MƏHKƏMƏ İCRAÇISI QANUNLARI SAYA SALMIR
Azərbaycanda məhkəmə-hüquq sistemində təkmilləşdirilmə aparılmasına baxmayaraq bu gün bəzi mənmurlar hələ də bu sistemin adına ləkə gətirən hərəkətlər edir. Bəzi məhkəmələr, o cümlədən məhkəmə icraçıları hələ də vətəndaşları süründürməçiliyə salır, vəzifə səlahiyyətlərindən sui-istifadə edib insanların heysiyyatı ilə oynayır. Təəssüflər olsun ki, bu cür icra məmurları barədə hələ də ciddi tədbir görülmür.
Redaksiyamıza müraciət edən Bakı şəhər sakini Qənirə Hüseynova da bu cür süründürməçiliyə məruz qalıb. Məhkəmə icraçıları neçə illərdir ki bu qadını get-gələ salır, onun xeyirinə çıxarılan məhkəmə qərarlarını icradan yayınır. Bəli, söhbət bir deyil, bir neçə məhkəmə qərarından gedir. İllər boyu min bir zülmlə qazandığı pulla aldığı qanuni mülkiyyətinə bu gün bəzi dələduzların və məsuliyyətsiz məhkəmə icraçılarının özbaşınalığında sahib çıxa bilmir.
Qənirə xanımın dediyinə görə, o 2008-ci ildə paytaxtın Səbail rayonu, A. Məmmədov küçəsi, 82 saylı evin 5 və 6 saylı mənzilləri ev sahibi Feyruz Əliyevdən alıb. Alqı-satqı qanuni yolla həyata keçirilib və ev sahibinin heç bir etirazı olmayıb: “Hadisə belə olub. Feyruz Əliyev oğlum Elşənlə 2005-ci ildə özlərinin və bizim evi banka girov qoymaqla oradan pul götürüb. Razılaşmaya görə, hər iki tərəf banka aylıq pul ödəməli idilər. Bir müddətdən sonra məlum oldu ki, Feyruz Əliyev banka pul ödəmədiyindən banka ödəniləcək pul faizilə artıb. Eyni zamanda, onun banka pul ödəməməsi bizim də bankda olan girov evimiz problemli şöbəyə göndərilib və hər iki ev Feyruz Əliyevin məsuliyyətsizliyindən bankda batır. Həmin vaxt Feyruz mənzili bizə satmaq qərarına gəldi. Razılaşma əsasında 147 min dollar onun mənzilinin, 200 min dollar isə öz evimizin yerinə ödəyib evləri girovluqdan çıxardıq. Feyruz Əliyev razılaşma əsasında həmin pulu bizə qaytara bilmədiyi üçün əvəzində mənzili könüllü olaraq bizə verdi. Bununla bağlı bizimlə onun arasında alqı-satqı aparıldı, özünün və ailə üzvlərinin razılığı ilə ev bizim adımıza sənədləşdirildi. Lakin, bir müddət qalmağa yerləri olmadığı üçün Feyruz ailəsi ilə həmin evdə qalmağı xahiş etdi və biz də ona icazə verdik. Amma, bir müddətdən sonra məlum oldu ki, Feyruz Əliyev evdən çıxmaq istəmir və pulun ona bağışlanmasını istəyir. Məsələ ilə bağlı Feyruz və onun ailə üzvləri ilə danışıqlar aparsaq da, o mənzildən çıxmayacağını bildirdi”.
Cavabdeh susdurulur, icra məmuru “xod” gedir
Qənirə xanım deyir ki, məsələ ilə bağlı 2009-cu ildə onlar məhkəməyə müraciət edib. Məhkəmə tərəfləri dəfələrlə prosesə dəvət etsə də, qarşı tərəf heç bir səbəb göstərmədən proseslərə qatılmayıb. Amma, cavabdehin vəkili prosesdə iştirak edib. 2009-cu il martın 31-də Səbail rayon Məhkəməsinin hakimi Famil Nəsibovun sədrliyi ilə məhkəmə istintaqı yekunlaşıb və və iddia təmin edilib. Məhkəmə cavabdehin təcili mənzildən çıxarılması və evin qanuni mülkiyyətçinin istifadəsinə verilməsi barədə qərar çıxarıb.
Qərarla razılaşmayan qarşı tərəf sənəddən apellyasiya şikayəti versə də, Bakı Apellyasiya Məhkəməsi şikayəti rədd edib. Cavabdehin kassasiya şikayəti də əsassız sayıldığı üçün Ali Məhkəmə tərəfindən bu şikayət də rədd edilib və birinci instansiya məhkəməsinin qəırarı qüvvədə qalıb.
Ali Məhkəmənin iki qərarı bir icraçının əlində oyuncağa çevrilib
Ali Məhkəmənin qərarından sonra iş məhkəmə tərəfindən icra olunmaq üçün Səbail rayon məhkəmə icraçılarına göndərilsə də, Feyruz Əliyev icraçılarla “dil tapıb” qərarın icrasını dayandırıb. Məhkəmə icraçıları da bu məqsədlə işi icra etməkdən yayınıb. Bir müddətdən sonra məlum olub ki, qarşı tərəf, yəni Feyruz Əliyev hansısa yolla Səbail rayon məhkəməsində iddia qaldırıb və evinin dələduzluq yolu ilə əlindən alındığını iddia edib. Amma, məhkəmə bu dəfə də onun yalanlarını üzə çıxarıb. Feyruz Əliyev iddia edib ki, guya məhkəmə prosesindən məlumatsız olub, Səbail rayon Məhkəməsi ondan xəbərsiz qərar çıxarıb. Prosesdə məlum olub ki, məhkəmə dəfələrlə cavabdehi prosesə dəvət etsə də, o prosesdə iştirakdan imtina edib. Bunu məhkəmə şahidləri də təsdiqləyib və iddia rədd edilib. Qərardan verilən apellyasiya və kassasiya şikayətləri də yenidən rədd edilib və qərar yenidən icra üçün məhkəmə icraçılarına göndərilib.
Qənirə Hüseynova deyir ki, iki dəfə onun xeyirinə qərarlar çıxarılmasına, bütün məhkəmə instansiyaları mənzilin boşaldılmasına qərar versə də, cavabdehlər evdən çıxmaq istəmir: “Dəfələrlə məhkəmə icraçılarına müraciət etsəm də heç bir xeyri yoxdur. İcraçılar yalnız onu bəhanə edirlər ki, cavabdeh mənzildən çıxmır. Maraqlıdır, cavabdeh qərarı icra etsəydi, bəs bu məhkəmə icraçıları nəyə lazım idi? Elə bu icraçılar mübahisəli məsələlər üçündür, onlar da işlərini icra etmir. Bütün instansiyalar hamısı bizim xeyirimizə qərar çıxarıb, əlimizdə qanuni qüvvəyə minmiş iki məhkəmə qərarı var. Məhkəmə icraçıları isə Azərbaycan Respublikası adından çıxarılan qərarları saymır. Hər dəfə gedəndə bir bəhanə ilə icradan yayınırlar. Bu məmurlar barədə niyə bir tədbir görülmür?”
Gözə kül üfürmək və ya icra məmuru cavabdehdən tələb yox, xahiş edir
Şikayətçinin dediyinə görə, dəfələrlə təkiddən sonra məhkəmə icraçıları “gözə kül üfürmək” kimi bir hərəkət edib. Belə ki, icraçılar Qənirə xanımı 2 il süründürəndən sonra iddiaçının əl çəkmədiyini görüb cavabdehə-Feyruz Əliyevə tələb deyil, təklif göndərib. Çox yumşaq halda yazılmış təklifdə icraçılar Feyruz Əliyevdən xahiş ediblər ki, evi boşaltsın. Səbail rayon icra şöbəsinin icra məmuru Əziz Hacıbalayevin Feyruz Əliyevə göndərdiyi təklifdə yazılıb: “10 gün müddətində qətnamənin icrasını könüllü olaraq təmin etməniz, bu müddət ərzində mübahisəli mənzildən çıxmağınız və tələbkar Qənirə Hüseynovanın əməli istifadəsinə verməniz Sizə təklif olunur. Əks halda qərarın icrası qanuna müvafiq məcburi qaydada icra ediləcək”.
Təklif 2012-ci ilin avqust ayının 10-da cavabdehə göndərilib. Amma, hələ də icra məmurunun göstərdiyi 10 gün “bitməyib”. İcra vərəqəsindən 5 aydan artıq vaxt keçməsinə baxmayaraq icrac məmurları hələ də həmin ünvana gedib cavabdehin mənzili tərk etməsini tələb etmir. Nəticədə Qənirə Hüseynovanın hüquqları hər gün pozulur. Qənirə xanım deyir ki, təklifdən sonra məhkəmə icraçıları bir dəfə də olsun həmin ünvana getməyib və mübahisəli mənzilin boşaldılmasını tələb etməyib: “Mən başa düşə bilmirəm, məhkəmə icraçısı vəzifəsini niyə icra etmir? Məhkəməni saymır, yoxsa Azərbaycan Respublikası adından çıxarılan qərarı? İcra məmurunun vəzifəsi birbaşa qərarı icra etmək olduğu halda, Səbail rayon məhkəmə icraçıları bizə meydan oxuyur, nə şikayətdən qorxmur, nə də heç kimdən. Hər dəfə onlara müraciət edəndə icra məmurları bizi əliboş yola salır, mübahisəli mənzili boşaltmaq istəmir. Artıq iki ildən yuxarıdır ki, məhkəmə icraçıları tərəfindən süründürülürəm. Artıq səbrimiz tükənib. Hara, kimə şikayət edəcəyimizi bilmirik”.
Hüquqları kobud pozulan Qənirə xanım çarəsizlikdən prezident İlham Əliyevə, xanımı Mehriban Əliyevaya və ədliyyə naziri Fikrət Məmmədova müraciət edib məhkəmə icraçılarının özbaşınalığına son qoyulması və pozulmuş hüquqlarının bərpasını xahiş edir.
