“QONORARIMI MƏRKƏZİ POÇTDA GÖZLƏYƏCƏM”
Bu gün GUNDEMİNFO.AZ saytına Lənkəran rayonunda yaşayan bir yazar müraciət yollayıb. Əslində bu yazı bu yaxınlarda işə başlamış "Gündəlik Teleqraf" qəzetinin rəhbərliyinə qarşı sosial tələblərdən ibarət olan bir açıq məktubdur.
YAZILANLARLA BAĞLI QƏZETİN BAŞ YAZARI AYNUR CAMALQIZININ DA MÖVQEYİNİ YAYIMLAMAĞA HAZIRIQ.
"Uzaqdan görünən zəfəran sarısı"
Hamı bilir ki, mən hamıdan uzaqda, ev şəraitində yazıb, internet vasitəsi ilə dərc olunuram.
Və hamı da bilir ki, nə Bakıya getmək, nə də kimisə Lənkəranda qarşılamaq kimi bir niyyətim yoxdur. Heç buna imkanım da yox.
Amma doğrudanmı həm də hamı düşünür ki, mən bu qədər qapalı və imkansız bir vəziyyətdəyəmsə, oralarda, yanlarında-yaxınlarında olan məndən dəfələrlə dəfə savadsız və istedadsızlarla edə bilmədiklərini mənimlə eləmək bu qədər asandı?
Xam bilmək, xam tanımaq, xamlamaq yəni...
Kimi qonorar verərəm deyib, sonra dəsmal tutar üzünə, kimi qonorar yollamaq zamanı gələndə pulu yarıbayarı az yollayar, kimi yolladığından bir saat əvvəl bir məbləğ deyər, amma qulağını mütləq kəsər bu məbləğin və sən bunu ancaq pulu poçtdan istəyəndə görərsən, görəndə də iyrənərsən özünü arsızlığa qoymuş miskin varlıqların əlində çabalayan SÖZ məkanından.
Kimi də özünü böyük bilər, tapşırıqlar verər, bunu hazırla, onu yaz, bunu araşdır deyər, amma soruşmaz ki, a bala, sənin dədənin adı nəydi, qoy bir dədəmin arxivinə baxım görüm mənim dədəmə nə qədər borcu qalmışdı dünyadan köçəndə, onu sən ödəməlisən bizə müftə qul kimi işləyib, imzanı bəzəklərimizdən edərək.
Ən axırda da birisi lap uzağa baş vurar, başından böyük bir səhvə yol verər - sənin imzan altında sənin yazmadığın, sənin maraqlanmadığın, sənin hazırlamadığın və ən nəhayət, sənin xəbərin olmadığın mətnləri çap edər eyni təsisçinin qəzetində və saytında, halbuki sənin yalnız o sayta yolladığın 8 köşə yazısı olar və tamam təsadüfən görərsən ki, imzandan geninə-boluna yararlanırmışlar.
Və saytdan tanıdığın birindən soruşub öyrənərsən ki , "o saytda başqa heç bir Cavidan yoxdur, sənin 8 köşəndən başqa Cavidan imzasıyla dərc olunan yazıları da filankəs xanım hazırlayır, amma niyə sənin adınla yazır, məlum deyil, camaat da səndən şübhələnir, hər halda sən bunu Qurban Yaquboğlundan soruş."
Və sən həmən facebook çatında Qurban Yaquboğlunu arayarsan, xəttə olmadığını görüb bir status yazarsan Publika.azdakı imza fırıldağıyla bağlı, sonra müzakirəsi olar bu statusun, az qala hamı, xüsusən də saytın və "Gündəlik Teleqraf" qəzetinin əməkdaşları cumar üstünə ki, səndən başqa Cavidan yoxdumu, başqa Cavidandı o mətnləri yazan, səni az qala o mətbu orqanına iftira və şər atmaqda suçlayacaqlar, vicdan əzabı çəkərsən lap, az qala ölüb yerə girərsən ki, axı bu necə olur, bu qədər haqsız ola bilmərəm axı, ən azından iki eyni imzayla bir mətbu orqanında yazılar verməzlər axı, və yenə cumarlar üstünə ki, sən qısqancsan, get soyad əlavə et imzana, pahoo, lap dəli olarsan və yalnız ona görə ki, kimsə çörəkvay olmasın, kiminsə işinə zərər dəyməsin, susarsan, üzünə ağ yalan deyən adamlara deməzsən ki, sən artıq bilirsən ikinci bir Cavidan yoxdu və o mətnləri kim hazırlayır...
Bu təəssüflə də yatarsan.
Səhərsə Qurban Yaquboğlu sənə zəng vurar, deyər var başqa bir Cavidan, amma o qəzetdə işləyir, biz saytda da veririk onun hazırlamalarını vaxtaşırı, mən bilsəydim ki Sizin xətrinizə dəyər, imkan verməzdim.
Və sən deyərsən ki, axı kimdi o ikinci Cavidan? Onu sadəcə tanımaq istəyirəm. Axı Azərbaycanda kişi adıdı bu, ikinci Cavidan da kişidir deməli və bu kişi də çox yəqin ki Cavidan imzalı bir qadın yazarın da mövcudluğunu bilir, o zaman hansı məntiqlə inanım ki, o kişi bir qadının imzasıyla üst-üstə düşəni seçəcək özünə, yəni soyadsız yazacaq?
Və o deyər ki, məsələn Azərbaycanda nə qədər Qurban var.
Və sən deyərsən, bəs eyni bir qəzetdə Qurban Yaquboğlu imzasıyla yazan iki yazar olsaydı, onda necə olardı reaksiya?
Və o deyər ki, sizi anlayıram, bilirsizmi, əslində mən bayaq dəyişdim saytdakı o mətnaltı Cavidan adlarını, Cavid elədim, yəni, düşünürəm, problem yoxdu daha.
Və sən deyərsən ki, necə yəni, anlamadım...
Və o deyər ki, bilirsizmi, əslində Cavidan adlı birisi yoxdu, yəni o imzayla yazan adam da bir tanınmış imzadı, amma arada Cavidan adıyla da yazır, yenə deyirəm, bilsəydik, kefinizə dəyər, bunu etməzdik, indisə silindi və problem çözüldü.
Və sənə mat qalıb sağollaşmaq qalır...
Amma axı sən bilmirsən daha harda və nə yazılır sənin imzanla!!!
Sayta boylanırsan, görürsən, Cavidan imzalı nə qədər mətn hələ də qalıb, amma Cavid edilən də var, dəyişdirilən yəni.
Və sən facebookdakı müzakirənin sonuna bir komment də əlavə edirsən:
"Dünən "başqa bir Cavidan" var idi, bu günsə həmin o "başqa Cavidan"ın adı hər yerdə dəyişdirilib "Cavid" edilib, olsun ki, hələ "o başqa Cavidan" da adını kəsik görüb zühur və etiraz edə, daha başqa bir ada dəyişilə, nə bilim, məmmədqulu, əhmədağa, səftərxan və s. Aydındır ki, heç bir "başqa Cavidan" yox idi və yoxdur da...bu qədər bəsit yəni.....üzüldüm, çox, çox, dəhşətli dərəcədə çox pərişan oldum. Bir də oralara yazı yollamaq üçün mən özüm də elə dönüb "başqa bir Cavidan" olmalıyam. Min təəssüf!"
Sənə neçə dost məsləhəti gələr ki, Aynur Camalqızına yaz olanları, zəng elə, danış, xəbəri olsun, olanları bir yazı ilə yolla Azadlıq radiosunun saytında dərc elətdir və üzdə olan bütün xəbər saytlarında da, bu adamlar səni uzaq və əlindən heç nə gəlməyəcək hesab edib xamlayırlar sadəcə, sənin kimi nə qədər də xamlanan var filan...
Və sən deyərsən onlara ki, mən sadəcə facebookda paylaşdım və bir də şəxsi bloqumun "Əlhəd daşı" bölməsində eyni müzakirəni kopyalayıb qoyacam ki, sonradan facebookdan şərhlər silinsə də, blogumda qalsın. Amma bunu mətbuata çıxarıb kimsəyə pislik eləmək istəmirəm, kim bunu bacarırsa, özü bilər, Allahı bilər və s...
Və bu gün də facebookda bir ismarış görərsən Qurban Yaquboğlundan:
" Bir daha salamlar. Cavidan xanim bir ricam var, imzanizla bagli bloqunuzda yerleshdirdiyiniz qeydi goturseniz daha dogru olar. Saygilarla"
Və bilməzsən nə cavab yazasan müqabilində, qapayarsan facebooku, çıxarsan bloguna sarı ki, ürəyini boşaldasan, yazasan və özün özünü danlayıb "eşşək üstündən eşşək" deyə-deyə də sənə nəyin DOĞRU olmasını öyrətməyə qalxan adama deməyə üzün gələ :
bəlkə doğru olan "dərziçilik"di, mənim yazdığım "dərzilik" yox, bəlkə "qatığ"dı, mənim yazdığım kimi "qatıq" yox və açasan saytı, son yazın üçün yazılan bir şərhi görəsən, Solçu niki altında yazılanı oxuyasan: " Bu adamın nə savadı var, nə də tutarlı bir yazısı... Bir qrup adam bunun mənasız yazılarını təbliğ edir, o da özünü dahi sayır. Elə bilir ki, beş-altı kitab oxuyan hər kəs dahidir, ona qalsa Həbulla kişinin yetmiş yaşı var və 7o ilə 70 min kitab oxuyub..."
Və gülümsəyəsən acı-acı, ay miskinlər, deyəsən, demək mən bloqumdan məlumatı silim, Publikaya daha yazmadığımı bəyan etməyim və onun səbəbləri yoxa çıxsın, sizlər də "oxucu şərhləri və tələblərinə görə" məni saytın köşə yazarlığından rədd elədiyinizi vurğulayasınız?!
Təəssüf edirəm, Aynur Camalqızı üçün, etibar olunası komandası yoxdu deyə...
P.S. Mənə hər köşə üçün vəd edilən 25 azn məbləğini isə ( cəmi 200 manat) Lənkəran Mərkəzi Poçtunda gözləyəcəm!
