ARZU KAZIMOVUN VƏKİLİ HƏRƏKƏTDƏ
İş adamı Arzu Kazımovun vəkili Ramiz Zeynalov Baş Prokurorluqda olub və Baş Prokuror cənab Z.Qaralovun adına və Xüsusi İstintaq Komissiyasına Mahir Abdullyaevin cinayət işi üzrə vəsatət verib. “Təzadlar” qəzeti redaksiyasında olan vəkil R.Zeynalovdan şok məlumatlarla dolu müsahibə aldıq və həm də vəsatət barədə məlumat öyrəndik:
- Ramiz müəllim, bildiyimizə görə, bu gün (dünən -red.) Siz Baş Prokurorluqda və Xüsusi İstintaq Komissiyasında olmusunuz...
- Bilirsiniz ki, Mahir Abdullayevin işi ilə bağlı istintaq intensiv iş aparır... Mənim isə bu iş üzrə vəsatətim var idi, onu təqdim etmişəm...
- Vəsatətdə nələr ifadə olunub? Yəni, istintaq orqanından nəyi xahiş edirsiniz?
- Mən qəzetinizə verdiyim son müsahibəmdə də bildirmişəm ki, Elşad Abdullayev məqsədli şəkildə, qardaşının ölüm işində təqsirkar olması baxımından gələcəkdə özünün cinayət məsuliyyətindən azad etdirilməsi üçün planlaşdırılmış şəkildə qanunsuz olaraq gizli videolar çəkib əldə etmiş, Azərbaycandan gedəndən sonra Fransadan onları yayıb Azərbaycanın istintaq orqanlarını təhdid etməyə, onun məsuliyyətini nə vaxtsa tələb edəcək ayrı-ayrı şəxsləri, tanınmış simaları şantaj etməyə başlayıb. Sual vermişdim ki, niyə bu videolar Azərbaycanda olanda ictimailəşdirilmirdi? Mane olan nə idi? Həmin KİV-lər onda da onları yayacaqdılar axı... Əgər o videodakılar həqiqət idisə, şantaj deyildisə, bunları burda və vaxtında etmək lazım idi. Və o, bir müddətdir ki, “Vikileaks” saytının məşhur yaradıcısı Culia Accans kimi başlayıb kim onun barəsində danışa və qanun tələb edə bilər, onları hədələməyə. Artıq “divar” da qurtarıb, videolar bitib. Məlum olur ki, heç bir yerdə kiməsə pul verməsi barədə konkret pulsaydı hərəkətləri yoxdur. Hamısı aldadılmış və təhrik edilmiş şəxslərin çayxana söhbətləridir... Bunlar açıq şantaj, təhdid etmək imiş... Bəli, mən bu gün Prezidentin göstərişi ilə Baş Prokurorluqda yaradılmış Xüsusi İstintaq Komissiyasında oldum, XİK-yə, Baş Prokuror cənab Z.Qaralovun adına yazılmış vəsatət təqdim etmişəm. İndi məhz Sizin qəzet vasitəsi ilə istintaqa prosessual nəzarəti həyata keçirən orqanın rəhbərliyinə müraciət edirəm: təcili surətdə E.Abdullayevə, qardaşlarına, yaxınlarına məxsus Bakı şəhərində, Şamaxıda və s. ərazilərdəki bağ, mülk, villa və s. obyektlərində, ticarət, iaşə obyektlərinin ərazisində istintaq yolu ilə axtarış aparılması təmin olunsun! 9 il keçməsinə baxmayraq həmin torpaq sahələrində qazıntılar aparılsın, digər zəruri istintaq-axtarış hərəkətləri təmin edilsin. Bilavasitə Mahir Abdullayevin nəşinin tapılması üçün bütün tədbirlər görülsün. Meyidin tapılması, keçiriləcək ekspertizaların təşkili üçün, E.Abdullayevin qardaşının öldürülüb yox edilməsi cinayətində iştirakçı olmasının müəyyənləşməsində bunlar böyük rol oynayacaqdır. Bu gün artıq o hadisədən 9 il keçsə də, bu cinayət işinin açılmasına açıq deyirəm ki, bir addım qalmışdır... Bu ölüm işi, yəni ölümə suiqəsd cinayəti artıq açılmaq üzrədir. Bəzi detallar var ki, istintaq sirri sayılır və hələlik hamını səbrli olmağa səsləyirəm... Və bütün bunların tez olması üçün yuxarıda qeyd etdiyim və hələlik ictimaiyyət üçün deyə bilmədiyim, vəsatətimdə konkret sübutlara söykənib yazmışam, bəzi istiqamətlər üzrə istintaq hərəkətlərinin təcili və təxirəsalınmaz qaydada aparılmasını xahiş etmişəm. Eyni zamanda məndə olan məlumat və ehtimallara görə, E.Abdullayevin bu cinayət izi Kürdəmir rayonuna da gedib çıxır və eyni hərəkətlər orada da həyata keçirilməlidir. Həmçinin Mahir Abdullayevin qardaşı Elşad Abdullayevin təqibindən qaçıb evində gizləndiyi qohumlarının dindirilməsi təmin edilməlidir. Məndə özəl məlumatlar və sübutlar var, vəsatətimdə göstərmişəm, bunlar istintaq yolu ilə aydınlaşdırılmalıdır... Bütün bunlar təxirəsalınmaz qaydada tez aparılmalıdır...
- Ramiz müəllim, bu cür sərt ittihamlar ortaya qoyursunuz. Amma eyni zamanda nəzərə alaq ki, E.Abdullayev axı istintaq orqanı tərəfindən zərərçəkmiş şəxs kimi tanınıb...
- Bəli, doğru buyurursunuz... Mən də E.Abdullyauevin qardaşının ölüm işində iştirakçı olmasını və s. nəzərə alıb vəsatət vermişəm ki, istintaq orqanı onun zərərçəkmiş kimi tanınması barədə qərarını ləğv etməli, E.Abdullayev təqsirləndirilən şəxs qismində istintaqa cəlb olunmalıdır, o, həbs edilməlidir. Bilirsiniz ki, 2003-cü ildə Mahir Abdullayevin itkin düşməsi ilə bağlı Bakı şəhər Baş Polis İdarəsində cinayət işi başlanılmışdı... Lakin sonradan bu cinayət işi ölümə suiqəsd cinayətinə tövsif olunmuş və istintaqı Bakı şəhər Prokurorluğunun istintaq idarəsinə həvalə olunmuşdur... Deməli, hələ o vaxt kifayət qədər istintaq-əməliyyat məlumatları olmuşdur ki, bəli, M.Abdullayev itkin düşməmişdir, öldürülmüşdür... Unutmayın ki, E.Abdullayev da məhz istintaqın təyinat istiqaməti dəyişdikdən sonra məlum videolarını işə salıb Mahirin öldürülməsindən fikri yayındırmaq, qohumlarının da diqqətini bu istiqamətə yönəltmək üçün bəzi şəxsləri dilə tutaraq Mahirin axtarılması sövdələşmələrinə süni surətdə cəlb etmiş, məhz bu günü üçün şantaj videoları əldə etmişdir... Bundan əlavə, o, bir az da qabağa gedərək lap son günlərə kimi aidiyyəti qurumlara, Prezidentə və s. ünanlara da məqsədli şəkildə Mahirin itkin düşməsi və axtarılıb tapılmaması barədə şikayətlər etməyə başlamışdır. Bu da izi azdırmaq üçün edilib. Bu “hüquqşünas-akademik” özü bilə-bilə ki, artıq qardaşı Mahirin itməsi yox, öldürülməsi ilə bağlı cinayət işi istintaq olunmaqdadır, yenə də şantajından əl çəkmir...
- Elə isə, bu cinayət işində başqa kimsə zərərçəkmiş şəxs qismində tanınmalıdır...
- Bəli, vəsatətimdə bildirmişəm ki, E.Abdullayev qardaşının ölümündə birbaşa iştirakçı olduğu üçün, həm qanunvericilik baxımından, həm də milli mentalitet baxımından o, zərərçəkmiş şəxs kimi tanına bilməz. Ona görə də Mahir Abdullayevin həyat yoldaşı zərərçəkmiş şəxs qismində tanınmalıdır, istintaq orqanı bu barədə yeni qərar qəbul etməlidir... Bununla da E.Abdullayevin təqsirləndirilən şəxs kimi, bu cinayətdə birbaşa iştirakçı olması əsasında Fransa Ədliyyə Nazirliyi qarşısında məsələ qaldırılaraq onun Azərbaycana təhvil verilməsi təmin ediləcəkdir... Sizin qəzet vasitəsi ilə Baş Prokurordan xahiş edirəm: bundan əvvəl Fransanın Azərbaycandakı səfirliyinə, Fransa XİN-nə müraciətlərim olmuşdur, KİV-də dərc olunubdur. Bu orqanlar qarşısında onun Azərbaycana ekstradisiya olunması məsələsi rəsmi qaydada qaldırılsın!
-Deməli, bu vəsatətin verilməsinə ciddi hüquqi əsaslar vardır...
-Bəli... Mənim Sizin qəzetdə dərc olunmuş, sonradan ölkənin bütün KİV-lərində yayılmış (hamısına təşəkkür edirəm) müsahibəmdən sonra mənə çoxlu sayda telefon zəngləri, mesajlar və elektron məktublar gəlmişdir... Vətəndaşlar mənə təşəkkürlər etməkdən başqa, onlar həm də E.Abdullayevin həbs edilməsini, ifşa olunmasını tələb edirlər. Bu sırada çoxsaylı valideynlər var ki, aldadılaraq pulları alınıb, övladları qanunsuz yolla ABU-ya qəbul etdirilib... Bu saxta sənədlərin istehsalında E.Abdullayevin yaxınları, bəzi müəllimlər, işbazlar iştirak ediblər. Onların hamısı dindirilməli, cavab verməlidirlər. Bütün bunları nəzərə alıb Sizin qəzet vasitəsilə Baş Prokurora, ölkə ictimaiyyətinə bir daha müraciət edirəm ki, istintaqa kömək edəcək insanlar dövlətimiz qarşısında böyük xidmət etmiş olacaqlar. E.Abdullayev Fransada oturub bəzi şəxslərin timsalında bütün Azərbaycanı ifşa edir, dövlətimizi gözdən salır, aşağılayır. Bir nəfərin şəxsi iddiası ilə dövlimizin ifşa olunub aşağılanmasına susaqmı?
Üzümü E.Abdullayevin Kürdəmir rayonunda yaşayan qohumlarına tuturam: nə qədər gec deyil, M.Abdullayevin qardaşı E.Abdullayevə məxsus, ABU-dan toplanmış pulları götürüb gedərkən gizləndiyi vaxtlarda şahidi olduğunuz hadisə və malik olduğunuz informasiyalar barədə istintaqa məlumat verin, kömək edin. Bu, həqiqətin üzə çıxmasına səbəb olar, hamımızın, elə qohumların da baş ağrısına səbəb olmuş bir məsələyə son qoyulması tezləşər.
- Deməli, siz ölüm faktına tam əminsiniz...
- Yüz faiz... Bir daha təkrar edirəm, E.Abdullayev qardaşının ölüm işində birbaşa iştirakçı olduğundan o, zərərçəkmiş kimi yox, təqsirləndirilən şəxs kimi tanınmalıdır... Sonda bir məsələni də deyim. Vəsatətimdə həm də qeyd etmişəm ki, E.Abdullayevin indiyədək törətdiyi bütün cinayət əməllərində, həmçinin qanunsuz yolla, xüsusi texnikaların vasitəsilə əldə etdiyi şantaj məqsədli, gizli video-çəkilişlərdə ona qaynatası H.Əhmədovun, qaynı, MTN-də idarə rəisinin müavini olmuş Mustafa Əhmədovun böyük rolu olmuşdur, istintaq onları bu istiqamətdə dindirməlidir. Həmçinin istintaq E.Abdullayevin qaynı Mustafa Əhmədovu MTN-də məsul vəzifə tutduğu halda, bu yaxınlarda qəflətən Fransaya qaçaraq E.Abdullayevin yanında gizlənməsi faktını araşdırıb, onun hərəkətlərinə hüquqi qiymət verməlidir... \ “Təzadlar” \
