Görkəmli opera müğənnisi, Üzeyir Hacıbəyovun “səsi ürəkləri fəth edən qadın” adlandırdığı Sona Aslanovanın sosial şəbəkələrdə məzarından görüntülər paylaşılıb. Əksər izləyicilər sənətkarın məzarının baxımsız olduğunu bildirsələr də, bir çoxları onun məzarının olduğunu təəccüblə qarşılayıblar. Bütün bu şübhələrə səbəb isə sənətkarın öz vəsiyyətinə uyğun yandırılıb, külünün okeana səpilməsi olub.
Sona Aslanovanın bacısı oğlu Lətif Aslanov Moderator.az-a özəl açıqlamasında bildirib ki, xalasının məzarı Binəqədi kənd qəbirstanlığındadır:
“Sona xanım 1994-cü ildə həyat yoldaşı Kamal bəylə birgə ABŞ-a, oğlunun yanına köçüb getdi. 2008-ci ildə iflic olduqdan sonra səsini itirdi. Ömrünün sonlarına yaxın qocalar evində yaşayırdı. Amma orada qocalar evi bizdəki kimi deyildi. Onların təkcə yeməyinə gündəlik 60 dollar pul xərclənirdi. 2011-ci ildə isə 87 yaşında vəfat etdi. Amerikada dəfn xərcləri bilirsiniz ki, çox bahadır. Ona görə də o vəsiyyət etmişdi ki, meyiti yandırılsın. Mən Amerikada idim. Dedi ki, Lətif, mənim külümü atamın ayağının altında basdırarsan. O vəfat edəndə vəsiyyətinə uyğun meyiti yandırdılar. Meyitin külünün yarısını okeana tökdülər, yarısını da oğlu Cahangir Bakıya gətirdi. Biz aparıb həmin külü Binəqədi kənd qəbirstanlığında basdırdıq. O ki, qaldı məzarın baxımsız olmasına.. Biz sonuncu dəfə Novruz bayramında xalamın məzarını ziyarət etmişik. Fotodan da görünür ki, məzarın üstündə səməni var. Sonra yağışlar yağdı, ot-alaq bitdi. Bu gün dayımoğluna zəng etmişəm, gedib oranı təmizlətdirəcəyik. Xalamın məzarı hər zaman yaxınları tərəfindən ziyarət olunur. Onu da deyim ki, Sona Aslanovanın həyat yoldaşı da meyitinin yandırılaraq, külünün okeana səpilməsini vəsiyyət etmişdi və vəsiyyətinə əməl olundu” deyə sənətkarın qohumu bildirib.
Lətif Aslanov bildirib ki, Sona xanımın iki oğlu var və hazırda Amerikada yaşayırlar:
“Oğlanlarından biri Los-Ancelesdə, digəri isə San-Dieqoda yaşayır. Cahangirin 74, Rüfətin isə 68 yaşı var. Sona xalamın nəvəsi Amerika sülhməramlılarında xidmət edirdi. İraqda olarkən təyyarədə partlayış oldu və hamısı həlak oldu. Sona xalam dəfələrlə ona demişdi ki, hərbiyə getmə. Nəvəsi vətənpərvər övlad idi” deyə o bildirib.
Lətif Aslanov bəzi məqamlara da aydınlıq gətirib:
“Sona xalam Qala bəyin nəslindən idi. Qala bəy də Hüseynqulu xanın nəslinə gedib çıxırdı. Sona xalamın anası Zibeydə xanım 8 dil bilirdi. Onun da atasının Binəqədi kəndində neft quyuları, buruqları var idi. Bundan əlavə Ramanada da buruqları mövcud olub. Sona xalam mərd, kişi xasiyyətli insan idi. Bəlkə də insanın elə dostları var ki, o dara düşəndə hamısı qaçardı, amma o qaçmazdı. İnsanı quyunun dibindən tutub yuxarı qaldırardı. Sona Aslanovanın səsi Azərbaycanın yeganə “Colotura Soprano”-su idi. Anası onu Üzeyib Hacıbəyovun yanına gətirib. Bəziləri yazır ki, o Bülbülün tələbəsi olub. Bu yalnış xəbərdir. Ötən il onun 100 illik yubileyi qeyd olundu, kitab çap olundu. Sona Aslanova səsi, görünüşü ilə hər zaman yaddaşlarda yaşayacaq” deyə sənətkarın qohumu bildirib.
Azərbaycanın məşhur opera ifaçısı Sona Aslanova 1924-cü ildə oktyabrın 4-də Bakı şəhərinin Binəqədi kəndində anadan olub. Azərbaycan Dövlət Konservatoriyasında musiqi təhsili alıb. 1952-ci ildə konservatoriyanı bitirdikdən sonra elə orada dərs deməyə başlayıb. Azərbaycan səhnəsinə isə onu ilk dəfə Üzeyir Hcıbəyov gətirib. Sənətkar 200-dən çox mahnı ifa edib. "Görüş", "Telefonçu Qız" və başqa filmlərə çəkilib. Bir çox filmlərdə obrazların dilindən mahnıları da, məhz Sona Aslanova ifa edib. Opera səhnəsinə isə "Arşın Mal Alan" -da Gülçöhrə, "Əsli və Kərəm" — də Əsli, "Koroğlu" -da Nigar obrazını yaradıb.
