili heç vaxt unutmayacağıq. 30 ildir biz bu günün həsrətini çəkirdik. 2020-ci ilə pis deməyə haqqımız çatmır, buna ixtiyarımız yoxdur.
