Rusiyanın Ukraynaya avqustun 28-də gecə saatlarında hücum dalğasından növbəti dəfə Azərbaycan ziyan çəkib. Kiyevə raket və dron hücumları zamanı raketlərdən biri Azərbaycanın Ukraynadakı səfirliyinin yaxınlığına düşüb.

Bizimyol.info xəbər verir ki, güclü partlayış və yanğın nəticəsində səfirliyin binasına ciddi ziyan dəyib. Binanın pəncərələri sınıb, tavan hissəsi zədələnib.

Səfirliyin əməkdaşları arasında xəsarət alan olmayıb.

Xatırladaq ki, təxminən ay yarım əvvəl də Rusiyanın Kiyevə hücumu zamanı dronlardan biri Azərbaycan səfirliyinin yaxınlığına düşmüşdü.

Bundan başqa, Rusiya son vaxtlar Ukrayna ərazisində SOCAR-a aid bir neçə obyektə də hücum edib.

Avqustun 28-nə keçən gecə Rusiyanın hücumu nəticəsində Kiyev ətrafında “Bayraktar” PUA zavodu da iki raketlə vurulub.

Qeyd edək ki, bu, Rusiyanın son yarım il ərzində “Bayraktar” zavoduna ikinci hücumudur.

Həmçinin Britaniya Şurasının binasına zərər dəyib, Avropa Birliyi nümayəndəliyinin ofisinə zərər dəyib.

Bütün bu hücumlar nəticəsində Kiyevdə 4-ü uşaq olmaqla, 21 nəfər dinc sakin həlak olub. Xarkovda ölənlər arasında bir azərbaycanlı da var.

Politoloq Şahin Cəfərli baş verənləri Bizimyol.info xəbər portalına şərh edərkən bir həftə əvvəl Rusiyanın Ukraynanın Mukaçovo şəhərində yerləşən ABŞ şirkətinə məxsus müəssisəyə raket zərbəsi endirməsini xatırladır. Onun sözlərinə görə, Putinin bütün bu davranışları ABŞ prezidenti Donald Trampın sülh təşəbbüsünə açıq-aşkar saymazlıq nümayiş etdirməkdir.

“ABŞ başda olmaqla, müasir dünya nəhayət anlamalıdır ki, Rusiyanın başındakı obsessiv sindroma düçar olmuş psixopatı dialoq yoluyla, qabağından geri çəkilməklə dayandırmaq mümkün deyil”, - Şahin Cəfərli bildirib.

Şahin Cəfərlinin fikrincə, Putinin qarşısında zəiflik nümayişi onun aqressiv instinktlərini daha da tətikləyir.

Politoloq hesab edir ki, hətta Ukrayna ilə bağlı bütün tələbləri yerinə yetirlisə belə, rus imperializmi dayanmayacaq: “Sadəcə, öz itkilərini, çatışmazlıqlarını kompensasiya edərək, növbəti ekspansiyalar üçün ciddi hazırlığa başlayacaq”.