“Qarabağ məsələsi bitib. Mən artıq belə bir münaqişəni tanımıram. Yoxdur belə bir münaqişə. Cənab Prezident İlham Əliyev bu barədə konkret, açıq şəkildə bildirib. Mən təəcüblənirəm ki, biz yenə də Qarabağ münaqişəsi, danışıqlarla bağlı söhbət edirik”.
Bu sözləri AYNA-ya müsahibəsində Milli Məclisin Beynəlxalq münasibətlər və parlamentlərarası əlaqələr komitəsinin rəhbəri Səməd Seyidov deyib. Qarabağla bağlı bu il aparılacaq müzakirələrdən, görüləcək işlərdən danışan deputat bildirib ki, əsas məsələ azad olunan ərazilərə qayıdışdır.
- Müharibə bitdi, siyasi mərhələ başladı. Bundan sonra yerdə qalan məsələlərin həlli, sülh yaradılması, xalqların birgəyaşayış məsələsi var. Bunlar danışıqlar tələb etmirmi?
- Bundan sonra Azərbaycan üçün, xalq olaraq bizim üçün əsas olan, Qarabağa böyük qayıdışın təmin olunması, qayıdışın həyata keçirilməsi, 30 ildir işğal altında dağıdılan şəhərlərimizin, kəndlərimizin bərpası məsələsidir. Qarabağa qayıtmaq böyük məsələdir. Cənab Prezident Qarabağ Dirçəliş Fondunun yaradılması haqqında fərman və sərəncam imzaladı. Fondun tərkibində iqtisadiyyat, ekologiya və təbii sərvətlər nazirlərinin, aidiyyatı komitə, birlik sədrlərinin, deputatların, mədəniyyət xadimlərinin olması heç də təsadüfi deyil. Demək istədiyim odur ki, bundan sonra Qarabağın bərpası məsələsi gündəmdədir. Azad edilən ərazilərimizin çiçəklənməsi, iqtisadiyyatın, ekologiyanın, mədəniyyətin bərpası işlərinə start verilir. Bu istiqamətlər fonunda digər məsələlər var ki, əlbəttə, o məsələlər gündəmdən çıxmayıb. Bu da hərbi güc və bundan irəli gələn məsələlərdir. Fondun yaradılması ilə bağlı sərəncama diqqətlə baxsanız, görərsiniz ki, Azərbaycan üçün gələcəkdə hansı məsələlər prioritetdir.
- Yəni, 2021-ci il, sadəcə Qarabağa qayıdışla bağlı məsələlər əsas prioritetdir...?
- Bilirsiniz, biz hələ torpaqlarımız işğalda olan zaman dünyaya bizdən gözlənilməyən cavabı verdik. Yəni, dünya gücləri fikirləşirdi ki, biz Qarabağın işğalı ilə razılaşacağıq, ədalətsizliklə barışacağıq, əbədi olaraq məğlub xalq olaraq yaşayacağıq. Amma biz əvvəlcə, torpaqlarımız işğalda olarkən qalib gəldik. Elə bir iqtisadiyyat, elə bir güc, ordu yaratdıq ki, bu güc ərazilərimizin işğaldan azad edilməsinə əsas verdi. Qısa müddətdə işğalçıların ordusunu məhv edərək ərazilərimizi təmizlədik. Əlbəttə, bundan sonra hansısa qüvvələr bizi təxribatlara çəkəcəklər, buna cəhdlər olacaq. Həm xaricdən, həm Ermənistan, həm də içəridəki bəzi qüvvələr təxribatlara çəkməyə cəhd göstərəcəklər. Amma cənab Prezident hər zaman qeyri-adi, yaradıcı yanaşmalar nümayiş etdirir. Bu yaradıcı yanaşma da ondan ibarətdir ki, Azərbaycan iqtisadiyyatı daha da güclənir, ölkəmiz dünya səviyyəli inkişaf etmiş ölkələr sırasındadır. Ona görə də bu təxribatların qarşısı alınacaq. Bu günlərdə beynəlxalq qaz boru kəməri olan TAP istifadəyə verildi, Azərbaycan qazı dünya bazarına çıxdı. Təsəvvür edirsiniz, bu, nə deməkdir? Müharibədən yenicə çıxmış bir ölkə Avropanın enerji təhlükəsizliyini təmin edən böyük bir layihəni başa çatdırdı və TAP işə başladı.
- Belə başa düşdüm ki, hərbi sahə ilə iqtisadiyyatın güclənməsi əsas prioritetlərdəndir. Həm təxribatların qarşısını almaq, həm də Qarabağın bərpası baxımından...
- İşğaldan azad edilən ərazilərimizin dirçəlməsi, şəhərlərimizin, kəndlərimizin bərpası ilə yanaşı, dünyaya hərbi və iqtisadi gücümüzün böyük olduğunu nümayiş etdirməliyik. Həm ənənəvi neft-qaz sahəsində, həm də qeyri-neft sektorunda inkişaf etməliyik. Dünya görməlidir ki, Qarabağı necə gözəlləşdiririk. Həmçinin, mədəniyyətimizi dünyaya nümayiş etdirməliyik. Ermənistanın faşist ideologiyasına qarşı, multikultural ölkə olduğumuzu, bu dəyərlərə qiymət verdiyimizi göstərməliyik. Ermənilərin soyqrımı siyasətinə qarşı, xalqların birgəyaşayış düsturunu dünyaya təqdim etməliyik. Bu ideyaları isə qoruyan qüvvələr olmalıdır. Həmin qüvvə də güclü ordumuz və güclü iqtisadiyyatımız, xalq-iqtidar birliyi olmalıdır.
- Yəni, görülməli olan işlər çoxdur...
- Əlbəttə, işlər çoxdur, həm də həddindən artıq çoxdur. Bu işləri görmək üçün bizim hər bir potensialımız var. Ən əsası da, gördüyümüz işlərin hamısını beynəlxalq aləmə göstərməliyik, sübut etməliyik. İllər boyu bizə qarşı olan “ilanın” quyruğunu tapdamışıq. Amma o “ilanın” hələ ki, zəhəri qalıb. Həm Ermənistanın içərisində, həm də xaricdə o zəhər var. Azərbaycan dünyaya elə gözəl nümunələr təqdim edib, edəcək ki, qısqanclıqlar olacaq. Azərbaycanı başqa istiqamətə yönləndirmək cəhdləri olacaq ki, o cəhdlərə xalqımızın birliyi ilə, dövlətimizin gücü və potensialı ilə, gördüyümüz işlərlə cavab verməliyik.
- Ermənistanda və Qarabağ separatçılarının içərisində revanşist qüvvələr var. Onlar yenidən toparlanmaq, yenidən işğalçılıq etmək çağırışları edirlər. Həmin qüvvələri Azərbaycan necə ram edəcək? Ermənistan cəmiyyətini necə inandırmalıyıq ki, yeni müharibə onların özləri üçün fəlakətdir?
- Əlbəttə, revanşist qüvvələr var. Özü də onların sayı az deyil, həm Ermənistanın içərisində, həm Ermənistandan kənarda yenidən müharibə çağırışı edən qüvvələr mövcuddur. Amma reallıq tamamilə başqadır. Bu gün Ermənistanın içərisindəki revanşistlər hakimiyyətə gəlməyə can atırlar. Onlar hansısa formada yenidən müharibə məsələlərini gündəmə gətirməklə öz maraqlarını güdürlər. Lakin Azərbaycanın yaratdığı reallığı dəyişdirmək mümkün deyil. Azərbaycanın qələbəsi dünyaya artıq yeni geosiyasi xəritə nümayiş etdirir. Təsəvvür edin ki, Rusiya ilə Türkiyə arasında birbaşa dəmiryol xətti olacaq. Azərbaycanın Naxçıvan bölgəsi ilə quru yolu bərpa ediləcək. Azərbaycan Ordusu Şuşada, Ağdamda yerləşib. Sərhədlərimiz bərpa olunub və əsgərimiz sərhədlərimizi elə qoruyur ki, onu pozmaq, dəyişdirmək istəyənlər faktiki olaraq özlərinə qəsd etmiş olacaqlar.
Təbii ki, hansısa revanş istəkləri var, bu çağırışlar edilir. Amma Ermənistandakı həmin qisasçılar Azərbaycanın yaratdığı reallığı dəyişmək iqtidarında deyillər. Yenidən işğalçılıq meyillərində olanların ayaqları yer tutmasın deyə Azərbaycan qəti dayanmaq fikrində deyil. Dayanmamaq, irəli getmək, artıq hərbi müstəvidə yox, iqtisadi, mədəni, siyasi-diplomatik müstəvidə işlər həyata keçirilməlidir və həyata keçirilir. Bu gün hər kəs Azərbaycanla ünsiyyətdə olmaq istəyir. Bir çox xarici qüvvələr qalib gəlmiş xalqla, dövlətlə əlaqələr qurmağa maraq göstərir. Siz baxın, Azərbaycanda hansı səviyyədə görüşlər keçirilir, ölkə başçısına kimlər təbrik məktubları göndərirlər. Bu gün beynəlxalq aləmdə regionumuz Azərbaycanın qələbəsi üzərində təhlil edilir. Bütün bunları Ermənistanın həmin revanşist qüvvələri nəzərə almalı, ağıllarını başlarına yığmalıdırlar. Ermənistan düz yola gəlib Azərbaycanla, Türkiyəylə, Rusiyayla normal münasibətlər qurmalıdır. Əks təqdirdə, bir dövlət olaraq özü-öz mövcudluğunu sual altında qoymuş olacaq.
- Rusiya və Ermənistan mətbuatında məlumatlar yayılıb ki, Rusiya, Azərbaycan və Ermənistan rəhbərləri yanvarın 11-də Moskvada görüşəcəklər. Sizcə, bu görüşdən hansı nəticələr əldə edilə bilər?
- Mənim elə bir görüş barədə məlumatım yoxdur. Bu gün Ermənistan daxilində xaosdur, ciddi böhran müşahidə edilir. Onlar bu gün özləri anlamırlar ki, Ermənistanı kim, necə, hansı səviyyədə və hansı imkanlarla beynəlxalq aləmdə təmsil etmək iqtidarındadır.
