Avropa İttifaqı ABŞ-nin İttifaq ölkələrindən idxal olunan mallara tətbiq etdiyi gömrük tariflərinin artırılmasına cavab olaraq bir sıra qarşı tədbirlər hazırlayıb. Lakin Aİ bu mərhələdə həmin tədbirləri tətbiq etməyəcək və məsələni danışıqlar yolu ilə həll etməyə çalışacaq.
Teleqraf xəbər verir ki, bu barədə Avropa Komissiyasının rəhbəri Ursula von der Layen bildirib.
“Biz bu məsələyə ilk gündən hazırlaşırıq və artıq qarşı tədbirlərlə cavab verməyə tam hazırıq. Lazım gələrsə, cavab verəcəyik,” – von der Layen vurğulayıb.
Eyni zamanda o qeyd edib ki, Avropa İttifaqı problemi danışıqlar yolu ilə həll etməyə üstünlük verir. Onun sözlərinə görə, ABŞ Brüsselə rəsmi məktub göndərib və orada razılaşdırılmış qərar əldə olunmadığı təqdirdə qüvvəyə minəcək tədbirlərin siyahısını təqdim edib.
Von der Layen əlavə edib ki, Aİ avqustun əvvəlinə qədər qarşı tədbirlər tətbiq etməyəcək, lakin tam hazır olmaq üçün bu istiqamətdə işi davam etdirəcək.
Qeyd edək ki, iyulun 12-də Donald Tramp 1 avqustdan etibarən Avropa İttifaqı və Meksikadan idxal olunan məhsullara 30 faiz dəyərində gömrük rüsumu tətbiq ediləcəyini açıqlayıb. Onun sözlərinə görə, əgər bu ölkələr də cavab addımı atarsa, ABŞ tətbiq etdiyi tariflərə əlavə faizlər artıracaq.
