Bəzi dostlar Trampın Ukrayna üzrə “sülh təklifi”nin Cenevrədə keçirilən ABŞ, Ukrayna, NATO və Aİ rəsmilərinin müzakirəsindən sonra müəyyən korrektələr edilərək normal hala gətirildiyinə və ya gətiriləcəyinə inanırlar. Ümid edirəm ki, bu nikbin proqnozlarında yanılmazlar. Amma Ağ evin mətbuat katibi Ağ Evin mətbuat katibi xanım Karolin Levittin bu gün mövzuyla bağlı açıqlamaları məndə eyni nikbinliyi doğurmadı. Məlumata görə, Levitt öz açıqlamasında bildirib ki, ABŞ prezidenti münaqişənin həlli yollarını axtarmağa çox böyük vaxt və enerji sərf edib və onun səyləri təqdirə layiqdir. Onun fikrincə, əsas məqsəd qətlləri dayandırmaq və müharibəni sona çatdırmaqdır.
Ağ Evin mətbuat katibi qeyd edib ki, keçmiş prezident Donald Tramp ABŞ vergi ödəyicilərinin pulları ilə bu müharibəni maliyyələşdirməyi dayandırsa da, ABŞ NATO mexanizmləri vasitəsilə Ukraynaya əhəmiyyətli miqdarda silah göndərməkdə və ya satmaqda davam edir. Və "Biz bunu əbədi edə bilmərik. Prezident isə bu müharibənin bitməsini istəyir" Levitt belə deyib.
Xanım sözçünün ifadələrindən belə anlaşılır ki, Donald Tramp islah olunacaq tiplərdən deyil və o, hətta bir müddətdən sonra Ukraynaya verilməsi üçün Avropa müttəfiqlərinə də silah satmaya bilər.
Sözsüz ki, Trampın israrla anti-Ukrayna mövqeyi tutması səbəbsiz deyil. Zənnimcə, bu, ABŞ və Rusiya liderlərinin müxtəlif vaxtlarda, xüsusilə də ötən yay aylarında Alyaskada keçirdikləri görüşdə müəyyən sövdələşmələrə getməyindən qaynaqlanır. Analizlərim onu göstərir ki, bu sövdələşmələrdə ABŞ-ın Venesuelanı öz nəzarətinə götürməsi və İsrailin İran rejimini yerlə yeksan etməsi müqabilində Tramp hakimiyyətinin Ukraynadan dəstəyini kəsməsi üzərində ümumi razılığa gəlinib. Ukraynaya biabırçı sülh şərtlərinin təklif olunduğu bir zamanda Tramp administrasiyasının Venesuela prezidenti Maduronu terrorçular siyahısına daxil etməsi və İsrailin Livan Hizbullahının aparıcı liderlərindən birinə sui-qəsd əməliyyatı həyata keçirməsi bu mənada təsadüfi sayıla bilməz.
Qeyd edim ki, Ukrayna rus imperializmi üçün nə qədər əhəmiyyətlidirsə, Venesuela da ABŞ üçün o qədər strateji əhəmiyyət daşıyır. Dünyanın ən böyük neft ehtiyatına malik olan Venesuela hər zaman Rokfeller ailəsi üçün hər cür fədakarlığa dəyən coğrafiya kimi tanınıb. Ölkənin kəşf olunmuş neft ehtiyatı 303 milyard varildən çoxdur. Müqayisə üçün qeyd edim ki, dünyanın neft ehtiyatı sıralamasında Səudiyyə Ərəbistanı 267,2 milyard varillə ikinci, İran 208,6 milyard varillə ikinci, Kanada isə 163,6 milyard varillə üçüncü yerdə qərarlaşıb. Bu dörd ölkə birlikdə qlobal neft ehtiyatlarının yarıdan çoxunu təşkil edir. Təbii ki, bu qədər zəngin neft ehtiyatına malik ölkəni başqasının ixtiyarına buraxmaq Rokfeller ailəsi və ABŞ üçün böyük itki sayılır. Onu da xatırladım ki, Venesuela qaz ehtiyatına görə də dünyanın ən böyük 8-liyinə daxildir. Bundan əlavə, Venesuelanın çox zəngin qızıl yataqları və digər təbii sərvətləri də var. Ölkədə 250 min vətəndaşın qızıl istehsalı sektorunda işlədiyi bildirilir. Yəni Venesuela dünya imperialistləri üçün gözdən iraq tutulacaq yer deyil.
Yeri gəlmişkən, Rokfeller ailəsi də vaxtilə Venesuelanın neft hasilatı sektoruna böyük investisiyalar yatırmışdı. Hətta ailənin ağsaqqalı Nelson Rokfeller Venesuelanı özünün ikinci vətəni sayırdı. Bu ölkəni əldə tutmaq üçün Rokfellerlərin hətta digər istehsal sahələrinə, xüsusilə kənd təsərrüfatına və sosial həyatın inkişafına milyardlarla dollar xərcləmişdi. Amma bütün bu səylər heç bir nəticə verməmiş, 1976-cı ildə Venesuelanın neft və digər istehsal sektorları milliləşdirilmişdi. Təbii ki, bir çox xarici maliyyə qurumlarının, o cümlədən SSRİ-nin təşviqi ilə. Bununla da Rokfeller ailəsinin Venesuelaya yatırdığı vəsaitlər batmışdı.
Fikrimcə, Ukrayna qarşılığında Venesuela və İran ABŞ sərmayədarları üçün o qədər pis sövdələşmə sayılmaz. Yəqin ki, Trampın Rusiyapərəstliyi də bu həqiqətdən qaynaqlanır.
Bu barədə daha geniş araşdırma yazısı hazırlayacağam. Hələlik, zamanım dar olduğundan qısa informasiya verməklə kifayətlənirəm.
Heydər OĞUZ - "DİA-AZ"
