Bu yaxınlarda Azərbaycanda parlament seçkilərinin keçiriləcəyi gözlənilir. Mərkəzi Seçki Komissiyasının sədri Məzahir Pənahov, Milli Məclisin deputatı Qüdrət Həsənquliyev və digər rəsmi şəxslər parlament seçkilərinin vaxtının qabağa çəkiləcəyi ilə bağlı açıqlamalar veriblər. Milli Məclisə seçkilərin bu ilin sentyabr ayında keçiriləcəyinə dair iddialar var.
Milli Məclisə seçkilərlə yanaşı, Naxçıvan Muxtar Respublikasının Ali Məclisinə də seçkilər keçiriləcək.
Artıq Ali Məclisə deputat seçilmək üçün namizədliyini irəli sürəcək şəxslər seçkilərə hazırlıq işlərinə başlayıblar.
Azərbaycan Respublikasının Milli Məclisinə və Naxçıvan Ali Məclisinə seçkilərin keçirilməsi barədə rəsmi qərar olmasa da muxtar respublikada bəzi şəxslər deputat seçiləcəkləri ilə bağlı açıq danışır, namizədliklərini irəli sürmək üçün lazım olan sənədləri hazırlayırlar.
Deputat seçilmək üçün lazımi sənədləri hazırlayan, adının açıqlanmasını istəməyən şəxslərdən biri TNS-ə deyib ki, onlardan bu il sağlamlıq arayışı da tələb ediblər. Ali Məclisin deputatı olmaq istəyənlər Naxçıvan Şəhər Poliklinikasından sağlamlıq haqqında arayış alırlar.
Parlament seçkilərinin keçirilməsi ilə bağlı rəsmi qərar olmadığına, deputatlığa namizədliyin irəli sürülməsinə başlanmadığına görə, bu şəxslər sənədlərini Naxçıvan Muxtar Respublikasının Mərkəzi Seçki Komissiyasına təqdim edə bilməzlər. Maraqlıdır, o zaman deputat seçilmək istəyən şəxslər sənədlərini hara təqdim edirlər?
TNS Ali Məclisin deputatlığına namizədliyini irəli sürəcək şəxslərin siyahısını əldə edib. Siyahıda Naxçıvanın sabiq rəhbəri Vasif Talıbovun köməkçisindən tutmuş onun ən yaxın adamlarına, şəhid anasından şəhid atasına, Xalq artistlərindən orta təhsilli şəxslərə, sahibkarlardan sabiq məmurların övladlarına qədər bir çox maraqlı isimlər var.
Həmin siyahını təqdim edirik:
1. Ramiz Məmmədov – Naxçıvan Muxtar Respublikası Ali Məclis sədrinin köməkçisi
2. Ülvi Hüseynli – Naxçıvan Muxtar Respublikası Ali Məclisi Aparatının rəhbəri, Naxçıvan Dövlət Universiteti Hüquq fakultəsinin tələbəsi (qiyabi)
3. Vüqar Abbasov – Ali Məclisin deputatı, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) vitse-prezidenti, Naxçıvan MR Sahibkarlar Konfederasiyasının İdarə Heyətinin sədri
4. Nazim Məmmədov – Ali Məclisin deputatı, “Naxçıvan Balıqçılıq Təsərrüfatı” Açıq Səhmdar Cəmiyyətinin sədri
5. Telman Möhbalıyev – Ali Məclisin deputatı, Şərur Rayon Mərkəzi Xəstəxanasında şöbə müdiri
6. Yeganə Məmmədova – Ali Məclisin deputatı, Şərur rayon Aşağı Yaycı kənd tam orta məktəbinin direktoru
7. Həbibə Allahverdiyeva – Ali Məclisin deputatı, Naxçıvan Müəllimlər İnstitutunun ixtisasartırma və yenidən hazırlanma üzrə prorektoru
8. İsmayıl Qəribli – Ali Məclisin deputatı, Naxçıvan Dövlət Universitetinin Hüquq bölməsinin müdiri, Naxçıvan Dövlət Universitetinin Beynəlxalq münasibətlər və hüquq fakültəsinin “Hüquq fənləri” kafedrasının baş müəllimi
9. Hüseyn Niftəliyev – Ali Məclisin deputatı, Babək Rayon Nehrəm Qəsəbə Sahə Xəstəxanasının baş həkimi
10. Arzu Abdullayev – Naxçıvan Dövlət Universitetinin prorektoru
11. Əziz Qasımov – Naxçıvan Dövlət Universitetinin Gənclər Təşkilatının sədri
12. Arzu Qasımov – Azərbaycan Respublikasının Gənclər Fondunun Naxçıvan filialının direktoru
13. Teymur Rzayev – sahibkar, “Ləzzət Qida Sənaye” MMC-nin direktoru
14. Rza Xudiyev – Xalq artisti, Naxçıvan Dövlət Milli Dram Teatrının direktoru
15. Həsən Ağasoy – Xalq artisti, Naxçıvan Dövlət Milli Dram Teatrının aktyoru
16. Həsən Kərimov – Naxçıvan Muxtar Respublikası mədəniyyət nazirinin sabiq müavini
17. Sara Əzimova – “Şərq qapısı” qəzetinin baş redaktoru
18. Sahil Tahirli – “Naxçıvan Muxtar Respublikası Televiziya və Radio Verilişləri” Qapalı Səhmdar Cəmiyyətinin sədri
19. Qəzənfər Abdullayev – Naxçıvan Muxtar Respublikası Həmkarlar İttifaqları Şurasının sədri
20. İlhamə Mustafayeva – Naxçıvan Dövlət Universitetinin Tibb fakültəsinin dekanı
21. Aytən Baxşıyeva – həkim
22. Elvin Məmmədov – Ordubad Rayon İcra Hakimiyyəti başçısının müavini
23. Nurlan Fətəliyev – Naxçıvan Muxtar Respublikası Əmlak Məsələləri Dövlət Xidmətinin rəis müavini
24. İsmayıl Bağırov – Naxçıvan Muxtar Respublikası Nazirlər Kabineti Aparatının baş məsləhətçisi
25. Aysel Dünyamalıyeva – “Naxçıvan Muxtar Respublika Xəstəxanası” PHŞ-nin şöbə müdiri, həkim
26. Şəhla Şirəliyeva – Naxçıvan Dövlət Universitetinin müəllimi
27. Çapay Quliyev – Naxçıvan Dövlət Universitetinin müəllimi, NDU-nun Magistratura və doktorantura mərkəzinin direktoru
28. Aypara Behbudova – Naxçıvan Dövlət Universitetinin müəllimi
29. Rafiq Novruzov – Naxçıvan MR Dövlət Sosial Müdafiə Fondunda şöbə müdiri
30. Ramil Orucəliyev – Heydər Əliyev Muzeyinin direktoru
31. Ceyhun Bayramov – “Naxçıvan Qaziləri” İctimai Birliyinin sədri
32. Reyhan Sadiqova – Naxçıvan Muxtar Respublikası Ədliyyə Nazirliyinin əməkdaşı
33. Anar Səfərov – həkim-nevropatoloq
34. Gülşad Rüstəmova – şəhid anası, tibb bacısı
35. Sahib Əliyev – ləğv edilmiş Naxçıvan Muxtar Respublikası Dövlət Gömrük Komitəsinin sabiq sədri
36. Üzeyir Məmmədov – şəhid qardaşı
37. Ramilə Seyidova – Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri
38. Mais Gülməmmədov – “Naxçvan Şəhid Ailələri” İctimai Birliyinin sədri, şəhid atası
39. Xanım İbrahimova - Naxçıvan MR Ali Məclisi Aparatının məsləhətçisi (müvəqqəti əmək müqaviləsi ilə çalışır).
Qeyd edək ki, Ali Məclisə 45 deputat seçilir. Bu siyahıda isə 39 şəxsin adı var.
Mənbəmiz bildirib ki, yaxın günlərdə deputatlığa namizədliyini irəli sürəcək digər şəxslərin də adı bəlli olacaq. Şübhəsiz ki, namizədlərin sayı çox olacaq. Ancaq bəlli səbəblərə görə, ən şanslı namizədlər bu siyahıda yer alan şəxslər hesab olunur.
Onu da qeyd edək ki, bu siyahıdakı bəzi şəxslər Milli Məclisin də deputatı seçilmək arzusundadırlar.
