50 FAİZ SƏLƏMİ SIRIYAN BANK CƏLİLABAD SAKİNİNƏ MÜSİBƏTLƏR YAŞADIB
Unibanka görə anam özünü öldürüb, atam isə özünə qəsd edib.
Unibank 43 min dollara qarşı 64 min pul tələb edir – 21 min dollar sələm!
Unibank əhalinin evlərini yarı qiymətinə əllərindən alır
Eşidirsənmi, Elman Rüstəmov, sənin ölkəyə doldurduğun bankirlər əhaliyə reketsayağı sayğac qoşurlar
Unibank insanların avamlığından istifadə edərək onlara min cür kombinasiyalar qurur ki, tələyə salsın və əmlakı vətəndaşların əlindən alsın...
Unibank 43 min dollara qarşı 64 min pul tələb edir – 21 min dollar sələm!
Unibank əhalinin evlərini yarı qiymətinə əllərindən alır
Eşidirsənmi, Elman Rüstəmov, sənin ölkəyə doldurduğun bankirlər əhaliyə reketsayağı sayğac qoşurlar
Unibank insanların avamlığından istifadə edərək onlara min cür kombinasiyalar qurur ki, tələyə salsın və əmlakı vətəndaşların əlindən alsın...
DİA.AZ: - Redaksiyamıza daha bir kredit qurbanının faciəli hekayətini anladan şikayət məktubu daxil olub. Cəlilabad şəhəri, Tomrus küçəsi, ev 17 ünvanında yaşayan Adıgözəlova Gülşən Məktub qızı DİA.AZ-a başına gələn oyunları yazır:
“2008-ci ildə ərim Unibankdan kreditlə maşın almışdı. Mersedes markalı maşının qiyməti servisdə 35 min manat idi. Həmin maşın Unibankda girov qoyuldu, pulun 25 minini bank verdi, 10 minini isə nağd öz cibimizdən servisə ödədik. Ayda 800 manatdan 3 il müddətində bu başkəsənlərə pul ödəməliydik. Məsələ burasındadır ki, bu 25 minin əvəzinə bunlara 32 min manat pull qaytarmalıydıq, ödəyə bilməyəcəyimiz təqdirdə isə maşınımızı bank əlimizdən alacaqdı. Şərt belə qoyulmuşdu. Sağ olsun Milli Məclisdəki deputatlarımız ki, bu cür ağır şərtlərlə qan soran bankları ölkəmizə buraxıblar! Sağ olsun Elman Rüstəmov ki xalqın avamlığından istifadə edib sələmçi başkəsənlərə qanımızı içməyə imkan verib! Hətta pulun yarısını da aybaay vaxtında ödəsəydik və daha imkanımız olmasaydı ödəməyə, vəssalam, Unibank yenə də maşınımızı əlimizdən alacaqdı və ödədiyimiz artıq pulları da geri qaytarmayacaqdı! Bu necə bankçılıqdır?! Bunlar Azərbaycanı nə hesab edirlər? Amerikada nə qədər murdar sistem var hamısını gətirib doldururlar Azərbaycana! Bir də ayılmışıq ki, minlərlə, on minlərlə insanın bu yolla əmlakını əllərindən alıblar.
8 aya yaxın stabil olaraq bu banka 800 manat hər ay pul ödədik. Ailə vəziyyətimizin çətin olmasına baxmayaraq. Qoca valideynlərimin pensiyasını toplayır, qalan pulu isə ərim maşınla qazanırdı. Sonra maşın qəzaya düşdü, əzilib yararsız hala düşdü. Avariyadan sonra artıq banka pul ödəmək imkanımız məhdudlaşdı. MBASK adlı elə bu şirkətin rəhbərliyinə məxsus olan Sığorta Şirkəti bizdən 1500 sığorta üçün pul almışdı, lakin maşınımız əziləndə bir qəpik də pul vermədi. MBASK müxtəlif bəhanələr gətirərək maşını düzəltdirməkdən imtina etdi. Bizi tora salmaq üçün əllərindən gələni etdilər. Xahiş edirəm ki, müraciət etdiyim hüquq-mühafizə orqanları MBASK adlı fırıldaqçı sığorta şirkəti ilə də maraqlansınlar. Bu təşkilatın əslində nə işlə məşğul olduğu, kimlərə, nə vaxt və nə qədər sığorta ödədiyi üzə çıxarılsın. Havadan şirkət yaradıblar və milyonlar qazanırlar. Heç kimə heç nə vermirlər və yalnız yığım işinə baxırlar. Həmin sığorta şirkətinin oyunlarına son vermək, aferalarını dayandırmaq lazımdır.
Maşın əziləndən sonra bank bizdən pulu tələb etməyə başladı. Onlar bizə təzyiqlər edir, tez-tez idmançı görkəmli adamları evimizə göndərirdilər. Anam hər dəfə onların gəlişindən stress keçirirdi. Bankın işçiləri bizi məhkəməyə verməkləri ilə hədələyir, evimizi banka girov qoymağımızı istəyirdilər. Biz təzyiqlərdən, onların evimizə gəliş-gedişindən, yaratdıqları stresslərdən bezib, məcbur qalaraq təklif etdik ki, evimizi onlara girov qoyub pul götürək. Onlar bizə dedilər ki, evi girov qoyduğunuza görə sizə pul versək, onda maşından qalmış 15 min manat qalıq borcunuzu da cıxacağıq. Məcbur qalıb razılaşdıq. Bu məsələni də xahiş edirəm araşdırın. Mən evimi onlara girov qoyub pul götürrəmsə, niyə maşının pulunu çıxmalıydılar? Və yerdə qalan kiçik məbləğlə nə iş görməliydim ki, bunlara hər ay külli-miqdarda sələm ödəyim? Unibank insanların avamlığından istifadə edərək onlara min cür kombinasiyalar qurur ki, tələyə salsın və əmlakını əlindən alsın.
Daha bir maraqlı cəhət ondadır ki, Unibank satış qiyməti 75 min manat olan evimizə cəmi 43 min manat qiymət qoydu, bu da 34 min manat eləyir. Yəni məlumatınız olsun ki, Unibank əhalinin evlərini yarı qiymətinə əlindən alır. Baş Prokurorluqdan xahiş edirik ki, Unibankın ev maxinasiyaları ilə bağlı bütün talançılıq, soyğunçuluq aktlarını araşdırsın, bütün mühasibat kağızları geniş şəkildə yoxlasın. Bu gün sadə Azərbaycan vətəndaşları böyük bir cinayət cindikatı ilə üz-üzə qalıb. Dövlət öz vətəndaşlarını qorumalıdır, sələmçi reketləri yox!
Biz o vaxt evimizi rahat şəkildə 75 min manata sata bilərdik, amma bizi tələyə salıb evimizi 43 min dollara (34 min manata) girov götürdülər. Bizə isə cəmi 19 min manat verdilər, dediyim kimi 15 min manatı maşının köhnə borcuna çıxdılar. Lakin... bizə kağız verdilər ki, Unibanka nə az nə çox, 64 min dollar pul ödəməlisiniz. 43 minə qarşı 64 min! Götürdüyümüz pulun üstündə bunlara 21 min dollar sələm ödəməliydik. Təxminən 50 faiz! Eşidirsinizmi, hörmətli Azərbaycanımızın dövlət rəhbərləri, idarəçi cənabları! Unibank 50 faizlik kredit paylayır. Verdiyi 43 min dolların üstündə 21 min dollar sələm alır! Əhsən belə yaşayışa! Azərbaycan sələm sahəsində günü-gündən iri addımlarla irəliləyir! Tezliklə Bakıda Unibankın ələ keçirdiyi evlər sayəsində böyük mikrorayonlar əmələ gələcək.
Aya nə az nə çox, 1779 dollar Unibanka pul ödəməliydik. Əlbəttə ki bu Azərbaycan standartları üçün real deyil. Yəqin özünüz də bilirsiniz ki, Unibank kimi sələmçi banklar hansı oyunlardan çıxır, hansı kombinasiyaları qurur, tələlər yaradırlar ki, son nəticədə əhalinin əmlakına sahib çıxsınlar. Bütün bunlar dəfələrlə deyilib, mətbuatda yazılıb, dövlət orqanlarına çoxlu şikayətlər olunub, amma nədənsə dövlət sələm genosidini dayandırmağa tələsmir.
Elə birinci aydan bizim ödənişlə bağlı problemlərimiz yarandı. Özünüz də bilirsiniz ki, 1779 dollar heç Azərbaycanda nazirlər maaş almır. O pulu götürəndən sonra çətinliklə birinci ay 1779 dollar, sonrakı aylar 1240 dollar, 2000 dollar pul ödəmişik, lakin maraqlıdır ki, Unibank o pulları da hesaba almır, gecikdirdiyimizə görə faizə çıxır. 5000 dollarımız da belə getdi! Eşidirsənmi, Elman Rüstəmov, sənin ölkəyə doldurduğun bankirlər əhaliyə reketsayağı sayğac qoşurlar. Əlimizdə olanları son qəpiyinə kimi tutub alır, hələ özümüzü də borclu çıxardırlar. 5000 dollar ödədiyimiz pulun çekləri olduğu halda Unibankın reketləri onu da faizə çıxıblar. Deməli pullarımız havaya uçub.
Bundan sonra Unibank bizi məhkəməyə verdi. Məhkəmə bizim evdən çıxmağımız haqda qərar qəbul etdi. Bu qərardan Bakı Apellyasiya Məhkəməsinə şikayət verdim. 3 dəfə məhkəmə iclası keçirildi, lakin Unibankın işçisi həmin məhkəmə iclaslarının heç birinə gəlmədi. Xahiş edirəm bu qanun pozuntusuna da hüquqi qiymət verəsiniz. Demək belə çıxır ki, mən ağ bayraq qaldırmalı, özüm öz əllərimlə gətirib evimin açarını Unibanka təhvil verməliydim. Qanun müstəvisində olan məsələlər isə Unibankı maraqlandırmır, onlar öz imkanlarından, əlaqələrindən istifadə edərək qanunçuluğa da məhəl qoymur, acgözlüklə talana rəvac verirlər. Mənim şikayət məktublarımdan sonra Dövlət orqanlarına yazdıqları cavabda bildirirlər ki, guya mən Apellyasiya məhkəməsinə sayğısızlıq göstərmişəm, halbuki 3 dəfə iclas çağırılıb, heç birində onlar tərəfdən gəlməli olan nümayəndə iştirak etməyib. O necə olur ki, 75 min manatlıq evi əlimizdən alırlar, amma məhkəmə iclasına gəlmirlər. Xahiş edirəm ki, bu məsələyə də diqqət edəsiniz, cinayət işi açıb araşdırasınız. Unibank bu cür iyrənc metodlardan, oyunlardan istifadə edərək avam camaatın evini yıxır. Xahiş edirəm məni başa düşün, anam bu ağrı-acılara, onların təzyiqlərinə tab gətirməyib vəfat edib, atam isə özünə qəsd edib. Bu cinayətkar ünsürləri dövlətimiz cəzasız qoymamalıdır.
Apellyasiya Məhkəməsi 3 ay bizə toxunmamaq haqda qərar çıxardı ki, biz özümüzü toplayaq, ödənişləri edək. 3 aydan sonra Unibankın reketləri evimizə yenidən xaç yürüşlərinə başladılar. Milli Təhlükəsizlik Nazirliyindən xahiş edirəm ki, Unibankın Problemli Məsələlər üzrə Şöbəsinin fəaliyyətinin gizli yönlərini araşdırsın. Bu şöbələrdə işləyənlərin hərəsinin 5-10 evi, 5-10 xarici maşını var. Unibankın Problemli Məsələlər Şöbəsinin işçiləri əslində reket və soyğunçuluqla məşğul olurlar. Həmin işçilər hər 3 aydan bir evimizə təşrif buyurur, hədə-qorxu gəlir, hər dəfə 500 manat, 1000 manat alıb gedirdilər. Deyirdilər ki, bu pula 3 ay da sizin vaxtınızı uzadacayıq, elə edəcəyik ki, bank sizə toxunmasın. Üst-üstə həmin işçilərə 2500 manat pul vermişik, o pullar heç bir yerdə qeydiyyata alınmayıb. Həmin pulları Unibankın Problemli Məsələlər üzrə Şöbəsinin reket işçiləri alıb öz ciblərinə qoymuşlar. Onlar bankın ev məsələlərində həmişə bu üsullardan istifadə edir, çoxlu qanunsuz pullar qazanır, eləcə də girovda olan evi, ya maşını əldən-ələ oformit edərək özləri sahib çıxır, dəyər-dəyməzinə öz əllərinə keçirib sonradan baha qiymətə satıb varlanırlar. Camaatın taleyi bunlarçün oyuncağa çevrilib. Milli Təhlükəsizlik Naziri Eldar Mahmudovdan bu məsələlərin tam araşdırılmasını xahiş edirəm.
Hal-hazırda evimiz qanunsuz olaraq Unibankın əlindədir. Bizim razılığımız olmadan evə 2 bahalı oxrana, gözətçi qoyublar. Onlara aylıq 700 (!) manat maaş sənədləşdiriblər. Biz etiraz edib bu qiymətlə razılaşmadıq, ucuz oxrana tutulmasını istədik. Lakin dedilər ki, hər şey bizim əlimizdədir, nə qədər istəyirik o qədər də hesablayacayıq. O pulu da bizim hesabımıza yazırlar ki, siz ödəməlisiniz. Qəribədir, bizim razılığımız olmadan, bizim hesabımıza öz işçilərinə 700 manat pul yazırlar, bu yolla da çoxlu mənimsəmə ilə məşğul olurlar. Respublikanın güc strukturlarından xahiş edirik ki, bu məsələ ilə də məşğul olsunlar. Biz 1 ildir evdən çıxmışıq. İndi belə çıxır ki, bir maşının pulunu da Unibankın oxranasına ödəməliyik.
Unibankdakı reket yoldaşlar heç bir hüquqi kağız olmadan evimizə sahib çıxmaq istəyirlər, lakin alınmır. Onlar əlaqədar instansiyalardan tələb edirlər ki, qanunsuz olaraq bizi öz evimizdən qeydiyyatdan silsinlər. Xahiş edirəm ki, buna imkan verməyin. Hakimiyyətdəki tanışlarından, öz şirnikləndirici imkanlarından istifadə etməklə əhalinin evlərinə beləcə yiyələnirlər. Bir müddət nə qədər təkid etdiksə, nə evimizi satmağa qoydular, nə də özləri satdılar. Mən ailəmiz adından tələb edirəm ki, Unibanka qarşı cinayət işi açılsın, bu sələmçi təşkilatın əlində olan evimiz özümüzə qaytarılsın. Xahiş edirik ki, bizə köməklik edin və xalqı qaniçən yırtıcıların əlindən qurtarın”.
Qarşı tərəfi də dinləməyə hazırıq...
