Vaşinqton görüşü ərəfəsində Rusiyanın müxtəlif təxribatlara əl atacağı öncədən bəlli idi.
Bunu APA-ya açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev bildirib.
Arzu Nağıyev deyib ki, bu, regionda dəyişən geosiyasi balans fonunda Rusiyanın təsir imkanlarını itirməsi və hegemonluq siyasətindən əl çəkmək istəməməsi ilə birbaşa bağlıdır: “Xüsusilə Ukrayna ərazisində yerləşən kompressor stansiyalarına pilotsuz uçan aparatlarla hücum edilməsi, həmin obyektlərin sıradan çıxarılması, eləcə də Azərbaycanın Avropaya neft və qaz nəqlində istifadə olunan bəzi infrastruktur qurğularının hədəfə alınması bu təxribatların tərkib hissəsi kimi dəyərləndirilə bilər. Bundan əlavə, Gürcüstana qarşı müharibənin ildönümündə regionda gərginliyin artırılması, Moldovadakı proseslər və digər qonşu ölkələrdə Rusiya təsirinin zəifləməsi də Moskvanın narahatlığını artırır. Rusiya bu siyasətindən əl çəkmir. Azərbaycan rəhbərliyinin son dövrlərdə beynəlxalq tədbirlərdə fəal iştirakı da bəzi dairələrdə qıcıq doğurur. Belə bir şəraitdə Azərbaycanın hüquq-mühafizə və təhlükəsizlik orqanları baş verənləri diqqətlə izləyir və qarşısını almaq üçün bütün tədbirləri görməyə hazırdır”.
Komitə sədri qeyd edib ki, son vaxtlar Azərbaycanın neftini daşıyan istiqamətlərdən biri olan Odessa şəhərində yerləşən infrastrukturun dəfələrlə hədəfə alınması, həmçinin Azərbaycan səfirliyinə yaxın ərazidə partlayışın baş verməsi də təsadüfi deyil: “Bütün bu faktlar göstərir ki, Rusiya bölgədəki prosesləri nəzarət altında saxlamaq və öz rolunu qorumaq üçün müxtəlif təzyiq vasitələrinə əl atır. Bu proseslərin davam edəcəyi istisna olunmur. Odur ki, hər bir Azərbaycan vətəndaşı bu reallıqları düzgün qiymətləndirməli, dövlətin təhlükəsizliyi naminə ayıq-sayıq olmalıdır. Prezident İlham Əliyevin həyata keçirdiyi müstəqil daxili və xarici siyasət bəzi güc mərkəzləri, o cümlədən Rusiya tərəfindən həzm olunmur”.
Arzu Nağıyev bildirib ki, Moskva proseslərdə vasitəçi rolunu öz üzərinə götürmək və regional proseslərdə əsas oyunçu kimi qalmaq istəyirdi: “Azərbaycanın heç bir dövlətin ərazisində gözü yoxdur. Lakin ölkəmizə qarşı yönəlmiş hər bir təhlükənin qarşısı qətiyyətlə alınacaq və buna qarşı daim hazırlıqlı olmalıyıq”.
