Azərbaycanda “Avroviziya-2025” mahnı müsabiqəsinin nəticəsi geniş rezonans doğurub. Bildirilir ki, bu il ölkəmizi səhnədə təmsil edən “Mamagama” qrupu hər kəsi məyus edib. Onların uğursuzluğu isə Azərbaycan seçimlərində münsif kürsüsündə əyləşənlərlə əlaqələndirilib. İddia olunur ki, heyətdə doğru adlar yer alsaydı, daha uğurlu çıxışlar mümkün olardı. Çünki Azərbaycan artıq üçüncü ildir, ard-arda bu yarışın final mərhələsinə yüksələ bilmir. Lakin maraqlıdır ki, sosial şəbəkələrdə münsiflər heyəti tənqid olunsa da, onlarla bağlı hər hansı məlumat yoxdur. Bu ilki təmsilçilərimizi kimlərin, necə təyin etdiyi məlum deyil.

Digər tərəfdən, “Avroviziya”da iştirakçı ölkələrin münsiflər heyətinin tərkibi də müzakirələrə səbəb olub. Sosial şəbəkələrdə bəzi adların bu sahə ilə birbaşa əlaqəsinin olmaması tənqid edilib. Azərbaycan nümayəndə heyətində aktyor, rejissor və digər sənət nümayəndələrinin yer alması narazılıq yaradıb. Qeyd edək ki, heyətdə Azər Aydəmir, Ramil Qasımov, Tural Bağmanov, Ülviyyə Bəbirli və Ülviyə Könül yer alıb.

Globalinfo.az-a danışan Xalq artisti, bəstəkar Faiq Sücəddinov yarışda son çıxışımızın uğurlu olduğunu deyib:

“Sadəcə xal yığmaq lazım idi. Bu dəfə Avstriya bacardı. Münsiflərə gəldikdə, açığı, Eldar Qasımovdan orada kimlərin olduğundan xəbərim yox idi. O, vaxtikən sözügedən yarışda ölkəmizə birincilik qazandıran şəxsdir. “Avroviziya”da səs verənlər avropalılardır. Digər tərəfdən, yaxın ölkələr bir-birinə dəstək olurlar. Azərbaycan ilk sıralamada da olub, axırıncı yerlərdə də…Müsabiqələrdə belə olmalıdır. Yəni münsiflərdə günah axtarmaq lazım deyil. Mən ilk dəfə münsiflər heyətində olanda Ukraynadan gələnlər, “Düşünməyin ki, burada əsas məsələ musiqidir. Siyasət, Avropanın kimlərəsə rəğbəti önəmlidir” deyərək, bizə xəbərdarlıq etmişdilər”.