Gəncədə, eləcə də ətraf rayonlarda “matan” ləqəbi ilə tanınaraq, yüngül həyat tərzi keçirən, kef məclislərində qonaqları əyləndirən bu qadın pedaqoji kadrların yetişdirildiyi böyük bir universitetdə işləyir…

Bu iddia Gəncə Dövlət Universitetinin bir qrup əməkdaşının Azərbaycan Respublikasının Elm və Təhsil naziri cənab Emin Əmrullayevə ünvanladığı müraciətdə yer alır. Bir surəti də, “Yenixeber.org”-a daxil olmuş müraciətdə universitetin bir xanım əməkdaşının “özfəaliyyət”indən bəhs edilir. Çox ciddi və rüsvayçı iddialar sadalanır…

Biz “Yenixeber.org” olaraq bir təhsil ocağına, universitetə yumşaq desək yaraşmayan bu iddiaların araşdırılması ilə bağlı müraciəti universitet rəhbərliyinə göndərdik. Əvvəlcə müvafiq araşdırma aparıb, redaksiyamıza təqdim ediləcəyini desələr də, olmadı(?)

Biz məlum aktuallığını nəzərə alıb, kəskin ixtisar və düzəlişlərlə müraciəti dərc edirik:

Hörmətli Emin müəllim, Gəncə Dövlət Universitetində baş verən, Azərbaycanın təhsil sisteminə ləkə olan bir xoşagəlməz hadisə barəsində Sizə məlumat vermək istəyirik. Bu olay bir dəfə baş vermir, illərlə müxtəlif variantlarda təkrarlanır, rəhbərlik isə bununla bağlı heç bir tədbir görmür və görmək iqtidarında da deyil.

Məlumat üçün Sizə bildiririk ki, Gəncə Dövlət Universitetinin əməkdaşı Zinyət Şənlikova (Ad və soyad şərtidir. Red.) nəinki təhsilimizin, sözün tam mənasında cəmiyyətimizin üz qarasıdır. Çox utancverici və acınacaqlı bir haldır ki, nəinki Gəncədə, eləcə də ətraf rayonlarda belə “matan” ləqəbi ilə tanınaraq yüngül həyat tərzi keçirən, kef məclislərində qonaqları əyləndirən bu qadın pedaqoji kadrların yetişdirildiyi böyük bir universitetdə işləyir. Bu şəxs elə bizim universitetin Rus dili ixtisasını güc-bəla ilə bitirib, pedaqogikadan xəbəri olmasa belə, müəllim işləyir, dosent adını almağa belə nail olub.

Onun “sərgüzəştləri” universitetin hüdudlarından kənarda da çox yaxşı məlumdur. Özünün qeyri-əxlaqi, mənəviyyatsız yaşam tərzi ilə fəxr edən bu adam keçmişdə və hal-hazırda yüksək vəzifədə çalışan məmurlarla eşq macəraları yaşadığını başqalarına həvəslə danışaraq onların çətiri altında olduğunu bildirir. Bununla da universitet rəhbərliyinə və kollektivə özünün toxunulmazlığını nümayiş etdirmək istəyir və buna nail olur.

Lakin onu həqiqətən tanıyan iş yoldaşları, məzunlar və hazırda təhsil alan tələbələr, eləcə də şəhər sakinləri yaxşı bilirlər ki, o nə qədər gənc insanların həyatını məhv etmişdir. Əvvəllər o dəfələrlə auditoriyada oğlan tələbələrlə biabırçı vəziyyətdə yaxalanmışdır. İndi isə öz tələbələrini auditoriyadan birbaşa “qonaqlığa” aparır. Evində olan zaman…əvvəlcədən quraşdırdığı cihazlar vasitəsilə həmin gənclərin məlum görüntülərini qeydə alır. Sonra isə həmin görüntüləri sosial şəbəkədə yayacağı ilə gəncləri şantaj edərək özünə tabe edir. Hətta müxtəlif güc strukturlarında “dostları” olmasını bildirərək, ondan uzaqlaşacaqları təqdirdə bu gənclər haqqında hüquq-mühafizə orqanlarına ifşaedici səs yazıları və video görüntüləri ötürəcəyi ilə onları hədələyir.

Bu tələbələrdən biri, məsələn Sərvət Azad oğlu Şəmmədov və Elgün Aldiyevdir. (Ad və soyadlar şərtidir. Red.) Bu tələbələr ata-analarının üzünə belə həsrət qalıblar. Bu tələbələri müxtəlif vaxtlarda evində saxlayır. Ayrılıb gedəcəyi təqdirdə onların məlum görüntülərini yayacağı ilə hədələyir. Hətta Sərvət Azad oğlu Şəmmədovu Pedaqogika kafedrasına müəllim götürtdürmək üçün rektorluğa müxtəlif vasitələrlə təzyiq edir. Çox maraqlıdır, bu Sərvət Azad oğlu Şəmmədov İdman ixtisasını bitirib. Fövqəladə Hallar Nazirliyinin əməkdaşıdır. Bu adamı GDU-nun rektoru Yusif Yusibov … kafedrasına yarımştat müəllim götürüb. İdman hara, pedaqogika müəllimliyi hara??? Araşdırın görək, Yusif Yusibov niyə Zinyət Şənlikovadan qorxur, onun hədə qorxusu ilə bu əmri imzalayıb.

Zinyət Şənlikova tələbə qızlarla da, “rəfiqəlik” edir. İş yoldaşları da, qonşuları da bu adamın əlindən zara gəliblər. Qohum-əqrəbası isə çoxdan bu adamdan üz döndərib, xəcalət çəkdikləri üçün onunla qohum olduqlarını inkar edir, onu tanımaq belə istəmirlər. Çünki onların da papağını yerə soxub. Onun qurbanına çevrilmiş gənclər səhvlərini başa düşüb, ondan uzaqlaşanda isə onları və valideynlərini şərləyir, polis və digər orqanlara müraciət edərək guya həmin insanların onu öldürmək istədiklərini bildirir.

Tez-tez növbəti…planı baş tutmadığı, yaxud çirkin məqsədlərinə nail ola bilmədiyi üçün psixoloji durumu normal olmur. Belə olduqda hədyan qopardaraq hər kəsi provakasiya edir, tələbə və müəllimləri kişilərin dilinə gətirə bilmədiyi küçə ifadələri ilə təhqir edir. Bu adam universitetin söyüş müxalifətidir. Özü cəmiyyətin tullantısı olduğu halda, başqalarının uğurlarını gözü götürmədiyi üçün hər kəsi ləkələməyə, provakasiyaya çəkməyə çalışır. Sanki bununla özünün iyrənc davranışına bəraət qazandırır. Normal insanlar ona adekvat cavab verə bilməyəcəyini başa düşdüyündən biabır olmamaq üçün kənar qaçır.

Təsəvvür edin ki, bütün bunlar universitetin otaqlarında və ya koridorlarda, yəni müəllim və tələbələrin gözü qarşısında baş verir. Auditoriyada tələbələrə qarşı nalayiq, təhqiramiz ifadələr işlədərək gənclərin qarşısında milli-mənəvi dəyərlərimizi yerə vurur. Yol verdiyi neqativ hallara rəğmən başqalarını günahkar çıxararaq Elm və Təhsil Nazirinin, Millət vəkillərinin, universitetin rəhbərliyinin ünvanına ən biabırçı ifadələr səsləndirərək onları aşağılayır. Onun üçün küçə ilə auditoriyanın fərqi yoxdur. İstənilən yerdə istənilən ifadəni işlədir. Dəfələrlə valideynlər, tələbələr və müəllimlər tərəfindən şikayət olunmasına baxmayaraq rəhbərlik bu adam haqqında tədbir görməkdə acizdir. Çünki onun şər-böhtanından, söyüş və təhqirlərindən tam mənada qorxurlar. Hətta universitet rəhbərliyi “səsini batırmaq” üçün ona müxtəlif mükafatlar, diferensiallaşmış əmək haqqı verir.

Halbuki diferensiallaşmış əmək haqqı yüksək reytinqli jurnallarda elmi məqalələri dərc olunmuş əməkdaşlar üçün nəzərdə tutulmuşdur. Sual olunur ki, nəyə görə universiteti biabır edən bir adama elmi məqaləsi, dərs vəsaiti və digər göstəriciləri olmadan universitetin büdcəsindən saxta mükafat yazırsınız? Universitetdə dərs yükü kəskin çatışmadığı halda rəhbərliyin göstərişi ilə ona 1,5 ştat dərs saatı ayrılır. Halbuki savadlı, tərbiyəli, məsuliyyətli müəllimlər 1 ştat dərs almaqda çətinlik çəkirlər.

Hörmətli cənab Nazir!

Qısa bir məktubda həm etik baxımdan, həm də digər səbəblərdən yolunu azmış bir insan haqqında tam təsəvvür yaratmaq çətindir. Universitetimizin akkreditasiyasını həyata keçirən komissiya müəllimlər, tələbələr, məzunlar arasında sorğu keçirmişdir. Xahiş edirik ki, təkrar akkreditasiya zamanı həmin kateqoriyadan olan insanlardan Zinyət Şənlikova haqqında da sorğular aparılsın. O zaman onun əsl siması bütün çılpaqlığı ilə Sizə daha yaxşı məlum olacaq.

Məktubda qeyd olunanların doğruluğunu yoxlayaraq, müəllim adı altında təhsilimizi, mənəviyyatımızı, gənclərimizi korlayan bir şəxs haqqında müvafiq tədbir görməyinizi xahiş edirik.