“Ukrayna Prezidenti Volodimir Zelenski ilə Rusiya diktatoru Vladimir Putin arasında mümkün görüşün müzakirəsi fonunda görüşün harada keçirilə biləcəyi də müzakirə edilir. Hesab edirəm ki, bu barədə indidən danışmaq tezdir. Moskvada, Budapeştdə və sair şəhərdə görüşün mümkünlüyü artıq müzakirə olunub. Əminəm ki, çoxlu sayda şəhər və ölkə adı çəkiləcək. Hazırda mövcud olan "mənbələrdən" bir çox məlumat olduqca şübhəlidir. Amma qeyd etmək lazımdır ki, hansısa neytral ölkə seçilməlidir. Xatırladım ki, Putin və ABŞ-ın o vaxtkı Prezidenti Co Bayden bir dəfə Cenevrədə görüşmüşdülər”.
Bu sözləri ukraynalı siyasi elmlər namizədi Maksim Yali Ukrayna və Rusiya liderlərinin mümkün görüşü və görüşün yeri barədə yazdığı analitik yazıda qeyd edib.
Yali hesab edir ki, hazırda Zelenski ilə Putin arasında mümkün görüş yeri kimi ən çox adı çəkilən Macarıstan Ukraynaya qarşı neytral deyil: “Macarıstanla daimi diplomatik münaqişələrimiz var. Çünki Budapeşt Kremlin nağıllarını müdafiə edir və yayır. Yəni Budapeşt Putinin tərəfində olduğunu açıq şəkildə nümayiş etdirir. Ona görə də bu yer bizim üçün əlverişli deyil”.
“Ümumiyyətlə, fikrimcə, Zelenski ilə Putin arasında yaxın iki həftə ərzində görüş baş tutmayacaq. Bəli, ABŞ Prezidenti Donald Tramp bunu istəyir və belə bir görüşü təşkil etməyə çalışır. Amma biz artıq onun digər cəhdlərini görmüşük. Məsələn, 24 saat ərzində müharibəni dayandırmaq bəyanatını unutmamışıq. Buna görə də, görüşün həqiqətən də yaxın gələcəkdə baş verməsi ehtimalı çox azdır”, - deyə ekspert qeyd edib.
“Bundan əlavə, Moskva artıq geri çəkilir: Rusiya Prezidentinin köməkçisi Yuri Uşakov artıq Vladimir Putinlə ABŞ Prezidenti Tramp arasında telefon danışığından sonra bəyanat verib ki, guya ki, Rusiya Federasiyası Ukrayna və Rusiya Federasiyası arasında danışıqlarda nümayəndə heyətinin nümayəndələrinin səviyyəsinin artırılması imkanlarını öyrənəcək. Yəni ki, Kremldən Putinin Zelenski ilə görüşə hazır olması ilə bağlı rəsmi təsdiq yoxdur”, - Yali əlavə edib.
Analitik hesab edir ki, Moskva da belə bir görüşün onlar tərəfindən bir növ Zelenskinin legitimləşdirilməsi olacağından qorxur: “Çünki Putin uzun müddətdir ki, Ukraynanın qanuni prezidenti olmadığını təkrarlayır və deyir ki, buna görə də Rusiya onunla heç bir müqavilə imzalaya bilməz. Beləliklə, oyun hazırda davam edir. Hamı çox gözəl başa düşür ki, Putin müharibəni dayandırmağa meylli deyil və mümkün qədər vaxt uzadır, hərbi əməliyyatları isə davam etdirir. Onun üçün məsələnin həllində maraqlı olduğunu iddia edərək Trampla danışmaq vacibdir. Amma bu söhbətlərin məqsədi sanksiyalardan qaçmaq və onlardan qurtulmaqdır. Ukrayna üçün Trampı Rusiyanın müharibəni dayandırmağı planlaşdırmadığına inandırması vacibdir. Çünki Tramp Putinin sülh sazişi istədiyinə inanır. Sülhə gedən yolun Rusiya iqtisadiyyatı üçün əhəmiyyətli nəticələri olan əlavə sanksiyaların tətbiqindən keçir. Döyüş meydanında vəziyyəti dəyişmək üçün isə silahların alınması bizim üçün vacibdir. Yalnız belə hallar Putinin real danışıqlara və müəyyən kompromislərə razı olmasına gətirib çıxara bilər”.
Ayna.az
