“Heç cür anlamaq olmur ki, Azərbaycanın çörəyini yeyən, bu ölkənin, bu xalqın hesabına ad-san qazanan, özlərinə bahalı, dəbdəbəli həyat şəraiti quran bu adamlar nəyə görə belə anti-milli bir mövqedən çıxış edirlər, niyə bunlar türk dilinin varlığından belə qorxurlar. Çox ayıb olsun belələrinə! Çox... Bunlar niyə anlamırlar ki, Azərbaycan dili, Azərbaycan türkcəsi elə türk dili deməkdir. Öz doğma, ana və dövlət dillərinə bunlar niyə bu qədər biganə yanaşırlar”.
Bu fikirləri Moderator.az-a açıqlamasında kinorejissor Ayaz Salayevin “Rus dili Azərbaycan dili üçün təhlükəli deyil - türk dili təhlükəlidir” söyləməsinə münasibət bildirən Azad Vətən Partiyasının sədri Akif Nağı ifadə edib.
“Bilirsiz, adını çəkdiyiniz o adamın mən heç adını da dilə gətirmək istəmirəm. Ancaq yadıma düşən, təxminən 15-16 il əvvəl onunla bağlı iştirakçısı olduğum bir olayı qeyd etməyə bilmirəm. Yəqin, bir sıra oxucuların da yadında olar, “Speys” telekanalında tanınmış aparıcılar Həmid Herisçi və İlhamiyyə Rzanın apardığı bir gecə verilişi vardı. Bir dəfə həmin şəxs mənimlə o verilişdə tərəf müqabili oldu. Elə söz vaxtına çəkər, Xocalı soyqırımının növbəti ildönümü ərəfəsi idi və söhbət, təbii ki, bu soyqırımından, onun miqyasından və bu faciənin acı və dəhşətli gerçəklərinin dünya çapında təbliğindən gedirdi. Gözlənilmədən bu adam efirdə söylədi ki, mənim Xocalıda heç bir doğmam, qohumum, yaxınım ölməyib, ona görə də həmin faciənin mahiyyətini dərk edə bilmirəm, başa düşə bilmirəm. Mən də, aparıcılar da heyrətə gəldi ki, özünü Azərbaycanın intellektual, ziyalı təbəqəsinin nümayəndəsi, ictimai rəyə təsir göstərə bilən şəxs hesab edən bu şəxs xalqımızın bütün dünyadakı vicdanlı insanları dəhşətə gətirmiş faciəsi haqda belə bir əndrəbadi fikir söyləyir. Bir sözlə, verilişdə bir şok yaşandı və mən ona dedim ki, sizin dilinizin söylədiyinizi qulağınız eşidirmi, nə danışdığınızı anlayırsınızmı”, -deyə həmsöhbətimiz diqqətə çatdırıb.
“Deməli, belə çıxır ki, 15 il keçsə də, bu adamın Azərbaycana, xalqımıza, dilimizə münasibətində heç bir dəyişiklik baş verməyib. Ona görə də hesab edirəm ki, belə adamlar cəmiyyətdən, ictimai həyatdan təcrid olunmalıdır, mediamızda, telekanallarımızda, ictimai tədbirlərimizdə Azərbaycan vətəndaşı, Azərbaycan türkü kimi düşünən insanlara meydan verilməlidir. Xocalı soyqırımının, faciəsinin mahiyyətini dərk etməyən və dərk etmək istəməyən, ana dilimizə, dövlət dilimizə, qardaş Türkiyənin bizimlə, demək olar ki, eyni olan dövlət dilinə yanlış mövqe nümayiş etdirən bu cür şəxslərə isə efir, meydan vermək olmaz”, -deyə Akif Nağı vurğulayıb.
