Hörmətli nazir,
Prezident cənab İlham Əliyev sizi bu vəzifəyə təyin edərək elə nazirliyi qara güvvələrin əindən xilas etmişdir. Çünki, əvvəllər bu postu tutan Əli Abbasovun yarıtmaz əməllərindən, daha dəqiqi isə, onun bir qrup keçmiş MTN generalları ilə əlbir olaraq törətdikləri cinayətlərin məhkəmə prosesləri hələ də davam etdirilir.
Məlumat üçün bildirim ki, mənimlə eyni kənddən olan Anar Məhərrəm oğlu Məhərrəmov keçmiş MTN-nin Göygöl, Ağstafa rayon şöbələrinin rəisi vəzifəsində işləyərkən, öz qulluq mövqeyindən istifadə etməklə və aldatma yolu ilə mənim ümumilikdə 200.000 ABŞ dolları məbləğindən çox əmlakımı və pullarımı mənimsəmişdir. Onun bu cinayət əməlləri barədə mən hüquq-mühafizə orqanlarına etdiyim müraciətlər əsasında hal-hazıra kimi araşdırmalar aparılır.
Keçmiş “MTN-çi rəis” Anar Məhərrəmov və onun dəstə üzvüləri göstərdiyim səbəbə görə mənə qarşı təxribatlar edərək bacardıqları qədər təsirlər göstərməklə, məni bu işlərdən yayındırmaq üçün dəridən-qabıqdan çıxırlar. Anar Məhərrəmov vəzifədə olarkən, rayonda-kəndimizdə müxtəlif sahələrdə işə qoydurduğu öz adamlarının və qohumlarının vasitəsi ilə haqq işimə əngəllər törətməyə çalışır və bəzən də buna nail olmuşlar. Mən isə dövlətin qanunlarının aliliyinə inandığım üçün sonacan bu mütəşəkkil dəstə ilə mübarizəmi davam etdirəcəm. Çünki, bu mübarizəni aparmağa mənim haqqım var və mənə güç verən vicdanımdır.
Mənim müraciətimin səbəbi aşağıdakılardır: göstərdiyim kimi, hüquq-mühafizə orqanlarına şikayətlərimizlə əlaqədar mənim və ailə üzvlərimə poçt vasitəsi ilə sənədlər yollanılır. Lakin, həmin sənədlərin bəziləri gec çatdırılır, bəziləri isə ümumiyyətlə bizə verilmirdi. Mən sənədləri yollamış olan dövlət orqanlarında təkrar olarkən, orada ünvanımıza yollanmış sənədlərin surətlərini mənə təqdim edirdilər. Bu səbəbə məndə şübhə yaranmışdı ki, mənim poçt sənədlərimə əngəl törədən Tovuz Poçt Filialının Düz Qırıqlı kənd 6025 saylı poçt şöbəsinin poçtalyonu Süleymanov Elməddin Faxrəddin oğludur. O, “MTN-çi rəis” Anar Məhərrəmovun əmisi qızının həyat yoldaşıdır və onu əvvəllər həmin poçt şöbəsinin rəisi vəzifəsinə düzəltmişdi. Lakin, 3 il qabaq poçtun pullarını mənimsəmək məqsədi ilə Elməddin Süleymanov özü başını divara vurub yaralamış və guya soyğunçuluq olması barədə polisə yalan məlumat vermişdi. Polisdə yalanın üstü açılanda, Anar Məhərrəmov məsələni ört-basdır etdirmişdir. Elməddini isə poçtalyon vəzifəsinə keçirmişlər.
Beləliklə, 27.03.2018-ci il tarixdə mən və həmkəndlim Əmrahov Xalidlə təsadüfən izləyib şahid olduq ki, poçtalyon Süleymanov Elməddin kənddə aviakassada satıcı işləyən – Anar Məhərrəmovun qaynı Vüsal Bağırovun maşınında onunla Tovuz rayonuna gedib poçtu alıb, yenə kəndə qayıtdılar və Vüsalın evinə gedib az sonra yenə maşınla geri qayıdanda onları maşınla izlədiyimi görüb yollarını dəyişdilər, lakin mən onları izlədiyimi büruzə verdim və onlar başqa yolla poçta getmək üçün yenə istiqaməti dəyişdilər. Mən isə maşınımı poçtun qarşısına sürüb dayandım. Başqa küçədən poçta gələn Vüsal Bağırov kənarda poçtalyon Elməddin Süleymanovu düşürüb getdi. O, isə məcbur olaraq poçta gəldi. Poçtun rəisi Fərid Hüseynovun otağında məlum oldu ki, həmin gün kəndə ancaq mənə poçt gəlib. Həmin 3 məktub – prokurorluqdan və məhkəmədən gələn sənədləri poçtalyon Elməddin Süleymanov Bağırov Vüsalın evində açıb oxuyublar. Çünki, zərflərə baxanda aydınca görünürdü ki, açılıb və yenidən yapışdırılıb.
Poçtun rəisi Fərid Hüseynova bildirdim ki, bu birinci dəfə deyil, mən bu barədə sizə əvvəllər məlumat vermişdim ki, 1 ilə yaxındır ki, mənə gələn məktublar yoxa çıxır, ya da açılıb oxunur. Nə üçün mənə gələn məktublar Anar Məhərrəmovun qaynı Bağırov Vüsalın evində açılıb “saf-çürük edilir”? Vüsalın marağı olmasa aviakassanı bağlayıb başqasının işi üçün getməz. Poçt rəisi isə poçtalyon Elməddinə bu sualı verəndə o, qeyri-müəyyən bir cavab verib dedi ki, “Rəfail bizi bir yerdə görməməsi üçün Vüsal maşını başqa istiqamətə sürdü”. Rəis mənə söz verdi ki, poçtalyon barəsində tədbir görəcək.
Məlumat üçün bildirirəm ki, 2(076)-123/2017 saylı iş üzrə 08.01.2018-ci il tarixdə ünvanımıza yollanmış Şəmkir rayon məhkəməsinin qətnamələri poçtalyon Elməddin Süleymanov gizlədib bizə vermədiyi üçün, vaxtında Apellyasiya şikayəti verə bilməmişdik. Ötürülmüş müddəti bərpa etmək üçün məhkəməyə müraciət edəndə, 01 may 2018-ci il tarixdə keçirilən məhkəmə iclasında hakim qətnaməni almağımız barədə poçt qəbzlərini bizə təqdim edəndə aşkar oldu ki, imzalar bizim deyil.
Şəmkir rayon məhkəməsinin hakimi Nemət Paşayev bu barədə Tovuz rayon Poçt şöbəsinə sorğu edəndə, poçtalyon Elməddin Süleymanov izahat vermişdir ki, guya xəbərnamə ilə yollanılmış qətnamələri 20.01.2018-ci ildə özümüzə vermiş və almağımız barədə jurnalda imzalatdırmışdır. Lakin baxış zamanı poçt jurnalındakı imzaların bizim olmadığı aşkar olundu, yəni jurnala Elməddin Süleymanov özü imza etmişdir. Həmin imzalanmış səhifənin fotoşəklini müraciətimə əlavə edirəm.
Poçtalyon Elməddin Süleymanov bu əməlləri qohumu – keçmiş “MTN-çi rəis” Anar Məhərrəmovun sifarişi ilə ona görə edir ki, Anar Məhərrəmov, onun qaynı Vüsal Bağırov və əlaltısı Əli Rzayev barəsində mənim şikayətlərimə əngəllər törətsinlər. Elə bu səbəbə də, ünvanımıza yollanmış çox saylı poçt sənədləri bizə verilməmişdir.
Keçmiş “MTN-çi rəis” Anar Məhərrəmovdan etmiş oduğum şikayətlərlə əlaqədar dövlət orqanlarından mənə yollanmış sənədlər Tovuz Poçt Filialının Düz Qırıqlı kənd 6025 saylı poçt şöbəsinin poçtalyonu Süleymanov Elməddin tərəfindən Anar Məhərrəmovun qaynı Bağırov Vüsalın evində açılıb yoxlanılır, oxunur, sonradan ya məhv edilib bizə verilmir, ya da vaxtından gec verilir. Çünki, son 8 ay ərzində Respublikanın Baş Prokurorluğundan, Ombudsmandan, Milli Məclisdən, Tovuz, Şəmkir rayonlarının prokurorluq, polis və məhkəmələrindən yollanmış sənədlərin bir çoxu mənə çatdırılmasa da, xəbərnamələrdə həmin sənədlərin mənə verildiyi göstərilmişdir.
Hörmətli nazir,
Azərbaycan Respublikasının Konstitusiyasının 32-ci maddəsinə əsasən hər kəsin şəxsi toxunulmazlıq hüququ vardır və hər kəsin yazışma, telefon danışıqları, poçt, teleqraf və digər rabitə vasitələri ilə ötürülən məlumatın sirrini saxlamaq hüququna dövlət təminat verir.
Göstərdiklərimi nəzərə alaraq Tovuz Poçt Filialının Düz Qırıqlı kənd 6025 saylı poçt şöbəsinin poçtalyonu Süleymanov Elməddin Faxrəddin oğlu öz qulluq mövqeyindən sui-istifadə etməklə xidməti səlahiyyətlərinin hüdudlarından açıq-aşkar surətdə kənara çıxan hərəkətlər etdiyi üçün barəsində Qanunvericilikdə nəzərdə tutulmuş tədbirlərin görülməsini Sizdən xahiş edirəm.
Hörmətlə, Hümmətov Rəfail Talıb oğlu Tovuz rayonu, Düz Qırıqlı kəndi
365İNFO.ORG
