“Fikirləşirəm ki, yaxın günlərdə yenə də sellər, yağışlar, daşqınlar başlayacaq və nakam şairin xatirə muzeyinin həyətini su basacaq. Yalançı bir asfalt çəkiblər, sel gəlsə yenə də onu alıb aparacaq. Onsuz da ötən il yağan yağışlar muzeyi qəzalı vəziyyətə salıb. Nazirlikdən demişdilər ki, 2025-ci ilin layihəsinə salınıb, təmir olunacaq. Yay da qurtardı, qışa 3 ay qalıb. Mən inanmıram ki, bu 3 ayda, yağışların başlayacağı bir müddətdə orada nəsə işlər görülsün. Aidiyyatı qurumların şairə bu qədər etinasız münasibətinin kökündə bilmirəm ki, nə dayanır?! Hərə öz işinə vicdanla yanaşsa gözəl olar”.
Bunu Moderator.az-a açıqlamasında Mikayıl Müşfiqin əmisi nəvəsi Reyhanə İsmayılzadə bildirib.
O deyir ki, muzeyin mövcud vəziyyəti ilə bağlı nazirin qəbulunda olub:
“Müşfiqin varislərindən təkcə biz qalmışıq. Mənim də evim-eşiyim yoxdur. Heç olmasa anım, doğum günündə nə bacarırıqsa bacı qardaş edirik. Bizim daha maddi imkanımız yoxdur ki, xatirə muzeyini də təmir edək. Əgər bizim maddi imkanımız olsaydı heç kimi narahat etməzdik, özümüz təmir edərdik. Allah vəzifədə oturan şəxslərə insaf versin. Nazirin şəxsən qəbulunda olub, problemi dedim. Çi fayda! Xızı rayon icra başçısı heç maraqlanmır. Qardaşım xəstədir, mən də bu gün-sabah ölüb getsəm kimlər nə edəcək? Bizim övladlarımız da bir şey edə bilməyəcəklər! Biz onlara nə ötürə bildik ki, onlar da nəsə etsin?! Bir az insafa gəlin, ürək ağrısı çəkin. Mikayıl Müşfiq adi şair olmayıb, o şam kimi yanıb, xalqı üçün ömrünü söndürüb. Bir nəsil ona görə məhv olub! Heç olmasa nakam şairin xatirə muzeyinə əl gəzdirin, müraciətlərimə baxın” deyə şairin yaxın qohumu bildirib.
Qeyd edək ki, bir neçə ay nazirlikdən Moderator.az-ın sorğusuna cavab olaraq bildirilmişdi ki, şairin xatirə muzeyi tezliklə təmir olunacaq.
