26 fevralda Xocalı soyqırımının 33-cü ildönümü tamamlanır.
33 il əvvəl baş verənlər nəinki Azərbaycan xalqının, bütövlükdə insanlığa qarşı törədilən soyqırım aktı idi.
Azərbaycan hər zaman bütün yüksək tribunalarda "Xocalıya ədalət" çağırışı etdi, təəssüf ki, dünya bu çağırışları eşitmədi, günahkarların cəzalandırılması üçün səy göstəmədi. Amma Azərbaycan Ordusu Xocalının qisasını aldı.
Müzəffər Azərbaycan Ordusunun qəhrəmanlığı sayəsində Xocalı şəhidlərinin qanı yerdə qalmadı.
2020-ci il Vətən müharibəsində Azərbaycan Ordusu 30 il işğal altında qalan torpaqlarımızı azad etməklə yeni reallıq yaratdı, “Dəmir yumruq” qalib gəldi. 44 günlük müharibədə misilsiz igidlik nümunələri göstərən qəhrəman ordumuz Müzəffər Ali Baş Komandanın rəhbərliyi ilə Xocalı faciəsi qurbanlarının da qisasını aldı, şəhidlərimizin qanı yerdə qalmadı.
Xocalı şəhəri 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror tədbirləri nəticəsində separatçılardan təmizlənib. Prezident İlham Əliyev 2023-cü il oktyabrın 15-də Xocalı şəhərində Azərbaycan Respublikasının Dövlət Bayrağını ucaldıb.
Azərbaycan Milli İstiqlal Partiyasının sədri, deputat Arzuxan Əlizadə "Cebheinfo.az"-a açıqlamasında deyib ki, ermənilər son iki əsr ərzində Azərbaycan türklərinə qarşı bir çox cinayətlər, vəhşiliklər, vandallıq aktları, soyqırımlar həyata keçiriblər:
“Hesab edirəm ki, 1992-ci il fevralın 25-dən 26-na keçən gecə Xocalıda baş verənlər bütün bu cinayətlərin zirvəsində dayanır. Xocalı faciəsi bütün bəşəriyyət üçün ən böyük soyqırım aktı kimi qəbul edilməlidir.
Həmin gecə mühasirəyə alınmış Xocalı şəhərindən qaçmaqla canını qurtarmağa çalışmış 63-ü uşaq, 106-sı qadın, 70-i qoca və qarı olmaqla, 613 Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib.
Düşmən gülləsindən 76-sı uşaq olmaqla, 487 nəfər yaralanıb. 1275 nəfər girov götürülüb. Girov götürülənlərdən 150 nəfərinin, o cümlədən 68 qadın və 26 uşağın taleyi bu günədək məlum deyil. Bu bütün bəşəriyyətə qarşı misli görünməmiş soyqırım aktıdır.Uzun illər idi ki, Xocalı faciəsinin qəlbimizdə açdığı yaranı daşıyırdıq.
Bu illər ərzindı xalq, millət, dövlət olaraq qarşımızda dayanan məsəlı o idi ki, torpaqlarımızı işğaldan azad edək. Azərbaycan xalqına qarşı bu cinayətləri törədənlər cəzalandırılsınlar. Nəhayət ədalət öz yerini tutmuş olsun".
Partiya sədri qeyd edib ki, uzun illər ərzində güclü dövlətlər, beynəlxalq təşkilatlar Azərbaycana bu məsələdə dəstək vermədilər:
"Özümüz gücləndik, ordumuzu gücləndirdik, müasir silahlarla silahlandırdıq və nəhayət İkinci Qarabağ müharibəsində torpaqlarımızın əhəmiyyətli hissəsi işğaldan azad olundu.
Ondan sonrakı dönəmdə də bir neçə antiterror əməliyyatı keçirərək məqsədimizə addım-addım yaxınlaşmağa başladıq. Nəhayət 2023-cü ilin 19-20 sentyabrında 1 günlük antiterror əməliyyatı ilə işğalçıları tam olaraq ərazimizdən qovduq və Xocalı da daxil olmaqla bütün ərazilərimizi nəzarətə götürmüş olduq.
2023-cü ilin 15 oktyabrında Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev Xocalıda Azərbaycan bayrağını ucaltmaqla bu prosesin yekunlaşdığını bəyan etdi.
Eyni zamanda, Xocalı cinayətinin başında dayanların bir çoxu Azərbaycan Ordusu tərəfindən zərərsizləşdirildi, bir çoxları isə ələ keçirildi. Bu gün də onlar Azərbaycan məhkəmələrinin qarşısında öz cəzalarını gözləyirlər".
O qeyd edib ki, Xocalı və digər əraziləri işğaldan azad etməklə alnımızdakı qara ləkəni təmizlədik:
“Qürurumuzu özümüzə qaytardıq. Bütün dünyaya da göstərdik ki, Azərbaycan xalqı məğlubedilməzdir. Bu gün qürurluyuq ki, Birinci və İkinci Qarabağ savaşında, sonrakı proseslərdə şəhid olmuş qəhrəman insanlarımızın ruhları şaddır.
Artıq Azərbaycan suverənliyini və ərazi bütövlüyünü bərpa edib. Amma Xocalıda baş verənləri heç vaxt yaddan çıxarmamalıyıq. Ona görə ki, gələcəkdə bir daha belə faciələrlə üz-üzə qalmayaq. Güclü olmalıyıq ki, bir daha heç kim Azərbaycana qarşı bu cür cinayət törətmək fikrinə düşməsin. 26 fevralda Xocalı faciəsinin növbəti ildönümü qeyd ediləcək. Biz hər zaman Xocalıda baş verənləri xatırlamalı, beynəlxalq ictimaiyyətə bu haqda məlumatlar verməliyik.
Ermənilərin vandallığını, soyqırım aktlarını dünya ictimaiyyətinı çatdırmalı və bu istiqamətdəki fəaliyyətimizi heç bir zaman dayandırmamalıyıq".
