. 

Aparıcı İlkin Həsəni iyunun 21-də Bakı Kristal Zalında Azərbaycanda ilk dəfə keçirilən UFC turnirində şahidi olduğu xoşagəlməz hadisədən danışıb.

Axşam.az xəbər verir ki, o, sosial şəbəkədə video paylaşaraq bəzi tanınmış idmançıların zalda başqalarının yerində əyləşdiyini bildirib:

"Tədbirə baxırdıq, qarşımızdakı sırada tanınmış idmançılar əyləşmişdi. Aralarında hətta Olimpiya çempionu da var idi. Adını çəkməyəcəyəm, amma çox hörmət etdiyim bir insandır. Onlar kiminsə yerində əyləşmişdilər. Tədbir başladıqdan 30 dəqiqə sonra 14-15 yaşlı yeniyetmələr əllərində biletlə gəldilər və idmançılara dedilər ki, "Bura bizim yerimizdir, əyləşmək istəyirik". O idmançılardan biri çox kobud şəkildə əlini yuxarı qaldırdı və dedi ki, "Gedin yuxarıda harada istəyirsinizsə, əyləşin. Nə qədər boş yer var". Sonra sol tərəfdəki sektoru göstərdilər və uşaqlar gedib orada əyləşdilər. Bir az keçdikdən sonra həmin yerin sahibləri də gəldi və uşaqlar çıxıb getdilər. Bir müddət sonra isə təhlükəsizlik əməkdaşları həmin yeniyetmələrlə birlikdə idmançılara yaxınlaşdılar və dedilər ki, uşaqların valideynləri zəng ediblər ki, onlar öz yerlərində oturmalıdırlar. Təsəvvür edin ki, həmin idmançılar ayağa durdular və uşaqlara nifrətlə baxa-baxa oranı tərk etdilər.

Sözümün canı ondadır ki, hörmətli tanınmışlar, idmançılar, publik şəxslər, sizə hörmət edirik, bayrağımızı qaldırırsınız, sizinlə fəxr edirik. Amma inanın ki, yollarda, marketdə, hava limanı kimi növbə olan yerlərdə sıra mədəniyyəti pozularsa, bu tip böyük tədbirlərdə başqasının yerində oturub və "Get başqa yerdə əyləş" deməklə, həmin o qazandığınız hörmət bir saniyə içində yox olur. Bütün tanınmışlara da demək istəyirəm ki, kənardan bax belə gülünc görünürsünüz. Bunu nəzərə alın".