Azərbaycan xalqının əksər məmurların fəaliyyətindən narazı olduğu sirr deyil. Odur ki, əslində, aparılan islahatlara ilk növbədə, məmurlardan başlamaq lazımdır. Nəzərə alsaq ki, hansısa bir rayonda kiçik bir vəzifə tutan məmur, daha ranqlı bir məmura bağlıdır, o baxımdan, islhatatlar aşağıdan yox, elə yuxarıdan başlamaq lazımdır. Ki, yerlərdəki kiçik məmurlar insanların evlərini başına uçura bilməsin və vətəndaşların narazlığına səbəb olmasınlar.
Necə ki, evi başına uçurulan Sabunçu rayonu, Zabrat-2 qəsəbəsində yaşayan Hüseynov Əmir Yusif oğlu və onun ailəsi narazılıq edir. Baxmayaraq ki, dəfələrlə prezident İlham Əliyev “Dövlət məmuru xalqın xidmətçisidir. Xalqın birinci xidmətçisi mənəm və bütün dövlət məmurları belə işləməlidirlər”,-deyir, amma ölkədəki durum, o cümlədən Zabrat-2 qəsəbəsində yeni tikilmiş evin məmurlar tərəfindən zorla sökülməsi bunun əksini deyir. Aydın olur ki, məmurlar heç də deyildiyi kimi xalqa xidmət etmir, yalnız özləri üçün çalışırlar. Əks halda hansısa nazir və yaxud başqa vəzifə sahibi olan məmur işdən çıxarılan kimi milyonlarla sərvəti ortaya çıxmazdı. Hərçənd, vəzifəsindən uzaqlaşdırılmayan məmurların da miyonları, çoxlu sayda mülkləri var ki, bu da zaman-zaman mediada yayılır. Bu halda isə həmin məmurların xalqa xidmət etmədiyi bir daha öz təsdiqini tapmış olur.
Elə buna görə də ilk islahat məmurların “təmizlənmə” prosesi olmalıdır. Yalnız bu zaman aparılan islahatlar fayda verə bilər, yoxsa xalqın cibinə girən, evini başına uçuran məmurlar olduqca, aparılan islahatlara kölgə düşəcək. Sabunçu rayonu, Zabrat-2 qəsəbəsində baş verənlər də bunu aydın göstərir.
“Sabunçu rayon rayon icra başçısı Adil Vəliyevin iştirakı ilə bu ev sökülüb”
Evi başına uçurulan Hüseynov Əmir Yusif oğlu “Hürriyyət”ə dedi ki, evini iki aydır tikib: “Sabunçu rayon icra başçısının müavini Gülağa, burada kənd sovetində oturan İlqar Süleymanov, Sabunçu rayon rayon icra başçısı Adil Vəliyevin iştirakı ilə bu ev sökülüb. Nəyə əsasən sökülüb, bizə də qaranlıq qalır. Bu evi tikmək üçün icazəyə 4500 manat pul vermişəm. 1500 manat da borcum qalmışdı. Çünki 6 min manata danışmışqdıq. Mən də kasıbçılığa görə o pulu düzəldib verə bilmədim”.
“Prezidentin sözünü ən kiçik məmurdan tutmuş böyüyünə kimi heç bir məmur eşitmir”
Qızının evi sökülən Məhəhəmməd Ağayev isə bunları söylədi: “Mən ev tikiləndən xəstəyəm, bunlar məni arxayın etdilər ki, necə lazımdır haqlarını vermişik, burada sənə ehtiyac yoxdur. Kürəkənim 3 dəfə icra hakimiyyətində olub, icra başçısı ilə görüşə bilməyib, tikinti üzrə müavin Gülağanın (Ona Güloğlan da deyirlər, adını dəqiq bilmirik - müəl.) yanına gedib, onu da tapa bilməyib, deyiblər, məzuniyyətdədir. Üçüncü dəfə İcra Hakimiyyətində İsa müəllim var, onun yanına gedib. O da kənd sovetinin sədri İlqarın yanına göndərib. İlqar da deyib ki, “qeyri-rəsmi tikintidir, sənədi olmasa da, torpağın sənədi var, bizə 6000-6500 manat pul verəcəksən”. Bu da razılaşıb, deyib ki, əlimdə 4500 manat pulum var, bu pulu götür, tikinti qurtarandan sonra pul qalarsa, qalan pulu verərəm, qalmazsa, bir aydan sonra Rusiyaya gedib, işləyib oradan göndərərəm. Belə razılaşıblar, ancaq razılaşan müddətdə İlqar Süleymanov 15 günə evin tikilməsini tapşırıb, “15 gündən gec tiksən, evi gəlib uçurda bilərlər”,- deyib. Biz bunun nə olduğunu anlamamışıq. Hava yağıntılı oldu, 15 günə evin tikintisini başa vura bilmədik. 15 gün üstündən keçəndən sonra Adil Vəliyev məzuniyyətdən qayıdıb və evin tikintisindən xəbəri olub, İlqara o evin qeyri-qanuni tikildiyini deyib. Deyib, yəqin pulu almısan, o da deyib pulu almamışam. Bu prinsiplə gəlib evi məcburiyyət qarşısında sökdürüb. Çünki kürəkənimin ona verdiyi pul haqqında Adil Vəliyevə deməyib. Bax, hazırda durub danışdığımız yerdə kürkənim İlqara pulu verib. Ona pulu verəndə burada iki nəfər şahid olub, razılaşıblar. Buna baxmayaraq, icra başçısı məzuniyyətdən qayıtdıqdan sonra gəlib 300-400 polislə evin söküntüsündə iştirak edib.
Bizim prezidentimiz belə məmurlarla işləyir. Belə olur, xalq dövlətin üstünə qalxır. Belə olur, kimsə xaricə qaçır, oradan Azərbaycanın əksinə deyir. Bizim yenə prezidentimizə inamımız var. Bəlkə də bizə qarşı olan haqsızlıqdan, qızımın evinin uçurulmasından Prezidentin xəbəri yoxdur. Prezidentimiz haqqında mən və mənim ailə üzlərim hələ neqativ bir söz danışa bilməz. Əgər Prezidentimiz bizə kömək etməsə, biz də lazımi qaydada lazımi yerlərə şikayət edəcəyik. Yəni Avropanın şəhərlərində demək olar ki, hər binanın qabağında bizim bu vəziyyətimiz göstəriləcək. Avropa da, bütün dünya da biləcək ki, biz Azərbaycanda nə şəraitdə yaşayırıq. Biz prezidentə, Mehriban xanıma, Zakir Qaralova, Bakı Şəhər İcra Hakimiyyətinə, Ramil Usubova məlumat göndərmişik. Baxın, aprelin biri - Azərbaycanın itki verib, müəyyən qədər torpaq qazandığı gün - evi söküblər. Mən özüm də şəhid vərəsəsiyəm, Prezidentimizin ayırdığı 11 min manat puldan mən öz qızıma köməklik etmişəm, mal-qaramdan da satıb vermişəm. İlqar Süleymanov mənim şəhidimə də söyüb, ümumi şəhidlərə də söyüb. Dedi “şəhidinə də, sənə də nəhlət. Bu gün soyqırım günüdür, mən də soyqırım yaradıram”. Bu, çəkilişlərdə müəyyən yerlərdə var.
Ondan əlavə, övladlarımı polis məntəqsinə aparıb, cərimə ediblər. Şəxsən kürəkənimi məhkəməyə veriblər, 200 manat da cərimə ediblər. Yenə məhkəmə sağ olsun, xalqın tərəfində duran məhkəmə ona iş kəsməyib. Çünki kürkənimə 3 ilə kimi iş kəsmək istəyirdilər, maddəni ağır qoymuşdular. Guya, bu, əlinə balta alıb, həmin o İlqar Suleymanovu, polis baş leytenantı Turqayı zədələyib. Bizim xalqın polisi yoxdur, bizim məmurların polisi var. Məmura xidmət edən polis var, xalqa xidmət edən polis yoxdur. Bunu yavaş-yavaş Azərbaycan xalqı bilməlidir. O məmura ki prezident dəfələrlə deyir, “məmur, biz xalqın xidmətində duran insanlarıq”. Bizim Prezidentin o sözlərini ən kişik məmurdan tutmuş böyüyünə kimi heç bir məmur eşitmir. Xahiş edirəm, bizim bu sözlərin lazımi orqanlara çatdırılmasında kömək edin. Biz kasıb ailəyik, imkanımız yoxdur. Qızım üçün bir təhər ev tikib, bir otağını düzəltmişdik. Cüzi də olsa, dövlətin bir ailəsinin bir komaya başını salmaq, dövlətdən asılı qalmamaq üçün şərait yaratmışdıq. Baxın, dövlətin məmurlarının bizə elədiyi budur. Məmurların əksəriyyəti mənim kimi yüzlərlə kasıblardan pul alıb, varlanmaq istəyən məmurlardır. İlqar Süleymanov psixi duruma görə nevrolji xəstəxanada qeydiyyatda ola-ola onu kim gətirib Sabunçu rayonunun Zabrat qəsəbəsinə kənd sovetinin icra nümayəndəsi qoyub? Psixi durumu yerində olmayan bir adam xalqa xidmət edə bilərmi?!”
“Adil gəlib əlini uzatdı ki, bu ev yerlə yeksan edilsin”
Evi sökülən Hüseynova Günay Məhəmməd qızı da söhbətə müdaxilə etdi: “Məni bu günə qoyan 15-ci bölmənin polisi baş leytenantı Turqaydı. O, bizi yerlə yeksan elətdirdi. Qolumda, ayağımda olan izlər hamısı onun əl izləridir. Məni o gördüyünüz qaz turbasına çırpdı. İlqarla o, ayağını dirədi, Bakıxanovun, Nardaranın, 15-ci bölməsinin polislərini bura tökdülər. Qaynımı, qardaşlarımı, qudamızı, yoldaşımı hamısını maşına basdılar, səbəbsiz yerə içəri apardılar. Yolları bağladılar, yalvardıq, ağladıq xeyri olmadı. Baldızım, onun uşaqları, bütün qonşularımız töküldü, bütün Zabrat ayağa durmuşdu. Hamını bir saatın içində buradan yox etdilər. Elə bilirəm ki, İlham Əliyevin bundan həqiqətən də xəbəri yoxdur. Bura Sabunçu rayon icra başçısı Adil gəlmişdi, heç ona müəllim deməyə dilim gəlimir. “Müəllim” sözünü ona deməyi heyif bilirəm. Adil gəlib əlini uzatdı ki, bu ev yerlə yeksan edilsin. Hamısı videolarda var. Evin yiyəsini niyə çağırmadı ki, gəlsin, evin yiyəsi bir kəlmə söz desin?!
Prezident İlham Əliyevin yanında mən o qədər polis, “axran” görməmişəm, bura yanında min nəfər “axran” gətirib, uşağımı yerlə yeksan elətdirdilər. Bir uşağım var, o da xəstə yatır. Niyə bizi çağırmadı ki, nə dərdiniz, nə probleminiz var? Bizi nəyi var, təhqir etdilər, söydülər? Bundan İlham Əliyevin, Mehriban Əliyevanın xəbəri yoxdur. Aşağıda oturan məmurlar kasıb-kusubu yerlə yeksan elətdirir, bizi hökumətə qarşı qaldırırlar. Biz torpaqlarımızdan ötrü şəhid vermişik, əmim şəhid olub, xəstə qardaşım, qayınlarım Beyləqanda döyüş bölgəsində xidmət edib. Əlini uzatsınlar ki, nəslimdən biri hərbi xidmətdə olmayıb. Dövlətdən ötrü müharibəyə getməyə hazırıq da. Mən yola çıxıb, kanalizasiya çəkmirəm, su çəkmirəm ki, dövlətmiz var. Amma adamın evini başını uçurdandan sonra biz dura bilmərik. Bütün qonşular, ümumi Zabrat ayağa durub. Bir xanım kimi İlham Əliyevdən, Mehriban Əliyevadan xahiş edirəm, mənim yerlə yeksan edilən evimi necə uçurdublarsa, elə həmin qaydada tiksinlər, versinlər. Mən qonşularda qalıram, qalmağa yerim yoxdur. Hamı öz başını güclə dolandırır. Mənə də, yoldaşıma da, uşağıma da maddi və mənəvi ziyan dəyib. İlham Əliyevdən xahiş edirəm, belə məmurları iş başından yığışdırsın. İlqar bizə hədə-qorxu gəlir. Mənim ailəmin, nəslimin, qonşularımın başından bir tük əkslik olsa, bilin ki, bunlar elətdirir. Biz qorxudan qonşuda da yata bilmirik. İlqar bizə ismarıc göndərir ki, sizi evdən götüzdürəcəm. Adil kimdir, deyir ki, sizi ailəlikcə deportasiya etdirəcəm? Yenə deyirəm, ona “müəllim” demirəm. Bizi Azərbaycandan deportasiya elətdirəcək? Niyə mənim ailəmi, uşağımı Azərbaycandan deportasiya etdirir, bunun səbəbini başa düşmdim. Haqqımı tələb edirəm. Xahiş edirəm, mənə dəyən maddi və mənəvi ziyan ödənilsin”.
“İlham Əliyevdən istəyirəm ki, bizim evimizin tikilməsinə göstəriş versin”
Evlələri gözlərinin qarşısında sökülən balaca Ayan isə kövərlə-kövrələ bunları söylədi: “Evimiz sökülən günü onlara dedim ki, nə olar etməyin, onlar yenə də etdilər. Bir də mamamı itələyəndə dedim, eləməyin, mamam yerdə xəstə yatır, amma onu itələdilər. Məni də itələdilər, dedilər ki, qızım, sizin eviniz yıxılmalıdır. “Bilirsiniz niyə? Siz bizə borclu qalmısınız”. Mən də dedim ki, yalandan deməyin, bizim sizə borcumuz olsaydı, atam verərdi. Atamı niyə həbsxanaya atmısınız? Atamı incidəcəksiniz? Dedi ki, yox, incitməyəcəyik. Bıçaqlarımızı apardılar. İlham Əliyevdən istəyirəm ki, bizim evimizin tikilməsinə göstəriş versin. Mən bir həftədir məktəbə getmirəm, qələmim, ruçkam orada qalıb. Mən də istəyirəm, qələmim, ruçkam olsun, o biri uşaqlar kimi məktəbə gedəm. İlqar bizim evmizi sökdü, ona dedim ki, eləmə, elədi. İlqar mamamın ayağını əzdi, qolunu burdu. Mamam İlqarın ayağından yapışdı ki, nə olar eləmə, tozlu ayaqqabısının üstündən də öpdü, dedi yalvarıram eləmə, amma o, evimizi sökdü”.
Hurriyyet.org
P.S Balaca qızcığazın yalvarışlarına, qadının ayaqqabısından öpməsinə məhəl qoymayan məmurlar bir ailənin evini sökürləsə, buna qəddarlıqdan başqa ad vermək olmaz. Amma unutmayaq ki, zülm yerdə qalmaz...
