ŞOK TƏKLİFƏ ETİRAZ: “MƏN ƏXLAQSIZLIQ YUVASI İŞLƏDƏ BİLMƏRƏM”
DİA.AZ: - Zümrüd adlı bir xanımın zəngi məni çox təəccübləndirdi. Telefonda ağlayaraq məndən kömək istəyən xanım təcili mənimlə görüşmək istədiyini bildirdi. Mən tərəddüd etmədən vaxt təyin etdim. Zümrüd xanım (red: soyadının yazılmasını istəmədi) həyəcanla, bir növ qorxu içərisində başına gələnləri danışmağa başladı və bizdən, bizim vasitəmizlə hüquq mühafizə orqanlarından kömək istədi. Onun dediklərini olduğu kimi sizlərə çatdırıram:
“2007-ci ildən Bakı şəhəri, Süleyman Tağızadə 88 ünvanında yerləşən “Centlimen” sağlamlıq mərkəzində fəaliyyət göstərirəm. Heç bir qanun pozuntusuna yol vermədən təmiz adımla işləmişəm. Hal-hazırda iki övlad anasıyam. Övladlarımdan biri Müdafiə Nazirliyinin N saylı hərbi hissədə zabit işləyir.
Mən işlədiyim obyektin sahibi ilə qarşılıqlı razılaşmaya əsasən, gəlirin iki yerə bölünməsində şifahi razılıq əldə etdik. Oranın təmirinə xərclənən vəsait obyektin gəlirindən ödəniləcəkdi. Sonralar obyektin sahibi ilə Turan Bank arasında yaranmış mübahisə məhkəmə prosesinin predmeti oldu. Hal-hazırda bank obyektin sahibinə hər ay ödəniş etdirə-etdirə, onun heç bir məlumatı olmadan obyekti öz mülkiyyətinə çevirmiş və məhkəmə qərarı olmadan satmışdır.
Daha dəqiq desək, məhkəmə prosesi davam edərkən qeyri-qanuni olaraq, adıçəkilən obyekti Fuad adlı bir şəxsə satmışdır.
Fuad mənim işlədiyim “Centlimen” sağlamlıq mərkəzinə gəldi və dedi ki, bu obyekti mən almışam, əlimdə də “kupçam” var, ya çıxmalısınız, ya da mən istədiyim kimi işlətməlisiniz. Mən dedim ki, axı bu obyekt məhkəmədədir, get məhkəmənin qərarını gətir, orda yazılsın ki, Zümrüd, çıx bayıra, mən də çıxacağam, qanunla qanunluq etməyəcəyəm ki. Fuad mənə belə cavab verdi: “Məhkəməylə siz özünüz bilərsiniz, bank bilər, mənim əlimdə sənədim var, özüm bilərəm neyləyirəm. Belə də görürəm ki, yazıq adamsan, sənə yazığım gəlir, eşitdiyimə görə, iki uşağa baxırsan, gəl buranı sənə 5000 manata icarəyə verim, amma mən deyən kimi işlədəcəksən”. Onun şərti ilə maraqlandım. Mənə dedi ki, sənə 10 nəfər qız verəcəyəm, o qızlar özlərinə yaxşı müştəri yığıb, buranı işə salacaqlar, sən də beş mini asanlıqla verəcəksən. Mən 7 ildə belə işlə məşğul olmamışam, ola da bilmərəm. Mənim balalarım var, oğlum vətəninə xidmət edir, mən adımı ləkələyə bilmərəm. Mən əxlaqsızlıq yuvası işlədə bilmərəm. “İşlədə bilmirsənsə, çıx obyektdən” dedi. Cavab verdim ki, mən bankdan külli miqdarda pul götürüb buranın təmirinə vermişəm, ancaq uşaqlarımın çörək pulunu qazanıram. Əsəbiləşərək məni şantaj eləməyə başladı. “Mənim dalımda duran iş adamları var, onların əli ilə səni pis günə qoyaram, insan alveri ilə, “Qoraddel”lə əlaqəm, jurnalist dostlarım var, sənin obyektini mən vurdurum, sən də bax”, - deyə mənə hədə-qorxu gəldi. Dedim, mənim obyektimi necə vurdura bilərsən axı, işləyən iki qızdır, heç biri də əxlaqsız deyil? O, yüksək vəzifələrdə işləyən məmurların adını çəkməsə də, məni yiyəsiz adlandırıb, onlarla hədələdi və getdi.
İki gündən sonra yenə gəldi ki, niyə çıxmırsınız, nə “remont” edirsiniz? Sonra qızların və inzibatçının üstünə qışqıraraq, onlara hədə-qorxu gəldi. Qızlar qorxudan işdən çıxmaq istədilər.
Səhəri gün sahə müvəkkili gəldi ki, Fuad səndən şikayət edir, bəs onu vurmusan, gözünü cızmısan. Dedim, axı mən heç yerimdən durmadım, onu necə vura bilərəm, gedin verin ekspertizaya, lazımdırsa əl izlərimi də verərəm.
O gündən sonra Fuad başladı mənimlə ədavət eləməyə, məndən qəzetlərdə məqalələr yazdırdı. Guya mən əxlaqsız yuva işlədirəm, çıxardırlar çıxmıram, deyirəm ki, məni çıxartsanız, özümə benzin töküb yandıracağam. Bir sözlə, məni şərləməyə başladı. Ta bu günə qədər mənə gün verib, işıq vermir. Məni şərləyir, guya mən ona demişəm ki, mənim arxamda daxili işlər orqanları durur. Mənim dalımda nəyə görə daxili işlər orqanlar durmalıdır ki, mən sadə bir sağlamlıq mərkəzi işlədirəm? Sən Fuadın obyektində 80 nəfərəcən qız var. “Gala” deyilən obyektdə masaj adı ilə əxlaqsızlıq yuvası açmısan. Onun obyekti “20 yanvar” tərəfdə yerləşir.
Tərbiyəsiz yerdir, kim istəsə, gedib görə bilər necə yerdir. Orda açıq-aydın əxlaqsızlıq yuvası var. Özü belə obyekt işlədə-işlədə məni də elə işləməyə məcbur edir. Mənim arxam-dayağım yoxdur, xəstə adamam, hər dəfə mənə hədə-qorxu gəlir, gecə bilmir, gündüz bilmir, bütün günü
obyektin ətrafında fır-fır fırlanır. Mənə deyir, çıx obyektdən, mən buranı əxlaqsız yuva kimi işlədəcəyəm. Mən də çox əziyyət çəkmişəm, qoyduğum pullarımı heç götürə bilməmişəm. Şəkər xəstəsiyəm, bronxitim var, üstəlik də Fuadın əlindən mikro-infarkt keçirmişəm. Sizdən xahiş edirəm mənə köməklik edəsiniz, mən qorxa-qorxa yaşayıram. Mənə deyir ki, sənin oğlunun hərbi hissəsinə xəbər göndərəcəyəm ki, anan əxlaqsız yuva işlədir. Fuad reket jurnalist dostlarının əli ilə, pul gücünə məni qohumlarımın yanında biabır etməklə yanaşı, qohumlarımın da işlərinə burnunu soxur. Mən ondan qorxuram, mənə çox hədə-qorxu gəlir, mən öz yerimdə rahat yaşaya bilmirəm. Buna bir əncam çəkməyinizi xahiş edirəm”.
Müəllifdən: Obyektivlik naminə qarşı tərəflərin də fikrini öyrənməyə hazırıq.
Mehriban Bəylərqızı
