“Yanvar ayında ABŞ dövlət katibi Antoni Blinken və Ermənistan xarici işlər naziri Ararat Mirzoyan Vaşinqtonda iki ölkə arasında təhlükəsizlik sahəsində əməkdaşlığın genişləndirilməsinə dair saziş imzalamışdılar. Blinken imzalanma mərasimində bildirib ki, ABŞ və Ermənistan müdafiə, iqtisadiyyat və demokratik təsisatların inkişafı sahəsində əlaqələrin gücləndirilməsi imkanlarını inkişaf etdirəcək “strateji tərəfdaşlıq komissiyası” yaradıblar. ABŞ Dövlət Departamentinin rəhbərinin sözlərinə görə, hər iki ölkə “daha güclü tərəfdaşlar”a çevrilir. İmza mərasimində çıxış edən Ermənistanın xarici işlər naziri Ararat Mirzoyan qeyd etmişdi ki, ABŞ sərhəd təhlükəsizliyinin gücləndirilməsinə ekspert yardımı göstərmək üçün Ermənistana bir qrup mütəxəssis göndərəcək. Görünən odur ki, bu da sadəcə kağız üzərində qalan bir məsələyə çevriləcək”.
Milli Məclisin deputatı Azər Allahverənov Bizimyol.info xəbər portalına açıqlamasında bildirib ki, son günlərdə Ermənistanın informasiya vasitələri, xəbər agentlikləri tərəfindən verilən məlumatdan Amerika Birləşmiş Ştatlarının missiyası Ermənistan Respublikasının sərhəd qoşunları və ümumiyyətlə, sərhəd rejimi üzərində müəyyən bir monitorinq keçirməli olduğu səslənir: “Donald Trampın inaqurasiyası öncəsi deməli Co Bayden və Entoni Blinkenin təşəbbüsü və fəal iştirakı ilə tərtib olunmuş strateji əməkdaşlıq haqqında xartiya sənədinə uyğun olaraq həyata keçirilməli idi. Ermənistanın xarici işlər nazirinin müavini Arpin Sarkisyan qeyd eləmişdi ki, hələki belə bir missiya gəlməyib. Ola bilər ki, bu müəyyən texniki səbəblər üzündən bu, ləngimələr baş verir. Görünən odur ki, Amerika Birləşmiş Ştatlarının Cənubi Qafqaz bölgəsi ilə bağlı, xüsusilə də Ermənistanla bağlı olan siyasətində müəyyən bir dəyişiklik var”.
Deputat vurğulayıb ki, ABŞ bir vaxtlar Ermənistan üçün bir çətir funksiyasını yerinə yetirən bir dövlət idi: “ABŞ həm hərbi sahədə, həm də digər sahələrdə Ermənistana maksimum dəstək göstərən bir tərəf idi. Xüsusilə, “Demokratlar” partiyası böyük dəstək göstərirdi. İndi də “Respublikaçılar”-ın bir çox bölgələrlə bağlı siyasət dəyişikliyinə getməsinin şahidi oluruq”.
Azər Allahverənov hesab edir ki, Ermənistana qarşı siyasətin dəyişəcəyi də istisna edilmir və Amerika Birləşmiş Ştatları həmin missiyanın göndərilməsinə sanki həvəsli deyil.
Deputatın fikrincə, bunun müxtəlif səbəbləri var və bu səbəblərdən biri, bilavasitə ABŞ ştatlarının Cənubi Qafqazla bağlı, xüsusilə də, Ermənistan üzərindən olan dəstək siyasətinin bir qədər zəiflədilməsi ilə bağlıdır: “Nəzərə alsaq ki, Amerika Birləşmiş Ştatları Ermənsitana həm də maliyyə cəhətdən çox böyük dəstək göstərirdi. Amma verilən son məlumatlardan da bəlli olur ki, hətta maliyyə dəstəyi də dayandırılıb”.
