Kənd Təsərrüfatı Nazirliyi yanında Aqrar Xidmətlər Agentliyi sink fosfid və alüminium fosfid dərman preparatlarının satın alınması üzrə 11.04.2025-ci ildə başladığı açıq tenderə yekun vurub. Müsabiqənin qalibi fərdi sahibkar Məhərrəm Əmirxəlil oğlu Atakişiyevlə seçilib. Tərəflər arasında bağlanmış satınalma müqaviləsinin maliyyə dəyəri 609 600 manatdır. Məlumat satınalmaların portalında 20.06.2025-ci ildə dərc edilib.

Şərtlər toplusuna görə fiziki şəxs Məhərrəm Atakişiyev Agentliyi 20 000 kq Tərkibi-80 % Təyinatı- Siçanabənzər gəmiricilərin zərərsizləşdirilməsi (fumiqasiya edilməsi) Fiziki forması-toz Növü-R Toksiklik dərəcəsi-1B Qablaşdırma: 1 – 1.5 kq dəmir qablarda olmaqla Zinc phosphide dərman vasitəsi ilə təmin etməlidir. Həmçinin 8.000 kq, Tərkibi-56% Karantin nəzarətində olan materialların zərərsizləşdirilməsi (fumiqasiya edilməsi) Fiziki forması-bərk (tablet) Növü-Fm Toksiklik dərəcəsi-1B Qablaşdırma: 1-1,44 kq alüminium qablarda, Aluminium Phosphide ilə təchiz etməlidir.

Qeyd edək ki, sink fosfid hamımızın tanıdığı siçan dərmanıdır. Bundan kənd təsərrüfatında gəmiricilərə qarşı istifadə olunur. Hələ 2014-cü ildə Hesablama Palatası tərəfindən aparılan auditin nəticələri müzakirə edilərək Azərbaycanda zərərli gəmiricilərə qarşı mübarizə məqsədilə istifadə olunan sink-fosfid preparatının Avropa İttifaqı ölkələri və MDB-yə daxil olan bir sıra dövlətlər tərəfindən qadağan edilməsini, sink-fosfidin, ətraf mühitə, flora və faunaya, insanlara yaratdığı təhlükələrin ciddiliyini, onu qadağan edən ölkələrin sayının və preparatın tətbiqi ilə bağlı təhlükələrin daha da artmasını nəzərə alaraq, sink-fosfidin dövlət qeydiyyatından keçən pestisidlərin siyahısından çıxarılması, istifadəsinin dayandırılması və onun başqa pestisidlərlə əvəz olunması məsələsinin “Fitosanitar nəzarəti haqqında” qanuna əsasən Dövlət Fitosanitar Nəzarəti Xidmətinin nəzdində yaradılmış Elmi Texniki Şurada və Nazirlər Kabinetinin 2007-ci il 22 yanvar tarixli 10 nömrəli qərarına əsasən yaradılmış Ekspert Şurasında müzakirə edilməsi məqsədəuyğun sayılıb.

Sink-fosfid preparatının Avropa İttifaqı ölkələrində qadağan edildiyi halda nədən Aqrar Xidmətlər Agentliyi məhz bu pestisidin alınmasını məqsədəuyğun hesab edib, deyə bilmərik. Amma özlərinin yaydığı məlumatlara görə son illər siçanabənzər gəmiricilərə qarşı respublikamızda Sink-fosfid və Brodifakum preparatları tətbiq olunur. Mübarizə məqsədi ilə Sink-fosfid preparatı istifadə olunmaqla gəmiricilərin qidası olan yemlərdən biri ilə aldadıcı yem hazırlanaraq mübarizə aparılır. Bu məqsədlə buğda dəni və ya günəbaxan tumundan istifadə edilə bilər. Aldadıcı yem hazırlamaq üçün hər 100 kq buğda üzərinə zəhərli maddənin yapışmasını və yemin cəlb ediciliyini təmin etmək üçün 2,5 l bitki yağı tökülərək qarışdırılır, daha sonra 2,5 kq sink-fosfid preparatı əlavə edilərək yaxşıca qarışdırılır. Hazırlanmış aldadıcı yem bir dəfəlik istifadə edilən kisələrə yığılır, sahəyə daşınır, bir dəfə istifadə olunan qablara doldurulur və qaşıqla hər işlək yuvaya normaya uyğun istifadə edilir. Hər işlək yuvaya 3 qram sink-fosfidlə hazırlanmış aldadıcı yem (0.5 çay qaşığı-75 buğda dəni) qoyulur.

Qeyd edək ki, bütün bu təlimatları yerlərdə Aqrar Xidmətlər Agentliyinin əməkdaşları həyata keçirməlidir. Amma əldə etdiyimiz məlumatlara görə Agentliyin rayon şöbələrində bu dərman vasitələri fermerlərə satılır, az-az hallarda isə sakinlərə paylanılır ki, özləri düzəldib istifadə etsinlər. Bu da sakinlər üçün açıq-aşkar təhlükə deməkdir.

Bunlardan əlavə. Apardığımız araşdırma zamanı Aqrar Xidmətlər Agentliyinin 609 600 manat dəyərində satınalma müqaviləsi bağladığı Məhərrəm Əmirxəlil oğlu Atakişiyev barəsində də bəzi maraqlı məlumatlar ortaya çıxdı.

AQTA-dan hələ 12 avqust 2022-ci mətbuata verilən məlumata görə fiziki şəxs Atakişiyev Məhərrəm Əmirxəlil oğlu tərəfindən Çin Xalq Respublikasından idxal olunan, ümumi çəkisi 3500 kq “TİTAN 350 SC” adlı pestisid məhsuluna Qida Təhlükəsizliyi Agentliyinin (AQTA) əməkdaşları tərəfindən keçirilən baxış zamanı götürülmüş nümunələrin Qida Təhlükəsizliyi İnstitutunun müvafiq laboratoriyasında müayinəsi nəticəsində məhsulun saxtalaşdırıldığı, etiket məlumatları ilə tərkibinin uyğunsuz olduğu müəyyən edilib. Aşkar olunmuş uyğunsuzluqla əlaqədar pestisidin istifadə təyinatı üzrə tətbiqinə icazə verilməyib.

Təqdim olunan sənədlərin həqiqiliyinə dair şübhələr yarandığından, məsələnin araşdırılması məqsədilə idxalçı ölkənin aidiyyəti qurumuna sorğu göndərilib. Müraciət əsasında, preparata dair mənşə sertifikatının verildiyi Çin Xalq Respublikasının Beynəlxalq Ticarətin Təşviqi üzrə Çin Şurası (China Council for Promotion of International Trade) tərəfindən göndərilmiş cavab məktubunda sertifikatın saxta olduğu bildirilib. Faktla bağlı qanunvericiliyin tələbləri çərçivəsində müvafiq tədbirlər görülməsi üçün aidiyyəti dövlət qurumlarına məlumat verilib.

Çin Xalq Respublikasının Beynəlxalq Ticarətin Təşviqi üzrə Çin Şurası tərəfindən göndərilmiş cavab məktubundan da göründüyü kimi Məhərrəm Əmirxəlil oğlu Atakişiyev sertifikatları saxtalaşdırıb.

Bundan əvvəl isə, yəni 18 yanvar 2022-ci ildə Azərbaycan Qida Təhlükəsizliyi Agentliyi “Pestisidlərin, bioloji preparatların və aqrokimyəvi maddələrin dövlət sınağının aparılması, qeydiyyata alınması və istifadəsinə icazə verilmiş preparatların siyahısına daxil edilməsi üzrə Ekspert Şurası”nın növbəti iclası keçirilib. Sözügedən iclasda Atakişiyev Əmirxəlil Məhərrəm oğlunun müraciətinə əsasən Türkiyə Respublikasının “DOĞAL Kim. Mad. Ve Zirai. İlaç. San. A. Ş.” şirkətinin istehsalı olan Pole 500 SC, Doris, Sezox, Sapho, Çin Xalq Respublikasının “Evergreen Agrochemical Co” LTD şirkətinin istehsalı olan. Atlantic 500 SC, Smerch 240 EC, Dogaman 250 EC, Sword 240 SL, Hindistan Respublikasının “MODERN INSECTICIDES LIMITED” şirkətinin istehsalı olan Judo 5 EC, Aytap 200 EC, Baston 400 EC kimi pestisidlər ilk dəfə qeydiyyata alınıb və ölkəmizə gətirilməsinə icazə verilib.

Qeyd edək ki, Aqrar Xidmətlər Agentliyinin satınalma müqaviləsi bağladığı Məhərrəm Əmirxəlil oğlu Atakişiyev (VÖEN:1304381402 ) Kənd Təsərrüfatı Nazirliyinin rəsmi portalında pestisidlərin satışı ilə məşğul olan fərdi sahibkar kimi göstərir. 2023-cü il üzrə Vergi Məcəlləsinə uyğun olaraq vergi hesabatını və ya onu əvəz edən arayışı vaxtında təqdim etməməyə görə 1 hal üzrə ümumilikdə 40.00 manat maliyyə sanksiyası tətbiq edilmişdir.

Qeyd edək ki, onun oğlu Atakişiyev Əmirxəlil Məhərrəm oğlu (VÖEN: 1304385642) da pestisidlərin satışı ilə məşğul olan fərdi sahibkar kimi göstərir. 2022-ci il üzrə Vergi Məcəlləsinə uyğun olaraq vergi hesabatını və ya onu əvəz edən arayışı vaxtında təqdim etməməyə görə 1 hal üzrə ümumilikdə 40.00 manat maliyyə sanksiyası tətbiq edilmişdir. hazırki günə 91 928.87 manat vergi borcu var.

Xatırladaq ki, Kənd Təsərrüfatı Nazirliyi yanında Aqrar Xidmətlər Agentliyinin sədri Sərdar Hacıyevdi. O, bu vəzifəyə nazir Məcnun Məmmədovun əmri ilə 2023-cü ilin oktyabrında təyin edilib. Daha əvvəl “PAŞA Holdinq” MMC-yə məxsus “Yalama Aqropark” MMC-nin İdarə Heyətinin sədri olub

Aktualinfo.org