Hacı Zeynalabdin Tağıyevin həyat və fəaliyyətindən bəhs edən film 2025-ci ildə Azərbaycanın "Ən yaxşı xarici bədii film" kateqoriyasında “Oskar” mükafatına namizəd təqdim edilib. Bakıda bir əsr öncə baş vermiş tarixi hadisələrdən və dövrün görkəmli mesenatından bəhs edən film 2024-cü ildə çəkilib. Dörd seriyalı ekran əsərinin ötən il təqdim edilməsinə səbəb Hacı Zeynalabdin Tağıyevin vəfatının 100 illiyinin qeyd olunması idi.

Yerli tamaşaçılar tərəfindən çox maraqla qarşılanan bu film görəsən xarici tamaşaçıların və film mütəxəssislərin də marağına səbəb olacaqmı?

Xalq artisti, Azərbaycan Kinematoqrafçılar İttifaqının sədri Rasim Balayev Bizim.Media-ya açıqlamasında bildirdi ki, təkcə bu film yox, ümumiyyətlə bizim filmlər onların marağında deyil:

“Olanımız budur da, neyləyək?”

“Mən hələ imkan tapıb filmi izləməmişəm. Bilirəm ki, “Oskar” mükafatında seçimlər münsiflər arasında gizli şəkildə aparılır. Amma onu deyə bilərəm ki, bizim filmlər Amerika standartlarına uyğun deyil. Onların özlərinin standartları, müəyyən meyarlar var ki, bunlara uyğun gəlmir. İndi olanımız budur da, neyləyək?”, - deyə R.Balayev vurğuladı.

Tanınmış kinorejissor Oqtay Mirqasımov isə həmin qərb standartlarını detallı şəkildə şərh etdi:

“Əslində hamımızın arzusudur ki, Azərbaycan filmi “Oskar” kimi yüksək mükafata layiq görülsün. Amma təəssüf ki, indiki halda mümkün deyil. Azərbaycan xalqında həmişə əxlaq, ailəyə hörmət, kişi və qadın arasında qarşılıqlı sayğı, abır olub, böyük-kiçik bilinib. Doğrudur, əvvəlki dövrlərdə buna daha çox diqqət edilirdi. Amma indi də şükür var. Bunlar bizim xalq olaraq müsbət cəhətlərimizdir, amma özümüz üçün. Qərb üçün bu maraqlı deyil, onların öz maraqları var”.

O.Mirqasımov vurğuladı ki, “Oskar” mükafatı, xüsusilə də xarici filmlər nominasiyasında mükafat hər zaman obyektiv verilmir:

“Azərbaycandan təkcə “Oskar”a yox, hansısa festivala bir əxlaqsız film göndərsələr, mütləq ona bir neçə mükafat verəcəklər. Çünki istəyirlər ki, biz də onlar kimi olaq. Bununla da milli mənəviyyatımızı korlamaq, kimliyimizi unutdurmaq, özlərinə bərabər etmək istəyirlər”.

Qeyd edək ki, “Tağıyev: neft” filmi çəkiliş miqyasına görə Azərbaycan kinematoqrafiya tarixində mühüm hadisədir: film 76 fərqli məkanda çəkilib, Tarixi səhnələrin realistik şəkildə təqdim edilməsi məqsədilə 300-dən artıq dekorasiya hazırlanıb.