Jurnalist olaraq marağımı çəkdi. Hətta öz işimi yarımçıq saxlamalı oldum. Halbuki gecikirdim. Ayaq saxladım.

Məlum oldu ki, bura Həmkarlar İttifaqları Konfederasiyasının “Kurort Turizm İnformasiya Mərkəzi”nin binasıdır. Yaşlı qadınlar, kişilər “biz “putyovka” (müalicəvi sanatoriyalara göndərişnamə) almalıyıq, sizin zəng mərkəzinə isə düşə bilmirik” deyirdilər. Hamıya bir söz deyilirdi: “Artıq qərar dəyişib pensiyaçılar, təqaüddə olanlar avqust ayında müraciət etsinlər”.

Yaşlı insanlardan biri isə “biz niyə soyuq aylarda gedib dincəlməliyik? Yay aylarında niyə “putyovka” almaq hüququndan məhrum edilmişik?” Qapıda dayanan yoldaş isə (mühafizəçiyə oxşatdım) “bu qərar 5-ci gün qəbul olunub” dedi.
Hamıya eyni söz deyilirdi: ötən həftənin 5-ci günü Həmkarlar İttifaqında qərar qəbul olunub ki, artıq pensiyaçı, təqaüddə olan şəxslər bu yay “putyovka” üzünə hsərət qalacaqlar. Onlar yalnız Avqust ayında müraciət edib payız və qış aylarında dincələ bilərlər.

Danışıqlardan məlum oldu ki, ilk olaraq hamıya “call center”ə zəng edib putyovka ala bilməsinin mümkünlüyü deyilib. Hər kəs də üz tutub bu binaya. Narazılıq edənlərin çıxışlardan məlum oldu ki, bu gün bura 500 nəfərə yaxın şəxs müraciət edib. Və böyük əksəriyyət qanıqara şəkildə ərazini tərk etməli olub.

Baxdım ki, 500 nəfərin bir gündə şikayət məqsədilə qapısını döydüyü bu bina Diplomatik korpusun bir adımlığındadır. Bu bina turistlərin fasiləsiz axın etdiyi məkandadır. Və milyonlarla üzvü olan Həmkarlar İttifaqının “call center”-ni burada “Putyovka” ala bilməyən çoxsaylı insanın axın edəcəyi bir nöqtədə açmaq nə qədər vacib imiş? Bu bina və bina qarşısında hazırda və gələcəkdə baş verənlər bir addımlıqda olan səfirliklərə, incəsənət mərkəzlərinə təhlükə yarada bilərmi? Qapı qarşısında baş verə biləcək mübahisə və incidentlər necə?... Bu hal istənilən turistin kamerası ilə bir anda dünyanın sosial şəbəkələrinə ayaq açmazmı? Bu barədə bir qədər sonra...

Qayıdaq Həmkarlar İttifaqından narazı insanların toplaşdığı məqama.
Bu anda içəridən yaşlı bir xanım çıxdı. Hamı ümidlə o xanıma yönəldi. O isə: ... “Boş şeydir, mən gedəsi oldum. Dedilər yoxdur....” deyib getdi.

Təhsil işçisi olduğunu deyən gənc xanıma isə “siz daha bura gəlməyin gedin öz rayonunuza müraciət edin” dedilər. O biçarə də “bəs bu zəng mərkəzi kimə lazım idi, mən niyə bu qədər yolu gəlməli idim” deyərək narazı halda getməli oldu. Bu minvalla hamını oradan uzaqlaşdırmağa çalışırdılar. Çünki elektron sistem və fayda verməyən ideya çökmüşdü.

Mən ərazini tərk etməli oldum. Yuxarıda da qeyd etdiyim kimi gecikirdim. İşim bitdi. Geri qayıdarkən bu dəfə də eyni küçədə narazı insanlarla qarşılaşdım. Amma bu şəxslər bir qədər öncə gördüyüm yaşlı və pensiyaçılar deyildi. Sadəcə bu dəfə qarşıma çıxanlar milyonlarla üzvü olan amma 7-8 nəfərin ümidinə qalan “call center”ə zəng edib “putyovka” arzusu puça çıxanlar idi.

May ayının 20-si Saat 08:35. Vəziyyət dəyiməz olaraq qalır

Bu gün səhər tezdən eyni ünvana baş çəkdim. Vəziyyət eyni idi.

Qapı önündə izdihamla qarşılaşdım. Nə üçün bu şəxslər binanın önündə saxlanır? Küçədə növbənin yaradılmasına nə lüzum var? Ən azı bina daxilində qəbul həyata keçirmək olmazmı?

Detallarla video təqdimatda tanış ola biləcəksiz.

Həmkarlar İttifaqları Konfederasiyasınn rəsmi saytında paylaşılan foto və videolar bir lətifəni yada salır. Dünyasını dəyişən bir nəfərə cəhənnəmi göstərirlər. Baxır ki, hər şey necə də gözəldir. Deyir məni cəhənnəmə göndərin. Qapıdan keçən kimi atırlar qır qazanına. Deyir axı bayaq bura belə deyildi. Bildirirlər ki, gördüklərin reklam idi......
İndi Həmkarlar İttifaqları Konfederasiyanın fəaliyyəti də bir qədər bu lətifəyə bənzəyir.
Həm də deyəsən “call center” iş üçün yox görüntü üçün yaradılıb. “Call center”in yeri “cool center”lə səhv düşəndə nəticəsi belə acınacaqlı olur. Bu da “cool” görünməyin acı nəticəsi.

Bu gün mərkəzdə sıxlığın azaldılması üçün addım atılan bir vaxtda siz niyə 100-lərlə vətəndaşı, həm də xoş günü üçün yox şikayətə gələn vətəndaşı zorla İçərişəhərə gətirirsiz. Axı sizin fəaliyyətiniz qənaətbəxş deyil. Ora gələnlər də təşəkkür üçün gəlmirlər. İşinizdən narazı qalan, dərdinə çarə axtaranları niyə İçərişəhərin mərhəzinə yönəldirsiz? Nədir məqsəd? Bəs yaxşı sizin sələfinizdən fərqiniz nədir?...

Bir çox qurumlarda rəhbərin ətrafında özünü “qızılbaş” hesab edənlər olur. Hər işə müdaxilə edib vacib şəxs kimi görünmək istəyənlər də. Onların müdaxilələri zərər verəndə isə gec olur. Həmkarlar İttifaqında yeni vəzifə verilən kadrlar canfəşanlıq edir. Amma onların sözlərinə yox, əmək hüquqlarını qorumalı olduğunuz vətəndaşlarımızın haqlarına SAHİB çıxın.

Cənablar, “Kurort Turizm İnformasiya Mərkəzi” üçün yeri uğursuz seçmisiz. Sizin hər gün 100-lərlə şikayətçiyə cavab verə biləcək nə nümayəndəniz, nə də cavabınız yoxdur. Bu dərdi başqa bir məkanda çəkmək olar. Amma hay-küyün səfirliklərin və şəhərimizin qonaqlarının gözü qarşısında nümayiş olunması yaxşı hal deyil.
Ajans.az