“Prezident gələcəkdi deyə, rayonda yolların təmiri, abadlıq işləri aparılırdı. Quba-Xaçmaz yolunun bir hissəsinin ətrafındakı abadlıq işlərini də mənə tapşırdılar. İşləri 4 ay ərzində başa çatdırdım, bu işlərə görə icra hakimiyyətinin mənə 64 min manat borcu yaranmışdı. Pulu istəyəndə şərləyib həbs etdilər, bu, azmış kimi, üstəlik, ayağıma 58 min manatdan çox cərimə də yazdılar”.
Ötən il oktyabrın 11-də prezident İlham Əliyev və Birinci vitse-prezident Mehriban xanım Əliyeva Qubanın Zərdab kəndinə gedib. Orada Kənd Təsərrüfatı Nazirliyinin Meyvəçilik və Çayçılıq Elmi-Tədqiqat İnstitutunun əsaslı təmirindən sonra müəssisənin fəaliyyəti ilə tanış olub. Bundan 2 ay sonra Quba Rayon Məhkəməsi həmin İnstitutun təsərrüfat müdiri İmran İlyasova hökm oxuyur. İmran İlyasov danışır ki, başına gələnlərin prezidentin həmin səfəri ilə birbaşa əlaqəsi var. Çünki rayon icra hakimiyyətinin rəhbərliyi məhz prezidentin gəlişinə görə ona bəzi abadlıq işləri aparmağı tapşırıb. O da tapşırığı yerinə yetirib. Ancaq işləri başa çatdırdıqdan sonra görülən işlərə görə icra hakimiyyətinin ona yaranan pul borcunu istəyəndə “gördüyün işlər qanunsuz olub” deyərək, tutub cinayət məsuliyyətinə cəlb ediblər.
“Briqada yığıb işə başladım”
Məhkəmə hökmüylə hazırda azadlığı məhdudlaşdırılmış İmran İlyasov başına gələnlərdən daha ətraflı danışır:
“Dediyim kimi, Meyvəçilik və Çayçılıq İnstitutunu bizim Zərdab kəndində yaradırdılar. Məni də oraya təsərrüfat işləri üzrə müdir təyin etmişdilər. Bir gün mənə bildirdilər ki, prezident instituta gələcək, binanın ətrafını abadlaşdır… Mən də tez bir zamanda institutun ətrafında abadlıq işləri apardım. 2018-ci ilin aprelində idarənin müdiri dedi ki, səni icra başçısı çağırır. Quba Rayon İcra Hakimiyyətinə getdim. Məni başçının müavinləri Nəsrulla Vəliyevlə Aydəmir Manafov qarşıladı. Bildirdilər ki, başçı institutun ərazisində gördüyüm abadlıq işlərini bəyənib. Ona görə də istəyir ki, Quba-Xaçmaz yolunun institutun binasınadək uzanan hissəsində yolkənarı abadlıq işlərini mən görüm. Fikirləşib qərar vermək üçün vaxt istədim. Bir həftədən sonra yenə icra hakimiyyətinə çağırdılar, təkidlə bildirdilər ki, o işin öhdəsindən elə sən gələrsən, get, işlərə başla, fəhlə qüvvəsi də veriləcək, texnika da… Mən işlərə başladım, ancaq fəhlə axtarmağı da, texnika tapmağı da özümə yüklədilər. 4 ay ərzində 20 fəhlənin və icarəyə götürdüyüm texnikaların köməyi ilə 14 kilometrlik yolun ətrafında budama və başqa abadlıq işləri apardım. Fəhlələri də, icarəyə götürdüyüm ağır texnikaların sahiblərini də arxayın etmişdim ki, bu işin arxasında dövlət qurumu dayanır, işlər bitəndə pulları da ödəniləcək. 4 ay ərzində bələdiyyənin də, icra hakimiyyətinin də, rayonun ekologiya şöbəsinin də rəhbərliyi gəlib-gedib işlərlə tanış olurdu. Şəxsən başçı özü neçə dəfə gəldi, işlərimizi təriflədi… Ekologiya şöbəsindən bir nəfər gəlmişdi, dedi, a kişi, sən nağayrırsan? Bunlar səni veriblər qabağa, özləri də axırda torbanı tikəcək… Mən düzü, o kişinin sözündən heç nə anlamadım. Dedi və çıxıb getdi, ondan sonra bir də qarşılaşmadıq. O kişinin sözü yalnız məni qandallayıb məhkəməyə aparanda yadıma düşdü…”
“Guya pulumu verəcəkdilər, həbs etdirdilər”
İmran İlyasov deyir, 4 aylıq işlər bitdikdən sonra o, icra hakimiyyətinə gedərək fəhlələrə və texnika sahiblərinə, zibillərin daşınmasına və sair xərclərə görə yığılmış 64 min manatın ona ödənilməsini xahiş edib. Ona bildirilib ki, növbəti gün özləri dəvət edib haqq-hesabı bağlayacaqlar:
“Növbəti gün səhər mənimlə yaxşı “haqq-hesab bağladılar”. Arxamca polislər gəldi, tutub, qandallayıb şöbəyə apardılar. Dedilər, qanunsuz ağac kəsmisən, yaşıllığı məhv eləmisən, Ekologiya və Təbii Sərvətlər Nazirliyi səninlə bağlı Baş Prokurorluğa müraciət edib. Bildirdim ki, 4 aydır orda iş gedirdi, orda ağac budadığımı, qurumuş ağacları kəsdiyimi hamı görürdü, bu işləri özbaşına etmirdim. Niyə Ekologiya və Təbii Sərvətlər Nazirliyi “dayan”, “dur” demirdi? Niyə işlər bitəndən sonra yadlarına düşdü?.. Mən onu özümçün eləmirdim ki… İcra hakimiyyətinin tapşırığını yerinə yetirmişəm”.
Ötən il sentyabrın 22-də Quba Rayon Məhkəməsi İmran İlyasovla bağlı 2 aylıq həbs-qətimkan tədbiri seçib. Apelyasiya şikayəti nəticəsində qərar ev dustaqlığı ilə əvəz edilib. Bundan 3 həftə sonra Prezident və Birinci vitse-prezident rayona gəlib, həmin yoldan keçərək Meyvəçilik və Çayçılıq Elmi-Tədqiqat İnstitutunda olublar. İnstitutun təsərrüfat müdiri İmran İlyasov isə artıq həmin vaxt işindən uzaqlaşdırılıb, barəsində istintaq aparılan ev dustağı olub.
“Guya nazirlik məsələdən 4 ay sonra xəbər tutub”
İmran İlyasov deyir, işlər ötən ilin fevralında başlasa da, Ekologiya və Təbii Sərvətlər Nazirliyi “gözləmədə” dayanaraq, onunla bağlı Baş Prokurorluğa 4 ay sonra – işlər yekynlaşanda müraciət edib:
“Dediyim kimi, hamı görürdü ki, orda nə iş gedir. Söhbət 14 kilometlik yolda görülən işlərdən gedir. Bir budağı qıranda qarğa-quzğun kimi adamın üstünə tökülüşürlər. 14 kilometr uzunluğunda yolboyu ağac budama, qurumuş ağacların kəsimi işləri aparılıb, nazirlik bunu “görməyib”, işlər bitəndən sonra prokurorluğa müraciət edib. O yolda eyni vaxtda həm də asfaltlama işləri aparılırdı. Həm yolun, həm də yol kənarının abadlaşdırılması üçün pul ayrılmışdı. Sadəcə, o pulu basıb yemək üçün məni qurban seçdilər. Məni işlətdilər, fəhlələrin, texnika sahiblərinin pullarını azadlığım məhdudlaşdırıldığı üçün ayağımda qandal ola-ola, evdə oturub əmlaklarımı satıb ödəmişəm ki, qapıma gəlməsinlər. Torpağım gedib, maşınım gedib… Adamlara 64 min manat pul ödəmişəm. Üstəlik, hələ 58 min 500 manat da cərimələnmişəm. Onu ödəməsəm, məni uzunmüddətli həbs gözləyir”.
Bu iş üzrə Quba Rayon Məhkəməsində bu ilin 27 fevralında qərar çıxarılıb. İmran İlyasov Cinayət Məcəlləsinin 259.2.4-cü (külli miqdarda ziyan vurmaqla qanunsuz ağac kəsmə) maddəsiylə ittiham olunub. Ondan Baş Prokurorluğa şikayətçi Ekologiya və Təbii Sərvətlər Nazirliyi olub. Hökm sənədində qeyd olunub ki, İmran İlyasov fevral ayından Avtomobil Yolları Dövlət Agentliyinin Quba 5 saylı Yol-İstismar İdarəsinin balansındakı sahədə, Quba-Xaçmaz yolunun Alekseyevka kəndi ərazisində yol kənarı yaşıllıqları məhv edib. Bu işləri 4 ay müddətində davam etdirməklə təbiətə 58 min 480 manat məbləğində zərər vurub. İmran İlyasov məhkəmə ifadəsində bildirib ki, o, yolkənarı budama və ağackəsmə işlərini özünün topladığı fəhlə briqadası ilə, Quba Rayon İcra Hakimiyyəti başçısının müavinlərinin göstərişləri əsasında edib. Kəsdikləri ağacların bir hissəsini yoldan keçənlərə odun kimi sataraq fəhlələrə maaşlarının bir hissəsi kimi ödəyib, qalan hissəsini isə ərazi üzrə icra nümayəndəliyi və bələdiyyə yaxınlıqdakı uşaq bağçası, məktəb və kitabxanalara odun kimi istifadə üçün daşıyıblar. İyunun 19-da onu və fəhlələri polis şöbəsinə çağırıblar, ağac kəsiminin qanunsuz olduğunu bildiriblər.
“Rəydən kənara çıxıb, ağacları kütləvi kəsib”
Ekologiya və Təbii Sərvətlər Nazirliyinin nümayəndəsi Novruz Əliyev ifadəsində bildirib ki, qeyd olunan ərazidə ağacların budanma və kəsilməsi ilə bağlı qurumun müvafiq rəyi olub. Ancaq İmran İlyasov həmin rəyin mövcudluğundan istifadə edərək ərazidə kütləvi ağac kəsiminə yol verib. Nazirlik bundan xəbər tutan kimi dərhal sənədləşmə işləri apararaq hüquq-mühafizə orqanlarına müraciət edib.
Məhkəmə İmran İlyasova 2 il azadlığının məhdudlaşdırılması və 58 min 480 manat cərimə hökmü çıxarıb. İmran İlyasov hökmdən apelyasiya şikayəti versə də, təmin olunmayıb. O, 1 ildən çoxdur ki, icra hakimiyyətinə gedib-gəlir, ancaq başçının qəbuluna düşə bilmir:
“Başçının qəbuluna düşə bilmirəm ki, dərdimi deyim. Müavinləri də işdən çıxarılıb. Nəsrulla Vəliyevi birbaşa bu məsələyə görə işdən çıxarıblar, Aydəmir Manafovu da bir başqa məsələyə görə. Başçı məni qəbul eləmir, qurumun hüquqşünası deyir, başının bu işlərə aidiyyəti yoxdur, müavinləri o işi sənə özbaşına tapşırıblar. Halbuki, şəxsən başçı özü gəlib-gedirdi, budama, ağac kəsimi işlərinə baxırdı. Qurumun hüquqşünası dedi, get, apelyasiya şikayəti ver, narahat olma, təmin olunacaq. Getdim onu da elədim, təmin olunmadı. İndi mən neyləməliyəm? Məhkəmə icraçıları deyir, cəriməni ödəməsən, təzədən cinayət məsuliyyətinə cəlb olunacaqsan, bu dəfə uzunmüddətli həbs olunacaqsan. Müharibə əliliyəm, ailəm, övladlarım var. Mənə nə deyiblər, onu yerinə yetirmişəm”.
Quba Rayon İcra Hakimiyyətindən bildirilib ki, 1 il əvvəl məsələ hüquq-mühafizə orqanlarında araşdırıldığından və bu məsələyə məhkəmə hüquqi qiymət verdiyindən qurum münasibət bildirə bilməz. İmran İlyasov qərarlardan narazı idisə, vaxtında Ali Məhkəməyə kassasiya şikayəti verə bilərdi.
