Bu həftənin sonunda Moldovada parlament seçkiləri keçiriləcək. Bu Ukrayna üçün niyə vacibdir? Fakt budur ki, uzun müddət davam edən ekzistensial qarşıdurmada Kreml müqavimət göstərmək imkanlarımızı məhdudlaşdırmağa çalışır. Özü də bunu xüsusilə “dost olmayan dövlətlər halqası” yaratmaqla edir.
Macarıstan və Slovakiyanı Ukrayna üçün “dost olmayan dövlətlərə” çevirən Orban və Fiko hökumətləri ilə münasibətlərimiz hamıya məlumdur. Onlar işğalçıya qarşı sanksiyaları sabotaj edir və bizim Avropaya inteqrasiyamıza mane olurlar. Bütün bunlar təbii ki, milli maraqlarla pərdələnmişdir.
Polşada prezident seçkilərində Karol Navroçkinin qələbəsindən sonra o qonşu ilə də münasibətlərimiz gərginləşib. Vəziyyəti ancaq nisbətən loyal hökumət çoxluğunun olması xilas edir. Lakin Polşa ölkəmizlə münasibətlərində həmişə öz maraqlarını rəhbər tutub. Hazırda onun əsas marağı Rusiyanı cilovlamaq, onlara qarşı birbaşa təcavüzə əl atmasının qarşısını almaqdır.
Ukrayna indiyədək Moldova və Rumıniyaya etibarlı “arxa mühafizəçi” kimi arxalanıb, genişmiqyaslı işğalın başlamasından sonra onlardan dəstək görüb. Əslində bizim ixrac potensialımız və silah təchizatımızın şaxələndirilməsi indi bu etibarlı “arxa mühafizədən” asılıdır. Kreml də bundan xəbərdardır...
Kremlin planı birincisi, bizim ixrac potensialımızın məhdudlaşdırılmasını, ikincisi, Ukrayna qoşunlarının bir hissəsinin Odessa vilayətinə çıxarılmasına məcbur etmək üçün Dnestryanı ilə sərhəddə gərginlik mənbəyi yaratmağı tələb edir.
Yəni Moldovada hökumətin dəyişdirilməsi, mülki şəxslər adı altında kadrların rotasiyası üçün şəraitin təmin edilməsi, zabit korpusunun cəbhədə döyüş görmüş təcrübəli hərbçilərlə əvəzlənməsi, Dnestryanı əhalisinin səfərbər olunması üçün güclü maddi stimulların yaradılması planı var. Anbarlarda hər kəs üçün kifayət qədər silah var.
Bundan sonra bütün sərhəd boyu kütləvi şəkildə yerləşdirilmiş atıcı silahlara malik kiçik qrupların taktikasından istifadə edərək, onlar “Qirkin strategiyası”nı təkrarlamağa cəhd edə bilərlər: məskunlaşan əraziləri ələ keçirərək, “dinc əhali” pərdəsi altında istənilən hədəflərə doğru irəliləmək.
Xatırladaq ki, Odessa Rusiya tərəfindən işğal olunmuş Dnestryanı ilə sərhəddən cəmi 60 kilometr məsafədədir. Biz 2014-cü ildən bəri bilirik ki, təxribatçıları sıx məskunlaşmış şəhərlərdən çıxarmaq olduqca çətindir.
Əgər bu birinci plan uğurlu olarsa, ikinci plan işə düşəcək - Rumıniyada sabitliyi pozmaq. Çevriliş cəhdinə görə mühakimə olunan Corcskunun, ardınca isə Rumıniyada çox yüksək səs toplayan Simionun prezident seçkilərinin nəticələri göstərir ki, Ukraynaya münasibətdə daha çox nifaq səpmək və siyasətin dəyişməsinə sövq etmək üçün münbit zəmin var.
Bundan sonra Ukrayna ixracatını daşıyan gəmilərə öz ərazi sularından istifadə qadağan edilə bilər. Və sonra naməlum dron qayıqları neytral ərazi sularında gəmiləri terror edə bilər.
Belə bir ssenarinin baş vermə ehtimalını dərk edərək, Ukraynanın bunun qarşısını almaq üçün səy göstərməsi vacibdir. İdeoloji spektrdə olan Ukrayna siyasətçiləri qonşu ölkələrin siyasi qüvvələri ilə sıx əməkdaşlıq etməli, dövlət qurumları və kəşfiyyat orqanları isə Kremlin casus şəbəkələrinin üzvlərini ifşa etmək və yaxalamaq üçün əməkdaşlıq etməlidir.
Müəllif: Ruslan Roxov, ukraynalı siyasi məsləhətçi.
Mənbə: UNİAN
Tərcümə AYNA.AZ-a məxsusdur.
