Azərbaycanda səhiyyə sisteminin acınacaqlı halda olduğu, hələ də Əli İnsanov ənənəsinin davam etdirildiyi hamıya gün kimi aydındır. Son illər dövlətin səhiyyə sektoruna ayırdığı milyonlarla vəsaitə rəgmən hələ də bu sahədəki bir sıra problemlər həll olunmamış qalır. Respublika ərazisində fəaliyyət göstərən əksər dövlət xəstəxanaları təmir edilərək müasir tibbi avadanlıqlarla yenilənsə də, mövcud problemlər aradan qalxmayıb. Yenə də ölkə vətəndaşlarının böyük əksəriyyətində yerli səhiyyəyə qarşı inamsızlıq və narazılıq var. Bunların əsas səbəblərindən biri isə həkim kontingentinin böyük hissəsinin rüşvətə aludə olmasıdır. Azərbaycanda bir çox səhiyyə ocaqlarının təmirinə milyonlarla dövlət vəsaiti xərclənsə də, bəzi xəstəxanalarda antisanitariya tüğyan edir. Personal dövlətin müəssisəsinə "yağı malı” kimi baxır. Bu cür antisanitariyanın və rüşvətin tüğyan elədiyi xəstəxanalardan biri də Sabunçu rayonunda yerləşən və əhalı arasında "Sabunçu xəstəxanası” kimi tanınan 3 saylı
Şəhər Klinik Xəstəxanasıdır.
Paytaxtın ən böyük "dövlət özəl” xəstəxanası
Öncə onu qeyd edək ki, 3 saylı Şəhər Klinik Xəstəxanası paytaxtın ən böyük xəstəxalarından biridir. Ümumi ərazisi 5 hektara yaxındır. 17 korpusdan ibarətdir. Ən böyük şöbələri urologiya,kardiologiya, cərrahiyyə, uşaq və doğum şöbələridir. Nəzərinizə çatdıraq ki, xəstəxana əsasən kriminal hadisələr, qəzalar zamanı yaralananları qəbul edir, əhalinin aztəminatlı təbəqəsi ilə işləyir. Bundan əlavə, səhiyyə nazirliyinin qərarı ilə şəkərli diabet xəstəsi olan hamilə qadınlar yalnız 3 saylı xəstəxanaya göndərilirlər. Xəstəxana üçün yaranan bu üstünlük- diabet xəstəsi olan hamilə qadınların digər xəstəxanalara üz tuta bilməmələri burada rüşvətin alovlanmasına səbəb olur.
"Siz harada yaşayırsınız?”
Qlobal.az-ın əldə etdiyi məlumata görə, bu xəstəxanada doğuşun "qiyməti” 600- 1500 manat arasındadır. Xəstəxanaya məlum səbəbə görə gələn hər kəslə həkimlər və tibb bacıları tərəfindən açıq bazar sövdələşmələri aparılır. Burada alınan rüşvət bununla yekunlaşmır, xəstənin qaldığı hər gün üçün əlavə olaraq müəyyən adlar altında rüşvət alınır. Yaranmış acınacaqlı və qanunsuz vəziyyətə etiraz edib pulun nəyə görə alındığını soruşduqda isə tibb bacıları açıqca həmin məbləğin şöbə müdirinə, baş həkimə və baş həkimin müavini Əbülfəz Hüseynova çatdığını deyirlər. Həkim və tibb bacılarına müəssisənin dövlətə aid olduğunu, xidmətin, dərman preparatlarının pulsuz olmalı olduğunu deyəndə isə gülərək insanlardan ironiya ilə harada yaşadıqlarını soruşub bu xəstəxananın adının dövlət xəstəxanası olduğunu deyirlər.
Rüşvət böyük, xidmət sıfır
Xəstəxanadakı tibb bacıları və təmizliyə baxanlar da həkimlərindən geri qalmırlar. Pul vermək istəməyən xəstələrin palataları gec təmizlənir, bəzi hallarda isə xəstələr özləri dizə çıxan zibilə dözməyib əllərinə süpürgə alıb palatalarını təmizləyirlər. Məlumata görə, bu xəstəxanada həttə təmizliyə baxan işçilərə və tibb bacılarına Əbülfəz Hüseynov tərəfindən "gündəlik haqq” qoyulub və Əbülfəz Hüseynov bunun Fikrət Zeynalovun qəti göstərişi olduğunu bildirib. Sabunçu xəstəxanasındakı qiymətlər heç də Bakıda fəaliyyət göstərən özəl klinikalardan geri qalmır. Belə ki, burada ultrasəs müayinəsinin qiyməti 10-20 manat arasındadır. Xəstəxanada "UZİ"-dən keçən xəstələr 20 manat, bronxların və ağciyərlərin rentgeni 15 manat, ürəyin kardioqramması 20 manat, mədənin endeskopiyası isə 20-25 manata başa gəlir. Bundan əlavə həkimlərin müayinə haqqı 20-30 manat civarındadır. Ən acınacaqlı hal isə budur ki, alınan pulun müqabilində ğeşəkar xidmət yoxdur.
Məlumatda daha sonra deyilir ki, doğuş şöbəsindən başqa xəstəxananın kordioloji korpusunda da vəziyyət acınacaqlıdır. Burada xəstə yaxınları ilə həkimlər və tibb bacıları açıq-aşkar rüşvət davasına çıxırlar. Həkimlərin tələb etdikləri rüşvəti vermək istəməyən xəstələrin yaxınlarına xəstəxanadakı laboratoriyaların işləmədiyi deyilir və məcburiyyət qarşısında qalan insanlar başqa özəl klinikalara getməyə məcbur olurlar. Xəstaxanada baş verən rüşvətxorluğa və antisanitariyaya baş həkim Fikrət Zeynalovla müavini Əbülfəz Hüseynov "göz yumur”. Əbülfəz həkimlə Fikrət həkimin xəstəxanada tüğyan edən rüşvətə "göz yummaqlarına” səbəb isə həkimlərin və tibb bacılarının yığdıqları rüşvətin 50-60 faizinin onlara çatdırmalarıdır.
Vacib bir məqamı xatırladaq ki, 2 il öncə Hesablama Palatasının apardığı yoxlamalar nəticəsində "Sabunçu” Xəstəxanasında böyük maxinasiyalar aşkara çıxarılmışdı. Yoxlama zamanı məlum olmuşdu ki, 150 min manatadək dövlət vəsaiti mənimsənilib. Əsas qanun pozuntusu isə invertar və xidmətlərin alışı zamanı tender qaydalarına əməl edilməməsi ilə bağlı olub. Bəzi dövlət müəssisələrində olduğu kimi, burada da işçilərin adından artıq əməkhaqları yazılaraq böyük həcmdə pullar silinib. Qeyd edək ki, baş həkim Xəlil Məmmədov vəzifəsindən azad olunduqdan sonra yerinə isə Fikrət Zeynalov təyin edilib.
Onu da diqqətinizə çatdıraq ki, 3 saylı Şəhər klinik Xəstəxanasının baş həkimi Fikrət Zeynalov BDYPİ-nin rəisi general-mayor Ramiz Zeynalovun qardaşıdır.
