Təxminən 3 ay bundan öncə 66 yaşlı Cənnətov Mirabbas Səlim oğlu ev problem ilə bağlı redaksiyamıza şikayət daxil etmişdi.
Mirabbas Cənnətovun şikayətinə görə, Yeni Yasamal ev 7, mənzil 18 ünvanında ona verilən 5 otaqlı mənzil 1992-ci ildə Şuşa rayonundan olan məcburi köçkün tərəfindən zəbt edilib. Hətta şikayətçi Yasamal Rayon İcra Hakimiyyətinə, Yasamal Rayon Məhkəməsinə şikayət etdiyini, məhkəmənin isə şikayətçinin evinin boşaldılması ilə bağlı qərar çıxartdığını, Yasamal Rayon Məhkəməsinin İcra şöbəsində işləyən icraçı Samir adlı şəxsin onu get-gələ saldığını və hər gün müxtəlif bəhanələrlə məsələdən yayındığını bildirmişdi. Biz də Yeniçağ.az saytı olaraq, məsələni diqqət də saxlayıb araşdırmalara başladıq.
Şikayətlə bağlı Yasamal Rayon İcra Şöbəsində icraçı vəzifəsində işləyən Samir adlı şəxslə əlaqə saxladıqda o, hər dəfə müxtəlif bəhanələrlə sualdan yayındı, sonra da ümumiyyətlə, zənglərimizə cavab vermədi.
Cənnətovlar ailəsinin yaşadığı evi gözlərimizlə görmək üçün onlara yollandıq.
Artıq 17 ildir ki, Cənnətovlar ailəsi Qaradağ rayonu Ümid qəsəbəsində müvəqqəti yaşayış adı ilə sığındıqları evdə rahat yaşayışa həsrət qalıblar. Çünki uçub tökülən bu evə 9 nəfər, xüsusən də körpə əkizlər sığınıb. Müşahidələrimiz zamanı ailənin sığındığı evin həqiqətən də onların həyatı üçün böyük təhlükə mənbəyinə çevrildiyinin şahidi olduq. Evin bir hissəsi uçub dağılmışdı, tavanı belə çökmüşdü. Doğrudan da 11 nəfər ailə üzvünün hər an ölümlə üzləşmək təhlükəsi var.
Bizi öncə evin xanımı Cənnətova Adilə Kərim qızı qarşıladı. Evin ağbirçəyi qorxu içindədir:
“Artıq 25 ildir ki, bizim halal zəhmətlə aldığımız evi Şuşa rayonundan olan məcburi köçkün zəbt edib. Biz isə – 11 nəfərlik ailə ilə küçələrdə qalmışıq. Bir neçə il kirayə qaldım, artıq kirayə pulunu verə bilmədiyimiz üçün gəlib, bu balaca daxmaya sığındıq. 1998-ci ildə Cənab Prezidentimiz İlham Əliyev Qaradağ rayonunun millət vəkili olduğu müddətdə ona müraciət etdik, bizə burada ev verdilər. Biz də kirayələrdə qalmaqdansa məcburən razılıq verdik. Bizim yaşadığımız hazırkı ev məcburi köçkünlərin yerləşməsi üçün tikilən həyət evləridir. Biz də bu evi alanda hələ yerləşməmiş, Yasamal Rayon İcra Hakimiyyətinə müraciət etdik ki, məcburi köçkünü bura göndərsinlər. Onlar da heç bir tədbir görmədi, məcburən özümüz ömrümüzü çürütməyə razı olduq. 17 ildir ki, hamımız bu uçuq damın altında yaşayırıq. Ailəmiz 11 nəfərdən ibarətdir. (əli ilə göstərir) Baxın suyun içində yaşayırıq, azca yağış yağan kimi damdan başımıza su tökülür. Divarlar da nəm, əl vurursan ovxalanıb tökülür yerə. Ev görürsünüz necə soyuqdur? İnanın, hər ay uşaqlara görə 100 manatlıq qaz yandırırq. Amma nə xeyri? Körpə uşaqlar böyüyür bu cür şəraitdə, hələ yeni doğulmuş əkizləri demirəm. Hamısı da xəstədir, bir tərəfdən də iynə-dərmana pul verməkdən yorulmuşuq. Bu qədər haqsızlıq olar? Hansı quruma da üz tuturuqsa nə şikayətimizə baxırlar, nə də bizi qəbul edirlər. Heç olmasa biri bizi qəbul etsin ki, biz də dərdimizi deyə bilək. Bu körpələrin nə günahı var ki, bunlar suyun içində yaşayırlar? Mənim bir oğlum 3 il, o biri də ilyarım erməni ilə sərhəddə, cəbhə bölgəsində xidmət ediblər. Biri elə ordan da xəstəlik tapıb gəldi. Hazırda ağciyər vərəmindən müalicə olunur. Biz kimdənsə çörək, su istəmirik ki… Öz evimizi istəyirik. Köməklik etsinlər öz evimizə qayıdaq, ya da bizi müvəqqəti normal şəraitdə olan bir evlə təmin etsinlər. Hələ 2014-cü ildə yanımızda “Qaçqınkom” ev tikdirib, məcburi köçkünlərə payladı, bizə isə vermədilər”.
Söhbət zamanı gözüm körpə əkizlərdə idi. Böyüklərin ümidi, inamı tükənsə də, əkizlər hələ heç nə başa düşmürdülər. Söhbətə evin ağsaqqalı Mirabbas Cənnətov qoşuldu:
“Mən ötən dəfə müraciətimdə də demişdim ki, Yasamal Rayon İcra Hakimiyyətinə, Yasamal Rayon Məhkəməsinə də şikayət etmişdim. Məhkəmə mənim Yeni Yasamaldakı evimin bir ay müddətinə boşaldılması ilə bağlı qərar çıxartmışdı. Qarşı tərəf isə Apellyasiya Məhkəməsinə şikayət etmişdi. Apellyasiya məhkəməsi də qərarı qüvvədə saxlamışdı. Daha sonra işi Ali Məhkəməyə vermişdilər. Ora da qərarı qüvvədə saxladı. 2 ildir ki, Yasamal Rayon Məhkəməsinin İcra şöbəsinin Samir adlı əməkdaşı məni get-gələ salır. Hər gün əlaqə saxlayıram, icraya gedirəm: ya məni “yola” verir, ya da məni görən kimi otaqdan uzaqlaşıb qəbul etmir. Hətta dəfələrlə Yasamal Rayon Məhkəməsinin qəbul otağına Samirin mənə qarşı çıxartdığı oyunlarla bağlı məlumat vermişəm. Onlar da deyiblər ki, “get, icraçıynan məsələni həll et”. Hətta Yasamal Rayon icra başçısı ibrahim Mehdiyevin qəbuluna getdim. Başçı məni hədələyib deyir ki, “çıx get burdan, bir də buralara gəlsən cibinə nəşə atdırıb səni tutduraram”. İndi də gəlmisiniz, yaşadığım güzaran da göz önündə. İndiyə qədər getmədiyim dövlət qurumu qalmayıb. Bundan sonra artıq harasa gedib, abrımı-həyamı itirmək istəmirəm. İstəyim yalnız ədalətin bəpa olunmasıdır”.
Daha sonra Mirabbas kişinin qızı Pərvanənin kənarda dayanıb gileyləndiyini gördük. Atasının sözlərinə qüvvət verən qızı balacalıqdan indiyədək əziyyət çəkdiklərini və xəstə olduqlarını söylədi:
“Atam hazırda məcburi köçkünün zəbt etdiyi evi alanda mənim 12 yaşım vardı. O, evin sənədlərini gətirəndə inanın biz elə sevinmişdik ki… (gözləri dolur). Atam o evi alanda anamın 38 yaşı vardı, indi isə 65-dir. 25 il bir igidin ömrüdür. Artıq gücümüz də tükənib, atam yazıq da tək qalıb. Əslində bizim indi yaşadığımız bu evi hökumət onlara vermişdi, çıxmadılar deyə, kirayələrə pulumuz çatmırdı deyə çarəsiz qalıb, köçdük bura. İllərdir bu uçuq damın altında canımız çıxıb. Adam da bu cür nəmişliyin, suyun içində yaşayar? Hara baxırsan üstümüzə uçub tökülür. Biz yaşadığımızı yaşadıq və çəkdiyimizi də çəkdik, heç olmasa bu körpələr çürüməsin burda. Allah bunların üzünə gülsün. Qul haqqı deyilən bir şey var, 25 ildir bizim haqqımıza giriblər. Bir ona dua edirəm ki, bu körpələrin haqqı bərqərar olsun”.
Söhbəti yekunlaşdırıb məsələyə tam aydınlıq gətirmək üçün Yasamal Rayon İcra Şöbəsinə yollandıq. Orada bizi heç bir icra məmuru qəbul etməsə də, müxtəlif bəhanələrlə məsələdən yayındırmağa çalışsalar da, məlum oldu ki, Mirabbas Cənnətovun işi artıq Samirdə deyil, Kənan Quliyevin icraatındadır. Kənan Quliyev isə artıq 2 aydır ki, işi icraata götürsə də, Mirabbas Cənnətovla nə əlaqə saxlayıb, nə də hansısa bir məlumat və ya bildiriş göndərməyib.
